Read Southern Rengma Naga MATHI 16 Bible Online

MATHI 16 - Southern Rengma Naga bible

MATHI 16

¹Tsükatsü Farisinyu lo Sadukinyu ju le a-no tsangge thazansü nme thyü pe anyugun hishülo tseo ryüo a-seme.

²Ai Jisu le anyugun ka, “Ngwünki hagun le ‘Tsang gwati so; kechamvule tsangpha n-hon bin kethyü genyu,’ tson hünyo.

³Lo lonyü ko, ‘Nthu tsang le gwamvu tiso, kechamvule tsang nhon lo nnmhu tsen kebin genyu,’ tson hünyo. Hagun le tsang rüla kegwa keshvu we sha ntsenlo hünyo; ai hagun le a-gwünkho lo thazansü we shakekho loho.

⁴Serikemvu lo keyüla shenhe hidan le thazansü fü kehü gwünzin; ai Jona ge thyükeshü zansü tsünyeki thazansü kecha nme-e khinipe hagun tsüni loho so; ” Tson-o anyugun khelao tinla.

⁵Tsüsika senthyükelo ju le perezin külo, lo anyugun tensü khilo nmhinla.

⁶Tsükatsü Jisu le anyugun ka, “Hagun Farisinyu lo Sadukinyu ju kebu genyu petsü lo ndo binlo.”

⁷Tsontsin anyugun le kenthon-o, “Tsüle kechamvule ngunle tensü khilo nmhin kela genyu le,” tsonso.

⁸Ai Jisu le tsü shalo njüo, “Hire, hagun ketenyen kerho ju! Hagun le tensü khilo kemvu genyu nyuthyüo zobin nla? Hagun le ntsokhin-e tha rüchünlo mvu zun ole?

⁹Tensü pvü pvün pe temi yie pvün ginthyü shüo hagun no a-sen khvütsü dikho kesü khülo la?

¹⁰Lo tensü tsenyü pe temi yiezi ginthyü shüo hagun no a-sen khvütsü dikho khülo la?

¹¹Hagun le tsüe hagun sirüchün mvu ole? Hagun ale hagun ka tensü rüla zobin kemvu, hagun le tsüe rüchün bin mvu kethyü, nyuthyüo hon hü nla? Ai hagun Farisinyu lo Sadukinyu kebu kipon hagun petsüsa bin lo chi!”

¹²Tson keshü siki anyugun le a-le anyugun no tensü kebu kipon mvule Farisinyu lo Saddukinyu senkethyü jo genyu ndo sa bin lo lotse kezo rüchünlo.

¹³Tsüsika Jisu le Kaisaria Filipi kipon gun gü a-le a-senthyükelo ju ketso-o, “Temi dan le Temi Nyugü lope segü letse hü nla?”

¹⁴Tsontsin anyugun le a-ka, “Johan Baptist gü letse; peha le Elia letse, lo kechanyu le Jeremiah, nmvue sidyükeshanyu ju nme letse hünyo.”

¹⁵Tsontsin a-le anyugun ka, “Tsonlo hagun we ale segü letse hü nla?”

¹⁶Tsükatsü Simon Pitor le a-ka, “Nle Khrista rhünzin kehü Sunggigü Nyugü le.”

¹⁷Tsontsin Jisu le a-ka, “Nle Jona nyugü Simon, nle jochü kepvü ketsin; kechamvule thyümin kendo kipon mvule tsangge kebin Apvü le a-npvü johi zope ntesha shü kethyü genyu.”

¹⁸Lo ako nka zoshü ti. “Nle Pitor, (A-kon le Tso), lo ale tso higü ge akehun thyü ti; lo Hades chwida no a-nye kvu loho.

¹⁹Ale tsangge Rajaphen chabi dan pe ntsüti; lo nle kazü nyu lihie khinlalo, tsangge-e khinla ti lo nle kazü nyu lihie khinshe shülo, tsangge-e khinshe shüti.”

²⁰Tsükatsü a-le senthyükelo ju ka, A-le Khrista gü letse kethyü tsü lope temi nme ka zo nya lotse la.

²¹Tsügerho nyu a-le Jerusalem nyu gun-o peshünyu lo peshükeda ju lo lesü keshatsin ju ben nyu kenjünthyü pe thaseni kerüchün thyüti, lo meno a-dushvu lao jonshen nyü rhünni solo mvuloshvu tsekethyü zope senthyükelo nyu hiso.

²²Tsontsin Pitor le a-zen gü a-kesüo, “Npugü, nno tsonlo shvu tsinle, nno thame kae hihontse thyü loho le.”

²³Tson-e a-le ranigü Pitor ka, “Nle asi kipon gü lalo; ‘Satan,’ nle atson kekhin nme, kechamvule nle Sunggigü denzin mvule temi denzin rüchün kehü genyu.”

²⁴Tson-o Jisu le senthyükelo ju ka, “Temi ligü higüe asithen kenyünyu no a-npvü a-kekhenilo lo a-krus pen-o A sithenlo.

²⁵Kechamvule temi ligü higüe a-phou ntsen pe a-hon thyülo nyü kehünyu le nmhenla ti; lo temi ligü higüe agenyu a-phou nke nmhüla kehünyu le tsü hyunilo nrün genyu.

²⁶Lo temi nme le kazü aphu chwipe a-hon thyüloe a-le a-kapu nkelalo a-le nyu chwilo mon? Tsüntimvule temi le nyu lope a-phou sunthyü logwa tila?

²⁷Kechamvule Temi Nyugü le A-pvü zankechwi sen-o a-lokethyünyu zen tsüryü ti; lo a-le temi ligü higu"e a-tho hontse a-chün thyü pe tsü nrün genyu.

²⁸Lo ale hagun ka zo tsentsü shüti, ‘Hika kebin temi peha le Temi Nyugü le a-raja nyu keryü mhundyü sila loho.’ ”