Read Southern Rengma Naga MATHI 10 Bible Online

MATHI 10 - Southern Rengma Naga bible

MATHI 10

¹Tsüsika a-le tseryü kenyhun che dan ko zen a-ki gunryüo, nshünkemvu kapu lo kehokenyü aphu lo gwakemvu aphu thyü kesherhünlo kegwa kekvu khipe anyugun tsüshü.

²Lo apostel tseryü kenyhun che dan zen le hidan hi: kerigü, Simon mele a-no Pitor tse kelagü, lo a-sikezengü Andria; Zebedi nyugü Jakob lo a-sikezengü Johan.

³Filip lo Bortholoma; Thoma, lo Mathi khajana keshvu gü; Alfia nyugü Jakob, lo Thadia,

⁴Kanan nyu gü Simon, lo Jisu tenkeshü gü Iskariot Judas.

⁵Lo Jisu le tseryü kenyhunche dan hi nishüo tha zope anyugun hio, “Hagun Judakemvunyu tson nyu gun nya, lo Samaria nyu rünyi nme nyue yü nya.

⁶Tsonkethyü gü mvule Israel tsipwen nmhe kela tanyü dan ki gunlo nye.

⁷Lo hagun gun kethyü ka me senthyüo, ‘Tsangge keda kho nni laso!’ tsonlo nye.

⁸Lo kehonyu thyü kesherhün shü, kesinyu thyü nrhün shü nye, lo nyun le ketyünyu thyü nshün shü, tero gwakemvu hüla chi. Hagun le kerunnyu hyulo, tsügenyu kenrun nyu pe zhünshü nye.

⁹Hagun pisa khin nyu suna nmvue pisa nme-e pvü nya.

¹⁰Lo hagun kenjwen ka thakhin nmvue mirün kenyhun nmvue, phaje nmvue thün-e sen nya. Kechamvule thathyü kehünyu le a-ketyüketsü hyutyü zü kethyü genyu.

¹¹“ Lo rünyi keda nyue keshen nyue segü le hagun nsin nyü bin yo tsünyu fülo chi; tson-o hagun le tin kemvuthen tsünyu binlo nye.

¹²Lo hagun le ka tsünyu keyü ka jochü hipe ka tsünyu shülo nye.

¹³Lo ka tsügü le gwa yatselo, hagun kehi no ka tsünyu bin kelogü thyülo; ai gwamvu yatselo, hagun kehi no hagun ge niryü kelogü thyülo.

¹⁴Lo temi ligü higüe hagun zenlo mvu, nmvue jo-e nyümvulo, ka tsünyu nmvue rünyi tsünyu tinkezhü ka hagun pha ge kenpüe kekhü shüla nye.

¹⁵Ale hagun ka zo tsentsüshü ti, ketsokethyü nyu rünyi tsügü rüla nyeki Sodom lo Gomora rünyi hvu rüla we nne kvuti.

¹⁶“Hire, tanyü le teken dan nyu keyü hontse ale hagun nishü güzhü nyo; tsügenyu hagun peri do kegwa hontselo, lo nsu jvü kegwa hontselo.

¹⁷Ai temi ge petsülo, kechamvule anyugun le hagun ten pe ketsokehü dan ki shüti, lo anyugun le sinagog kanyu hagun vüti.

¹⁸Lo azan genyu meno hagun sü zen-o ahng nyu lo rajanyu mhundyü nyu gun ti, tson-o tsüdan ka lo Judakemvunyu mhundyü nyu azan zoshü ti.

¹⁹Lo mele hagun ten keshü ka, nyu tsethyü zo mon? nmvue nyu zo mon tsekethyü rüchün pe hagun nyun kenjünthyü bin nya, kechamvule tsü gwünkho ka hagun no nyu zotiyo tsüpe hagun tsü nrün genyu.

²⁰Tsüle hagun npvü zo mvule hagun Pvügü Kapu le a-npvü hagun nyunki zoshü nrün genyu.

²¹“Lo temi le a npvü a-tsasikezen gü tenshü,lo a-pvü le a-npvü a-nyenyu ten pe meno dushvu ti.

