Read Southern Rengma Naga ZEKARIA 8 Bible Online

ZEKARIA 8 - Southern Rengma Naga bible

ZEKARIA 8

¹Kekvutsin Npugü le jolo hipe Zekariah tsüshü:

²“Ale Jerusalem temi dan sosa kethyü genyu a-keche shü nyü bin nle, Keso tsügü le athyü pe a-shwikerüchün nyu ge anyunta bin nle.

³Ale rani ryü Jerusalem, a nyida kenshün günyu yhun ti. Tsü lope joketsin kesen nyida gü tseti, lo Kekvutsin Npugü rincho gü lope rincho kenshü gü tse koti.

⁴Peche-e tenu-e, thensa lao thün sen tsonchü kehü nyu no nyida gü tsoncho dan ka dun niti.

⁵Lo ntsenyu no tsonda dan kesü thüo kechoni bin ti.

⁶“Hinyu ntsoka tin kela senye dan mhundyü nyu we hihontse loho nrün hontse bin logwa, ai tsüle agenyu we thyülo keho ndile.

⁷Me le atemi tenzen gü kela kazü ki ale atemi kenishwi shü lati,

⁸tson-o npho lo nkhün ki anyugun zen raniryü no Jerusalem nyu yhun ti. Tson-o anyugun le atemi, lo ale anyugun Sunggigü thyüti, ketsin lo kenjü sen anyugun so gon ti.

⁹“Pechelo! A Kershvuka thyüni titse phasin pe keshü gwünkho ka sidyükesha nyu le zo keshü hontse hagun le ntsoka nyü nilo bin nle.

¹⁰Tsü mhundyü we temi nme-e temi nmvue nyukhu jonshe lomvu, lo temi nme shwikerüchün nyu nshvu mvu tse bin lomvu. Ale temi no khinyunyu ntsun shü.

¹¹Ai ntsoka we ale rhün kebin senye hidan shwi kecha thyü bin nle.

¹²Anyugun nyun bwenye tse ntsi shüti. Anyugun vain le nsha loti, tsangri sashü, lo kazü güle chvülo sa loti. Ale jochü hi aphu pe atemi rhün kebin dan tsüti.

¹³Judah lo Israel temi! Gükela gwünkho ka tesin le shochün pe khinyunyu tsüo, ‘Judah lo Israel nyu ge tsükeryü hontse kethyü kenke no nge ryülo tse zohü!’ Ai ale hagun kenilo ti, tson-o tesin kecha no khinyunyu ka, ‘Judah lo Israel ge keryü hontse kethyü jochü nno hyulo nda! tse zoti.’ Tsügenyu pechelo lo nshvu nya.”

¹⁴Kekvutsin Npugü le zo, “Hagun pvübon nyu le anyunthyü nshvu pe anyunta kela ka, ale kenke pe anyugun ge shüti tse rhilo-o anyun rani la mvutse ale rhikelo gü thyüla.

¹⁵Ai ntsoka we ale jochü pe Jerusalem lo Judah temi tsü titse ndo bin nle. Tsügenyu nshvu nyalo.

¹⁶Hagun le hidan hi thyü mvu loshvu: Khinyunyu ka joketsin zolo. Jokerabin nyu kenjü ketsin pen shü-- Kengükegwa senryü kehü gü tsü.

¹⁷Khinyunyu nthyü nnyü kethyü tson ndo nya. Nku-o keswe thyü nya. Ale kenku, njükemvu lo kesükevü kethyü tsü nrhi kehü genyu.”

¹⁸Kekvutsin Npugü le jolo hi pe Zekaria tsüshü:

¹⁹“Shyezi, shyepvün, shyetsenyü lo shyetseryü ka nyen kethyü tsüle Juda temi dan genyu shekerhün lo nyunkenyü nga thyü lati. Hagun ketsin lo kengükegwa so mvu loshvu.”

²⁰Kekvutsin Npugü le zo, “Nyida kechon ka temi le Jerusalem nyu ryü nrün gwünkho gü le ryüjü nle.

²¹Nyida nme nyu temi dan le kechanyu ka, ‘Agun le Kekvutsin Npugü rüshvu lo a-jochü hi titse güjü nle. Ryü n gun gü tile,’ tse ti!”

²²Temi kechon lo senye kekvu nyu le Jerusalem nyu ryü Kekvutsin Npugü rüshvu lo a-ka jochü hiti.

²³Tsü gwünkho ki sinrünyi kechanyu mitseryü le ryü Judanyu nme ka zo-o, ‘Agun ko siki hagun le hyulo nrün tsü ngun kenjün loti le, Sunggigü le hagun zen hü tse kethyü agun le nyülo laso.’ ” tse ti.