Read Southern Rengma Naga ZEKARIA 9 Bible Online

ZEKARIA 9 - Southern Rengma Naga bible

ZEKARIA 9

¹Hile Sunggigü jolo: A-le Hadrach Kazü lo Damaska nyida ge shaja khishü titse zoho keshü. Israel tsipwen nti mvu, ai Siria nyida gü ko Npugü hon.

²Hamath, Hadrach zen terhi kebin gü ko a-hon, lo Ture, lo Sidon nyida lo tsünyu thathyü kesha aphu.

³Tyre le a-chwida khwen lo-o rakagi lo suna kequen pe nnyo hontse bin.

⁴Ai Npugü le a-le kebin aphu sentin lati. A-le tsügi kenya pe zida nyu shweshü la, lo nyida gü rope kenphü thyü lati.

⁵Ashkelon nyida gü le hi hyushüo nshvu lati. Gaza nyida gü le tsü hyu shüo nyunkenjün thyü sati. Tson-o Ekron, lo a-kenrin ndi lati. Gaza le araja nmhe lati; lo Ashkelon khe lati.

⁶Lo tsipwen kerhün kela le Ashdod nyu yhunti. Npugü le zo, “Ale ketekho kehü Filistian nyu hi aphu thyü ketsenyo lati.

⁷Anyugun le thyüzi le a-ge kebin thyü, nmvue khin kehü chvü dan tyüsin loho. Rhünkelo nyu aphu atemi thyüo Judah tsipwen dan pfüphun nme hontse lati. Ekron le atemi thyü lati Jebus nyu hontseo.

⁸Ale a kazü rikhun lo ntsen lo lao shwikerüchün nyu no tsü pfüthü mvu lati. Ale kekvu kesen nyu no atemi nshwe sin loho. Atemi le dihontse kenjün thyü yo ale hyu laso.”

⁹Sherhünlo, Sherhünlo, Zion temi dan! Shekerhün genyu senlo, hagun Jerusalem temi dan! Shwishü, hagun raja le hagun ki ryüjü! A-le kvulo lo me nyeki kvulo-o ryüjü, ai tsenyo-o gada nme ge bin gada lübwe nme ge dun bin.

¹⁰Npugü le zo, “Ale Israel nyu terigari gü khi lati lo Jerusalem nyu keru dansentin lati; terinyu sen kehü tholevü dan nke lati. Hagun raja gü le senye dan nyu gwaketho thyü shüti; a-le züda nme ka gü kecha keti so kekvu senti, Eufrates züri ka gü kazü keni keti.”

¹¹Npugü le zo, “Ale hagun zen kejozenkelo tsüle rora kethyü tezi pe mehor vü kela genyu, Ale hagun temi hoshü lati-- zü kendi ki tekhwünkü nyu me dothyü kebin.

¹²Raniryülo; hagun me dodan ntsoka hagun kenrin le bin nle; ranio kenshvu kendi hagun bin nyu ryülo. Ale ntsoka hagun ka zobin nle, hagun le kenjün thyü kela aphu genyu ale jochü jünhvu kela pe hagun tsüni ti.

¹³Ale Judah pe shüpahü nyu tholevü hontse lo Israel pe thotsi hontse senti. Ale Zion temi pe zhethon hontseo, Grik nyu zen teri thyü ti.”

¹⁴Npugü le a-temi dan so ge chwiryüti; a-le a-thotsi kvu pe tsangkekechwü hontse ti. Aphuso Npugü le shu gü khun shüti; a-le tesinzin tsangkenbu terhi nyu ryüti.

¹⁵Kekvutsin Npugü le a-temi dan nokhin loti, lo anyugun le anyu shwikerüchün nyu nke lati. Anyugun le kenzeü nyu hontse terinyu nra senti, tson-o anyugun le shwikerüchün nyu dan zitsun lati; tsüle rora kethyü tezi pe khun nyu shüo kershvubin gü ge run shüo tsun kebin hontse lati.

¹⁶Jon tsügü le keryüka, Npugü le a-temi dan kenilo ti, tanyü kekhwenyu nme le kenshvu nyu a-tanyü kenilo kehü hontse. Anyugun le raja perün ge tsominketsen hontse a-kazü nyu ben bin ti.

¹⁷Kazü gü le ditsüki thyü gwa lo zegwa tiyo no! Tsünyü shye lo vainzu genyu selo dan le yhun nko nkin ti.