²²Lo azan genyu temi ligü higüe no hagun ntsü ti; ai nyhen ti kelogü le kenilo ti.

²³Lo rünyi nme nyu mele hagun nshwen keso ka tin sen-o rünyi tsü khokeni ki gunla nye; ale hagun ka zo tsentsü shüti hagun le Temi Nyugü le keryü mhundyü Israel nyu rünyi nyu gun keti kü loho.

²⁴“Senkethyügü nyeki a-le senthyükelo dan le gon mvu, nmvue Npugü nyeki gogü le gon mvu.

²⁵Senthyükelo dan le a-senthyükelo gü hontse, nmvue gogü le Npugü hontse kela we gwala ti atale. Kami pegü nsin mele a-no Beelzebul letse lalo, a-kaminyu dan we tsühontse zo mvu ti ole?

²⁶“Tsügenyu hagun tsü nshvu nya nye; kechamvule tha nme-e pe me tesha loho letseo hen kebin ndi; lo meno shamvu titseo kebu kenjüe ndi kethyü genyu.

²⁷Lo ale kezün nyu hagun ka zokeshü tsü hagun le keben nyu tsü sen-o me senthyüshü nye; lo hagun le nyükelo tsü pe ka soki sen shü nye.

²⁸Lo nthyü nmin higü dushvulae, Kapugü dushvulo keho gü tsü nshvu nya nye; ai Kapu lo thyümin-e sin pe mahzi nyu boshvula lo kegwa gü nshvulo nye.

²⁹‘Rinyu kenyhun pe pisa nme hei hü mvu ole?’ tson-e hagun Pvügü kendo kemvu we tsü nme-e kazü nyu chetsüryü loho.

³⁰Ai hagun pehüe swükülo laso.

³¹Tsügenyu hagun nshvu nya nye; rinyu kechon we mvu hagun we gwakvu!

³²“Tsügenyu temi ligü higüe temi mhundyü ka Azan pe zolo, ako tsangge kebin Apvü mhundyü nyu tsünyu zan pe zoti.

³³Ai temi ligü higüe temi mhundyü ka azan pe zomvulo, Ako tsangge kebin Apvü mhundyü ka a-zan pe zo loho.

³⁴“Ale gwaketho khipe kazü nyu shüti tse tsüryü letse rüchün nya. Ale gwaketho mvule zhethon khishü titse ryü.

³⁵Ale meno me jo kechacha thyüo a-pepvünyu shwi rüchün, a-nyu tenugi no a-jvü shwi rüchün, lo a-mogi no a-nyügi shwirüchün, tsonshü titse keryü le.

³⁶Tson-o a-kami npvü keshwirüchün ti.

³⁷“Temi ligü higüe A nyeki a-pvü a-jvü sokvu yatselo, a-le Atemi thyü kü mvu; lo temi ligü higüe A nyeki a-nyu tenugi-e pechegüe sokvu yatselo a-le atemi thyü kümvu.

³⁸Lo temi ligü higüe a-npvü a-krus pen-o A sithen mvu yatselo atemi thyü kümvu.

³⁹Temi ligü higüe a-phou sope a-hon thyükelogü tsüle nke lati; lo temi ligü higüe a genyu a-phou nke kela gü le tsü lope a-hon thyü loti.

⁴⁰“Temi ligü higüe hagun zenlo kehügü le ako azenlo hünyo, lo temi ligü higüe azenlo kehügü we A nikeshü güe zenlo hünyo.

⁴¹Lo temi ligü higüe sidyükeshanyu zan nyu sidyükeshanyu zenlo kehünyu le sidyükeshanyu chün hyulo ti; lo temi ligü higüe kentsen nyu zan nyu kentsen nyu zenlo kehünyu le kentsen nyu chün hyulo ti.

⁴²Lo temi ligü higüe senthyükelonyu zan nyu zükun honpen nme-e pe a sikethen nyu keshen tsingüe la keshügü we, Ale hagun ka zotsentsüshü ti, tsünyu le a-chün ndila loho.”