Read Southern Rengma Naga MATHI 15 Bible Online

MATHI 15 - Southern Rengma Naga bible

MATHI 15

¹Tsükatsü Farisinyu lo lesükeshatsinyu dan le Jerusalem nyu Jisu ki ryü a-ketso-o,

²“Nyuthyüo nle senthyükelo nyu dan le npvü nbon nyu jvü gwünrho hü nla. Kechamvule anyugun le chvü ketyü mhundyü anyugun ben tseo tyütsü hü kemvu genyu!”

³Jisu le anyugun ka, “Hagun ko nyuthyüo hagun npvü hagun jvü genyu Sunggigü le jo khikeshü gü gwünrho hü nla?

⁴Sunggigü le nduka, ‘Npvü njvü nyu rühvulo chi, lo temi ligü higüe a-pvü a-jvü nyu ge jo gwakemvu zo hülo a-no sila ti; ’ tson zo njü nyo.

⁵Ai hagun we temi ligü higüe, a-pvü a-jvü nyu ka, ‘Hai le aka keche hyulo kezü tsü khipe Sunggigü tsü laso,’ tse kehünyu, tsünyu le a-pepvünyu rühvu mvue gwa; tson hünyo.

⁶Tson-o hagun npvü hagun jvü genyu Sunggigü jo lope a-kenrun thyü laso.

⁷Hagun kerokon kehü ju! Isaya le nduka hagun rüla zo tsentsü kenjü le hihontse!

⁸‘Temi hidan hile a-mün pe arühvu kehü gwünzin, ai anyugun nyun we azen-o nithen sa bin hünyo.

⁹Ai temi npvü thyükelo jvü pe anyugun jo thyüo me senthyüo, anyugun le arühvu ja thyü kehü gwünzin! tsonla.’ ”

¹⁰Tson-o a-le temi dan kope a-ki shülo njüo anyugun ka, “Hagun nyülo njüo rüchünlo nye.

¹¹Temi mün nyu keyü le temi gwün nrhula hü mvu; ai temi mün nyu chwikeryü le temi gwün nrhula hünyo.”

¹²Tsontsin senthyükelo nyu ju le a-ki ryüo a-ka, “Farisinyu jule jo hi shalo ntsin anyugun nyun nta kela, nle shale mvula?”

¹³Ai Jisu le anyugun ka, “Tsangge kebin Apvü le senshü kemvunyu aphu phüla ti.”

¹⁴“Anyugun no tson bin ta! Anyugun yhüpo-o tsontsin pe me zen kehü dan me, lo a-yhütyü keponyu nme le a-yhütyü kepo kecha gü tsontsin zen hülo, au mihvu nren tsokhin nyu che tsüla ti.”

¹⁵Tsontsin Pitor le a-ka, “Jokejvü kon tsü zope agun zen shüta.”

¹⁶Lo Jisu le anyugun ka, “Hagun ko ntsokhin-e thashalo hü mvu ole?

¹⁷Tha lihi-e nmün nyu keyü le nginda nyu yüo khipe kevübin ki shwenla hünyo; tsü hagun le shamvu ole?

¹⁸Ai nmün nyu chwikeryü we nnyun ki chwiryü hünyo, lo tsüle temi gwün nrhu hünyo.

¹⁹Kechamvule nnyun ki serikemvu kendo, me dukeshü; keyüla, kerühu, kenku jünkezo, selü, hidan hi chwiryü kehü genyu.

²⁰Tha hidan hi le temi gwün nrhula hünyo; ai nben tsemvu tse chvü ketyü le temi gwün nrhula hümvu.”

²¹Tsüselo Jisu le tsünyu ketu sen-o Tur lo Sidon rünyi hvu kipon gunla.

²²Tsükatsü hire, Kanan nyu tenunyu nme le tsü denzin kipon ryüo a-ka, “Hei, Npugü David Nyugü, Nle a shwinjün shüta; anyugi nme le tero gwakemvu le nchün ndyü sa bin hü nle.”

²³Ai Jisu le a-ka, thame zoni mvula. Tsontsin a-le senthyükelo ju le ryüo a-ka hi tenge tseo, ‘A-no tinla lo! Kechamvule a-le ngun sinthen-o nrasen bin hü kelasi genyu!”

²⁴Tson-e a-le, “A nipe Israel tsipwen nmhen kela tanyü dan ka nti keshü gwünzin le.”

²⁵Ai tenugi le ryüo a-rüshvuo, “Npugü, a shwinjün shülo.”

²⁶Ai Jisu le a-ka, “Ntsenyu ketyüketsü sen gü tehi mhundyü ka keshü le a-zü mvu.”

²⁷Tsontsin a-le, “Ketsin le, Npugü; ai tehi ko a-npu nyu ketyüketsü bin ge nrhi tsükeryüe jüntyü hünyo.”

²⁸Tsükatsü Jisu le a-ka, “Hire, tenunyu, nketenyen le gonsa hile! Nkenyü thyü pe ntsükelo gü thyülo chi; ” tsonshü. Lo tsü gwünkho ka tsü a-nyu tenugi tsüle gwalo la.

²⁹Tsüselo Jisu le tsünyu tin sen-o Galil züda kho nni gunla; tson-o kazüthun ge kügü tsüki bin lo.

³⁰Tsontsin temi danda nme le terothonyu, a-yhütyü keponyu lo kepinnyu, kerügünyu, a-pha a-ben gwakemvunyu kechon-e zen a-ki ryüo khipe a-pha ka hoshü; lo a-le tsü aphu thyü ngwa shü.

³¹Tson-o temi dan le kepinnyu no jozolo, a-pha a-ben gwakemvunyu thyü ngwashü, lo terothonyu no tsonchü külo, lo a-yhütyü keponyu no thahyu kelo shwi pe anyugun dun thyülo; lo temi tsüdan le Israel nyu Sunggigü shwenla.

³²Tsükatsü Jisu le senthyükelo ju kope a-ki shülo-o, “Ale temi dan shwi njü laso; kechamvule anyugun le jonshen azen hü laso, lo thame tyütsü nrün ndi kelasi genyu; lo ale anyugun kekhün nishü nyümvu, anyugun le tson nenyu pesilalo kenshvu genyu.”

³³Tsontsin senthyükelo jule a-ka, “Ngun le dikipon tehen nyu temi hitsü laki ginthyü pe a-gin nyülo nrün, tensü hitsü laki hyulo mon?”

³⁴Jisu le ketso shü, “tensü dikho sen hü nla?” Tsontsin anyugun le, “Tsenyü, lo tsehü kesheshe keshanyu tse sen hü nle.”

³⁵Tsüselo a-le temi ju no kazü nyu bin külo lotse zoshü

³⁶Tson-o a-le tensü tsenyü lo tsehü dan tse khilo-o; Sunggigü shwen shüo boshwen pe senthyükelonyu dan tsüshü, lo senthyükelo nyu dan le khipe temi ju tsüshü.

³⁷Lo anyugun aphu tsü tyü pe a-gin nyülo; lo anyugun le tyü kensen le khvütsü tsenyü kesü khülo.

³⁸Lo anyugun tsü ketyünyu le nchetenu sinkemvu temi yie zi kho.

³⁹Lo a-le temi dan nishüla njüo run nyu yüo Magadan kipon gunla.