Read Southern Rengma Naga MATHI 12 Bible Online

MATHI 12 - Southern Rengma Naga bible

MATHI 12

¹Tsüselo Jisu le Sabbath nme nyü me low ketsü nme zin tsüzhü ntsin, a-le senthyükelo nyu dan le nnyola njüo lowpwe nrhityü sola.

²Ai Farisinyu dan le tsü hyushüo a-ka, “Hire, Nle senthyükelo dan le Sabbath jon nyü tejvü kemvu thyü hü nyo,” tson sola.

³Ai a-le anyugun ka, “David lo a-zen kehünyu dan le nduka nnyokelo ka thyü kethyü rüla hagun le swü mvu ole?

⁴A-le Sunggigü ka nyu yüo peshünyu kemvu we David-e lo a-zen kehünyu dan-e thyü kethyü tejvü kemvu, kipe mehi kethyü tensü tyü so.

⁵Tsüntimvule Peshü dan-e Sabbath jon nyü Kershvuka nyu tejvü gwünrholae kemu ndi tsekethyü, hagun le tejvü nyu swü mvu ole?

⁶Ale hagun ka zoshü ti, Kershvuka nye gonkvu kethyü nme le hika bin nyo.

⁷Tson-e ale kerüshvu gü mvule shwikenjün gü le akenyü, tsonkethyü a-kon shakethyü we, nle mu kemvunyu nmu loho atale;

⁸kechamvule Temi Nyugü le Sabbath Npugü kethyü genyu; ” tsonla.

⁹Lo a-le tsünyu chwio anyugun sinagog ka nyu yü.

¹⁰Lo hire, a-ben kesinyu nme le tsünyu bin. Tsükatsü anyugun le a-nmu kenyü genyu a-ka, “Sabbath jon nyü me thyü ngwakeshü le a-zü le?”

¹¹Tsontsin a-le anyugun ka, “Hagun peha le tanyü peha le bin-o Sabbath jon nyü tsüle tekhwün küka nto yülalo, a-le tsü süshwi shü mvu ti ole?

¹²Tsonlo temi we tanyü nyeki a-min tsenkvu mvu ole? Tsügenyu Sabbath jon nyüe tha kegwa tho kethyü tsüle a-zü.”

¹³Tson-o a-le temi tsügü ka, “Nben shwenshü chi,” tsonshü. Tsontsin a-ko shwen shü; tson-o a-ben thyü ngwa pe kecha kipon hontse shüla.

¹⁴Ai Farisinyu dan le tsünyu chwigü a-dushvukela ndo-o a-genyu kenthon.

¹⁵Tsükatsü Jisu le jo tsü shalo njüo tsünyu ketun tinla; lo temi kechon le a-sithen gun; lo a-le tsü aphu thyü kesherhün küshü

¹⁶tson-o anyugun no a-rüla pe me ka zo nyalo tse tsüdan kekheni la.

¹⁷Tson-o nduka Isaya sidyükeshagü no:

¹⁸“Hire, Ago A npvü a-kejü kelogü, A sokegwa gü, A nyun kie shwi pe akenyü kethyü gü. Ale A Kapu khipe a-ge shüti, lo a-le jo kenjü zope Judakemvunyu zen ti.

¹⁹A-le me zenkenyi lo sen bin loho, lo tsonda nyu temi nme-e no a-jo sha loho.

²⁰A-jo kenjü gü no kvulo kemvuthen, A-le nbo tseben ketse-e bope shwenla loho. A-le mah kenben ni khu kebin-e bokemhü loho.

²¹Lo Judakemvunyu ju le a-zan nyu a-sidyü le bin loti,” tsonkenjü jo tsü penlo.

²²Tsükatsü mele Terothonyu, Yhükeponyu, Kepinnyu, lo A-nyetin gwakemvunyu zen-o a-ki ryü, lo a-le tsüdan thyü ngwa küshü, kepinnyu no jozolo, yhükeponyu no tha hyulo,

²³Tsontsin temi dan le a-dunthyüo, “Temi higü hile David Nyugü mvu ole?”

²⁴Ai Farisinyu le jo tsü shalo njüo, “Temi higü hile tero gwakemvu kedagü Belzebul kekvu sen kemvu we, tero gwakemvu dan tsü hü loho,” tson.

²⁵Tsükatsü a-le anyugun nyun kendo shalo njüo, a-le anyugun ka zo, “Keda ligü higüe a-npvü a-pvükhola yatselo nkela hünyo; lo rünyi nmvue ka ligü higüe a-npvü a-pvükhola lo binlo hümvu.

²⁶Satan le a-npvü satan hüla lo, a-npvü a-pvükho laso, tson yatselo a-keda le nyu tsethyü binlo tila?

²⁷Lo Ale Belzebul kekvu sen-o tero gwakemvu hüla hülo, hagun nyenyu ju le segü kekvu sen-o tsüdan hüla hü nla? Tsügenyu anyugun le hagun ketsokethyünyu thyü ti.

