Read Southern Rengma Naga MATHI 13 Bible Online

MATHI 13 - Southern Rengma Naga bible

MATHI 13

¹Tsünyü Jisu le ka tsünyu chwio gungü züda khoka binlo.

²Tsontsin temi danda nme le ryü a-pha ka kequenlo; tsügenyu a-le run nyu yüo tsünyu binlo; lo temi dan aphu kesinki binlo.

³Tsontsin a-le jokejvü nyu tha kechon pe anyugun ka zo. “Hire, ntsi kegwün nyu nme le ntsi gwün titse tsü;

⁴a-le ntsi gwüshü ntsin peha le tson khoka chetsüla, tson-o tegü le ryüo tsüdan jüntyüla.

⁵Lo peha le tsügü a-bin gwakemvu tso soge tsüla; tson-o whütse chwiryü.

⁶Lo tsang le nnyü chwiryü ntsin anyugun me kendi genyu phoshvu whü tsela.

⁷Lo kechanyu le tsehü dan nyu yüla, tson-o tsehü no gon soryüo anyugun zeshvu la.

⁸Ai kechanyu we nnyo kegwa nyu tsülo njüo a-sha nshalo, peha le tsi, peha le hentsero, lo peha le shenryü tse nshalo.”

⁹Lo Jisu le jo kekhin zo-o, “Nyülo, temi ligü higüe a-nyetin kebin gü!”

¹⁰Tsontsin a-le senthyükelo nyu dan le ryüo a-ka, “Nle nyuthyüo me kechanyu ka jokejvü pe zohü nla?” tsonshü.

¹¹Tsügenyu a-le anyugun ka, “Hagun we no tsangge keda rüla jo kentsun dan shalo lotse shü laso, ai kechanyu we tsonshü mvu laso.

¹²Kechamvule temi ligü higüe tha le a-ka kebin gü pe a-tsü sinshü ti, tsonlo a-hon le chonsa loti; ai temi ligü higüe tha le a-ka bin kemvu gü we kebin dan-e khini sen tinla ti.

¹³Lo tsügenyu ale anyugun ka jokejvü pe zokethyü, kechamvule anyugun le nri bin-e hyulo hümvu, lo nyü bin-e shalo hükemvu genyu.

¹⁴Lo Tsüdan rüla Isaya le nduka: ‘Hagun le kenyü we nyü loti, ai thame kae shalo ho; lo hagun le kenri we nri ti, ai thame kae hyulo nrün ndi,

¹⁵lo temi hidan hile a-nyun pin laso, anyugun nyetin-e rügü laso, lo anyugun yhütyüe tha hyumvu. Kechamvule anyugun yhütyü pe hyulo, lo anyugun nyetin pe nyülo, lo anyugun nyun no rüchünlo, tson-o ryüo ano anyugun thyü ngwa keshü kenshvu genyu,’ tsonzo kenjü penlo.

¹⁶“Ai hagun yhütyü nyeki a-phu kengvü ndi, tsüle tha hyu kehü genyu lo hagun nyetin-e tsü a-keme, tsü le thakhwen shakehü genyu.

¹⁷Lo ale hagun ka zotsentsü shüti, “Nduka sidyükeshanyu lo kentsen nyu kechon le hagun le hyu kehü hi hyu nyüsa ryü, ai hyulomvula; lo anyugun le hagun le shakehü hi shanyü sa ryü, ai shalo mvu laso.

¹⁸“Lo hagun ko ntsi kegwün jokejvü gütsü nyülo re.

¹⁹Temi peha le keda jo gü nyülo-o a-kon rüchünlo mvu kebin ka serikemvugü le ryüo a-nyunki kebin ntsigü tsü se sen tinla hünyo. Tsüle mele ntsi gwün pe tsonkhoka shü kelanyu.

²⁰Lo mele ntsi gwün pe tso soge shü kelanyu le jo tsü shalo ntsin a-kenyü sao zen whütselo hünyo.

