Read Southern Rengma Naga MATHI 14 Bible Online

MATHI 14 - Southern Rengma Naga bible

MATHI 14

¹Tsükatsü Hero le Jisu le zankechwi thyülo kela shalo-o a-gonyu dan ka;

²“Higü hile Johan Baptist gü so; a-le kesinyu dan nyu rhün nisoryü laso; lo tsügenyu ndun kethyü tho hi thyülo bin laso.”

³Lo Herod tsüle himhundyü a-sikezengü Filip nu Herodia genyu Johan tenlo njüo phin pe doka nyu shüla.

⁴Kechamvule Johan le a-ka, “Nle tenu tsügi lokethyü tsüle a-zü mvu, tsozo keshü genyu.”

⁵Lo Hero le Johan dushvula nyü keso ka temi dan nshvula, anyugun le a-le sidyükeshanyu nme letse kehü genyu.

⁶Ai Herod kenyu jon le gunryü ntsin Herodia nyu tenugi le me mhundyü ka nashü pe Herod kenyü thyüshü.

⁷Tsügenyu a-le tenunyu tsügi le tha lihi hi-e pe tsü titse swe-o zoshüla.

⁸Tsükatsü tenunyu tsügi le a-jvü jo zen-o a-ka, “Nle Johan Baptist gü pe khipe khun nme ka shü sen ryüo atsüshülo!”

⁹Tsontsin raja gü le a-nyun kenjün thyüla, ai a-keswe genyu lo mele ryüo a-ka nyu ho kebin nyu dan genyu khipe a-tsü titse zoshüla.

¹⁰Tson-o a-le me nishüo meno doka nyu Johan pe gwenlo.

¹¹Tson-o pe khun nme ka shü sen gungü tenunyu tsügi tsüla.

¹²Lo Johan sikethen nyu dan le ryüo a-min pen gungü sunla; lo anyugun le gun gü Jisu ka zoshü.

¹³Tsükatsü Jisu le jo tsü shalo njüo tsünyu tin-o run ge bin-o tehen nyu gunla. Tsontsin temi dan le a-le tinkela shalo njüo rünyi kedagü nyu tsonchü sen-o a-fü gun.

¹⁴Tsükatsü a-le tinchwi gü temi dan me hyulo-o anyugun shwinjün rilao anyugun kehokenyü thyü ngwa shü.

¹⁵Lo ngwün thyü gü zhüla ntsin senthyükelo dan le a-ki ryüo a-ka, “Hiki hile tehen so; lo tsangkeben jon-e güzhü laso; tsügenyu temi dan nishüo anyugun no gungü anyugun gin fütyülo gwünta,” tsonshü.

¹⁶Ai Jisu le anyugun ka, “Anyugun no tinla mvue gwa, hagun npvü anyugun gin thyülo!”

¹⁷Tsontsin anyugun le a-ka, “Agun le tensü pvün lo tsehü kenyhun tse sen kehü gwünzin a-me tsünyeki tha ndi.”

¹⁸Tsontsin a-le, “Tsü senryüo atsü shülo,” tsonshü

¹⁹Tson-o a-le temi dan no tehen ge binlo lotse zoshü; tsüselo a-le tensü pvün lo tsehü hvu tse khinselo njüo nyisogü tsangge nrilo-o jochü pe tsüge shü. Tso-o tensü dan boshwelo-o khipe senthyükelo dan tsüshü, lo senthyükelo dan ko khipe temi dan tsüshü.

²⁰Lo anyugun aphu tsü tyü pe anyugun ginyü külo; lo anyugun le a-sen khü kequen shü ntsin khvütsü tseryü kenyhunche kesü khülo.

²¹Lo anyugun tsü ketyü dan, nche tenu simvu tse temi le yiepvün kho.

²²Tsüsika Jisu le senthyükelo nyu dan no run nyu yülo njüo a-mhundyü zida gü kecha kipon külo lo tsela, a-le temi dan nishü ketse ka.

²³Lo temi dan nishü kela siki, a-le a-npvü kazüthun ki kehithyü titse küla. Tson-o tsangzün ryüla,lo Jisu le a-npvü tse tsüge bin;

²⁴lo tsügwünkho tsüle run gü le zida gü nyu nithen sa gunla, zü kenkhen no pvü kezen sen-o, kechamvule tsangkenbu le ryü tsügü ntsun-o whünlo kela genyu.

²⁵Tsükatsü khejeki rikhun kelu pezigü ka a-le zida soge tsonchü sen-o anyugun ki ryü zhü.

²⁶Tsontsin senthyükelo ju le a-le zü soge tsonchü ryü kezhü hyulo-o anyugun kerüshvu la. Anyugun le zo-o, “Hile rümen nme so!” tson-o nshvuo nra senshü.

²⁷Tsontsin Jisu le anyugun ko-o, “Hagun nyun pechelo, Ale le; nshvu nyalo.”

²⁸Tsontsin Pitor le a-ka, “Npugü, Nle yatselo, Nle ano zü soge tsonchü sen-o nki ryülo lotse zoshü ta.”

²⁹Lo Jisu le a-ka, “Ryülo!” tsonshü ntsin Pitor le run nyu tsenryüo zü soge tsonchü sen-o Jisu ki ryü zhü.

³⁰Ai a-le tsangkenbu hyushüo nshvu sala; tsükatsü a-le zü nyuki yüzhüla kethyü genyu nrao, “Npugü nle akenishülo!”

³¹Tsontsin Jisu le a-ben shwe chwigü a-nrhisülo-o a-ka, “Hire, ketenyen kerhogü! Nle nyuthyüo kenyuhvula hü nla?”

³²Tson-o au le run nyu yülo ntsin tsangkenbu le ma tsela.

³³Tsontsin run nyu kebin nyu le a-rüshvuo, “Nle Sunggigü Nyugü ketsin le!” tsonso.

³⁴Tsüsika anyugun le tsü nken chwio Genesaret tsekethyü nyu ryülo.

³⁵Lo rünyi tsünyu kebin nyu le a-shalo ntsin anyugun le me nipe tsüte tsümhun kebin aphu ka shüo ho kebin nyu aphu zen-o a-ki ryü.

³⁶Tson-o anyugun le a-ka, “Agun no nphishwe-e kesülo ta.” tson-o hiso; lo kesü kelonyu aphu gwa külo la.