²⁸Ai Ale Sunggigü Kapu kekvu sen-o tero gwakemvu hüla hü yatselo, tsonlo Sunggigü keda le hagun tilo bin laso.

²⁹“Lo temi nme-e kekvu nme phinlo rimvuo dihontse kekvu tsügü kanyu yügü a-hon khilo mon? A-le a-phin kelo we a-kanyu yügü a-kanyü khilo ti.

³⁰“Temi ligü higüe akipon kemvunyu le A shwikerüchün nyu; lo temi ligü higüe azen-o tha kerhün kemvunyu we bokenthyüla hünyo.

³¹Tsügenyu ale hagun ka zo tsentsü shüti, ‘Kemu lo me kenkhin lihi-e jü pe temi tsüti; ai Kapu kenkhin we jü pe tsü loho.

³²Lo temi ligü higüe Temi Nyugü ge jo gwakemvu zo-e jüshü ti; ai temi ligü higüe Kenshün Kapu ge jo gwakemvu zolo, nje ntsenyüe lo hisiki-e jü pe tsü loho.

³³“Terasha kegwa hyulo nrün genyu a-bin gü no gwa mvulo shvu, terasha binle gwa mvulo a-sha le gwa loho; kechamvule a-sha ge a-bin shalo hünyo.

³⁴Hagun ribo tsipwen dan, hagun le gwamvuo dihontse tha kegwa zolo gwa tila? Kechamvule nnyun ki tha kechon kebin nyu nmün no zochwiryülo kehü genyu.

³⁵Temi kegwanyu le a-thakhin kegwa nyu tha kegwa henshwishü hünyo, lo temi gwakemvunyu le a-thakhin gwakemvu nyu tha gwakemvu henshwishü hünyo.

³⁶“Tsügenyu ale hagun ka zo tsentsü shüti, temi le jozo kehü jo kezükemvu aphu nyu a-rüla ketso kethyü nyü zoshwi küshü ti.

³⁷Kechamvule njo genyu nle njülo ti, lo njo genyu nle mula ti.”

³⁸Tsontsin lesükesha tsin ju lo Farisinyu peha le a-ka, “Senkethyügü, agun le nno thazansü nme thyüshüo nrinyü bin nle.”

³⁹Ai a-le anyugun ka, “Nje ntsenyü temi serikemvu lo jo ketsin zokemvu ju le thazansü thyükeshü fü kehü gwünzin; ai Sidyükeshagü Jona ge thazansü thyükeshü nyeki thazansü kecha nme-e thyüshü loho so.

⁴⁰Kechamvule Jona le tsangkeben jonshen lo tsangkezün jonshen tsehü kedagü ginda nyu kebin hontse Temi Nyugü ko tsangkeben jonshen lo tsangkezün jonshen kazü gin nyu bin nrün genyu.

⁴¹Temi rüla ketso sokeryü ka Nineveh nyule soryüo ntsoka temi dan hi zen binlo-o anyugun nkhin ti; kechamvule tsüdan le Jona le anyugun senthyü kethyü ka anyugun nyunkelulo kela genyu. Lo hire, Jona nyeki gonkvu kethyü nme le hika bin nyo.

⁴²Temi rüla ketso kethyü nyü tesizin kipon rajagi le soryüo nje ntsenyü nyu hi zen binlo-o anyugun nkhin ti, kechamvule a-le kazü keni kipon Solomon thakesha jo nyü titse keryü genyu; lo hire, Solomon nyeki kegon nme le hika bin nyo.

⁴³“Nshünkemvu kapu le temi ge chwikela ka a-kebin bin füo tin sen-o zü kendi bin fü gun hünyo tson-o fü kendila.

⁴⁴Tsükatsü a-le a-npvü, ‘A-le nduka bin hüo chwikela bin nyu nigun ti.’ Tsüselo a-le tsünyu kegun ka tsü le nrun lo ketsü kegwa thyü pe bin kenjü hyulo hünyo.

⁴⁵Tson-o a-le gungü a-nyeki gwakemvu kapu kecha tsenyü pe a-sinlo-o anyugun kethen-o tsünyu yügü bin tinla hü; lo temi tsügü rüla le kekhin ki we kerika nyeki gwamvu kvula hünyo. Hizon ka temi serikemvu hidan ge-e tsühontse ti.”

⁴⁶A-le temi dan ka jozo ketseka hire, a-jvü lo a-sikezen nyu dan le a-zen kenthon titseo a-fü ryüo kamhun ki bin.

⁴⁷Tsüka temi nme le a-ka, “Hire, njvü lo n sikezen nyu dan le n nthon titseo ryüo kamhun ki bin nle,” tsonshü.

⁴⁸Ai a-le a-ka tha zokeshü gü ka, “Segü le ajvü lo segü le a sikezen nyu la?”

⁴⁹Tson-o a-le a-ben keto pe a-sikethen nyu dan tsin-o,“ Ajvü lo a sikezen nyu le hiki re.

⁵⁰Kechamvule temi ligü higüe tsangge kebin A pvü kendo zen kehünyu tsüle, a sikezen nyu, A lüginyu, lo A jvü le.”