²¹Ai a-nyun ki a-me tsenlo mvuo gwüngwa nme nti binlo kehü gwünzin; lo a-le jo tsügenyu kenjün kethyü, nmvue mele a-kenshwen le soryü ntsin a-pha rheketola hü.

²²Lo mele ntsi gwün pe tsehü dan nyu shü kela dan we, temi tsügü le jo tsü shalo, ai nje ntsenyü rüla dan hi rüchün pe a-nyun bwenlo kemvu thyü, lo nsala kehü kenya tsüno jo gü tyü kemhüla njüo a-no a-sha nshalo mvula hünyo.

²³Lo mele ntsi gwün pe nnyo kegwa nyu shükela nyu we jo tsü nyülo-o a-kon shalo hünyo; lo tsüle a-sha nshalo tsentsü hünyo; peha le tsi, peha le hentsero, lo peha le shenryü nshalo hünyo.”

²⁴Lo Jokejvü kecha nme pe anyugun ka zoti tseo, “Tsangge keda le temi nme le shyetsi kegwa pe a-low nyu gwünkeshü hontse.

²⁵Ai mele zhü kebin ka a-shwikerüchün nyu le jontsü tsi sen tsügü gwünshülao tinkela hontse.

²⁶Tson-o low le tsü chwiryüo a-sha nshalo ntsin, jontsü tsi ko hyu soryüla.

²⁷Tsontsin npu tsügü gonyu dan le ryüo a-ka, ‘Npugü, nle shyetsi kegwa pe gwünshü mvu ole? Tsonlo jontsü tsi le dikipon ryü la ola?’

²⁸Tsontsin a-le anyugun ka, ‘A shwikerüchün nyu le hihontse thyüshü le.’ Lo a-gonyu dan le a-ka, ‘Nle agun no tsügü tsü jwi kequenla tile mvula?’

²⁹Ai a-le anyugun ka, ‘Nmvu, hagun le jontsü jwi gunlo low ko phü kela nshvu le.

³⁰Logvü gwünkho le ryü kemvuthen au no tsühontse kengü yhun tselo. Logvü gwünkho le ryülo ale anpvü logvünyu ka, hagun jontsü gü bo kequenlo ri nye, lo rola nrün genyu tsü phin kequenlo; ai shye dan we gvü pe shye ka nyu kequenlo chi, tsonshü ti.’ ”

³¹A-le anyugun ka jokejvü nme zonishü titseo, “Tsangge keda le hennyon tsi nme hontse le.

³²Temi nme le tsü sen tsügü a-low nyu lishü; lo tsüle thatsi dan nyu keshen tsin nme, ai yhun soryülo hen kecha aphu nyeki gonla hünyo, lo senbin thyüla hünyo, tson-o nyekehü tegü no ryüo a-ro ge nsenlo kegwa thyüla hünyo.”

³³Lo a-le jokejvü kecha nme pe anyugun ka zoni-o, “Tsangge keda le khübu a-keme. Tenunyu nme le tsü sen gungü tha kendo rokhu kesü kenshen nyu shü njüo tho le punchwiryü kemvuthen kebu njü hü.”

³⁴Lo Jisu le jokejvü zo-o temi dan ka, johi aphu zoshü; lo a-le jokejvü kemvu jo nme-e pe anyugun ka zo mvu.

³⁵Tsüle kechamvule sidyükesha gü le zokenjü hontse: “Ale amün pe jokejvü zoti ale anyugun nthon kethyü ka; kazü thyülo nyemhu kebu kenjü ale anyugun ka zoshwishü ti,” tsonkeshü jo tsüno penlo nrün genyu.

³⁶Tsüselo a-le temi dan khela njüo kanyu yüla, lo tsüka a-le senthyükelo nyu dan le ryüo a-ka, “Low, lo jontsü tsi pe jokejvü kezogü tsü a-kon zope agun zenshüta.”

³⁷Tsontsin a-le anyugun ka, “Ntsi kegwa gwünkeshügü tsü le Temi Nyugü.

³⁸Lo low gü tsüle kazügü, lo ntsi kegwa tsüle kedanyenyu dan so. Lo jontsü tsi dan tsüle serikemvu nyenyu dan.

³⁹Lo tsü gwünkeshü gü tsüle n shwikerüchün gü satan. Lo logvü ki tsüle temi yhun kekhin ki so; lo logvü nyu tsüle tsangge lokethyünyu dan.

⁴⁰Lo jontsü kequen pe rokela hontse temi yhun kekhin kinyu tsühontse lati.

⁴¹Temi Nyugü le a-lokethyü nyu nishüo a-keda nyu thathyü nshvu kehünyu aphu lo temi gwakemvu kethyünyu aphu fü kequenlo ti.

⁴²Tson-o tsüdan khipe mahyi nyu shüla ti; lo meno tsünyu chü lo a-hü keta bin ti.

⁴³Tsükatsü temi kentsennyu dan le anyugun Pvü kedagü bin nyu ben pe yhüko hontse bin ti. Temi ligü higüe a-nyetin kebin gü no nyülo nye.”

⁴⁴“Lo tsangge keda le lobu nme nyu tha kegwa nme kebu pe bin kenjü hontse; temi nme le gungü tsü hyulo njüo kebu nipe binla; tsüselo a-le a-shekerhün pvüo gungü a-hon kebin aphu jwe pe low tsügü hielo.

⁴⁵“Lo tsüsika ko Tsangge Keda le hakethyünyu nme le tyü a-min ketsen fü kehü hontse.

⁴⁶Lo a-le tyü a-min ketsen tsü nme hyulo njüo gungü a-hon kebin aphu jwe lo-o tsü heilo.

⁴⁷“Lo tsüsikae a-le Tsangge Keda le joh nme hontse, tsü shwen pe zükeda nyu shüo tsehü shaseni tenkelo hontse.

⁴⁸Joh tsü le sülo ntsin meno tsü süshwi sen chwiryüo kesinki shülo, tson-o dunlo njüo kegwanyu kejü pe a-thakhin nyu kequenlo , ai gwakemvu nyu we khela.

⁴⁹Temi yhun kekhe ki-e: tsangge lokethyünyu le tsüryüo serikemvu nyu dan kejü kecha thyüpe kentsen nyu dan nrhila ti.

⁵⁰Tson-o serikemvu nyu dan khipe mahyi nyu shüla ti; lo meno tsünyu chü lo a-hü keta tse bin ti.”

⁵¹“Hagun le jo hi aphu a-kon shalo se mon?” Jisu le tson anyugun ketso shü. Tsontsin anyugun le, “Ele,” tsonla.

⁵²Lo a-le anyugun ka, “Hi a-kon güle, tson-o lesükesha tsinnyu ligü higüe tsangge keda temi thyü tinkela nyu le ka nme nyu Npu nyu le a-thakhin nyu tha keshün lo a-when sen chwikeryü a-keme.”

⁵³Lo Jisu le jokejvü tsüdan zothü shüla njüo tsünyu tinla.

⁵⁴Tson-o a-le tsünyu tin sen-o a-rünyi ki gun-o anyugun sinagog ka nyu me senthyü, lo a-khwenyü kelo nyu aphu anyugun dun thyüla. “Temi higü hile dikipon thakesha hihontse kethyü hyulo la? anyugun le tson ketso. “Lo a-tho ndun kethyü dan le dihontse la?

⁵⁵Hile sen mistri gü nyugü mvu ole? A-jvü le Maria tsekethyü gi tsü mvu ole? Lo a-sikezen nyu dan le Jakob, Joses, Simon lo Juda nyugun mvu ole?

⁵⁶Lo a-lügi nyue aphu nzen hü mvu ole? Tsonlo a-le dikipon tha hi aphu shalo la?”

⁵⁷Tson-o anyugun le a-ge anyugun pha nsüla. Ai Jisu le anyugun ka, “Sidyükeshanyu le a-npvü a-rünyi lo a-npvü a-kaminyu a-me kechaki we teshwen pvü kemvu thyü hümvu.”

⁵⁸Lo anyugun le tenyen kemvu genyu a-le tsünyu ndun kethyü tho kechonri thyüshü mvula.