Read Southern Rengma Naga MATHI 17 Bible Online

MATHI 17 - Southern Rengma Naga bible

MATHI 17

¹Lo jon tsero siki Jisu le Pitor, lo Jakob,lo tsügü sikezengü Johan nyugun pe a-sinlo njüo tsüdan zen kecha thyü sen-o kazüthun ketetso nme ge küla.

²Tson-o a-le anyugun yhühyu ka a-keyhun no kecha thyüla, lo a-mhun le yhüko hontse benchvüla, lo a-phinya ko chon pe keben hontse la.

³Tson-o hire, Mosa lo Elia au le tsünyu ryüo anyugun yhühyu ka a-zen kenthon.

⁴Tsontsin Pitor le Jisu ka, “Npugü, ngun kengüo hinyu bin yatselo gwati le; Nkendo yatselo, ale hinyu hi then kenshen thyü shüti, nme le n genyu, nme le Mosa genyu, lo nme le Elia genyu.”

⁵Lo a-le jozo nsen ketseka hire, nmhu benchvü tsekethyü sü ryüo anyugun jepvülo; tsükatsü hire, nmhu tsüge tha zo keryü le hihontse: “Higü hile A nyu A kesogü le, Ale a-shwi pe a kenyü sa kehügü le; hagun a-jo nyülo nye,” tsonshü.

⁶Lo senthyükelo dan le jo tsü shalo ntsin chetsügü kazünyu nkhün kü tinla; lo nshvusa la.

⁷Lo Jisu le ryüo anyugun kesüo, “Soryü lo, lo nshvunya chi.”

⁸Tsontsin anyugun le anyugun yhütyü koshü ntsin Jisu nti anyugun zen kebin a-me temi nme-e hyu mvula.

⁹Tsüselo anyugun le kazüthun ge tsenryü kezhü ka Jisu le anyugun ka Temi Nyugü le kesinyu dan nyu rhünni solo kemvuthen hagun tha kehyu hi nme-e pe temi nme kae zo nya nye; tsonkethyü zola.

¹⁰Tsontsin senthyükelo ju le a-ketso-o, “Tsonlo nyuthyüo Elia le ryü ri mvuloshvu tsekethyü lesükesha tsin ju le zohü nla?”

¹¹Tsontsin a-le anyugun ka, “Elia le ryüo tha aphu thyü kegwa thyüni shüti ketsin.

¹²Ai ale hagun ka zoshü ti, Elia le himhundyü ryü laso, lo tsüka mele a-shalo mvula; ai a-ge anyugun kendo dan thyüla. Temi Nyugüe tsühontse anyugun ben ka kenjün thyü ti.”

¹³Tsüsiki a-le Johan baptist gü rüla anyugun ka zokeshü senthyükelo ju le rüchün lo.

¹⁴Tsüselo anyugun le me dan nyu ryü ntsin temi nme le Jisu ki ryüo a-mhundyü ka khosenlo njüo,

¹⁵“Npugü, Nle anyugü shwinjün shü lo; kechamvule a-le zoma thyüo kenjünthyü kebin genyu, lo a-le ntsoka tse mah nyue chetsüla kvuri, lo ntsoka tse zü nyue yüla la tse kehü genyu.

¹⁶Lo ale a-zen-o nle senthyükelo ju ki gun, ai anyugun le thyü ngwa loho laso,” tson.

¹⁷Tsontsin Jisu le annyugun ka, “Hire, joketsin zokemvu lo hagun nyun nshün kemvu ju, A no jon ditsü dithen laki hagun zen bin tila? A no jon dikho hagun ge akekheni bin tila? A-zen-o hika ryüo akishü re.”

¹⁸Tson-o Jisu le tero gwakemvu gü kesüshü, tsontsin tsüle a-ge chwila; lo tsükanyu ponyu gü thyü ngwa whü tselo la.

¹⁹Tsüsika senthyükelo ju npvü Jisu ki ryüo a-ka, “Agun we nyuthyüo a-hü loho la ola?”

²⁰Tsontsin a-le anyugun ka, “Hagun ketenyen kerho genyu le. Ale hagun ka zo tsentsü shüti, hagun ketenyen le hennyon tsi tsülaki-e binlo kethyü we, hagun le kazüthun higü ka, ‘Nle hinyu ketu sen-o luki gülalo!’ tsonshüe a-le tin lati; lo hagun le thame thyülo keho ndi lati.

²¹Ai kehi lo tyütsü mvuo nyen kethyü nti genyu hihontse ketyü hi hülo hünyo; thakecha nme genyu honlo hümvu.”

²²Tsüselo anyugun le Galil nyu kebin ka Jisu le anyugun ka, “Temi Nyugü tenpe me ben nyu shüla ti.

²³Tson-o meno a-dushvu lati; lo a-le jonshen nyü rhünniso lati.” Tsontsin anyugun le anyugun nyun gwamvu sa lola.

²⁴Tsükatsü anyugun le Kapernaum nyu ryülo, lo duli keshvu shvukequen kehü ju le Pitor ka ryüo, “Hagun senkethyü gü le duli keshvu shü hü le mvula,” tson-o ketsoshü.

²⁵Lo a-le. “Ele, shü hünyo,” tsonshü. Tson-o a-le kanyu yüryü ntsin Jisu le a-ka, “Simon, kazü hinyu rajanyu le senyuka a-ngun nmvue khajana lohü nla? Phennyünyu ka le tesin ka la?”

²⁶Lo a-le, “Tesin kale,” tsonshü ntsin Jisu le a-ka, “Tsonyatselo phennyünyu we tha hoshü mvue gwa ado tsüle.”

²⁷Ai anyugun no shesela lo keshvu genyu nle züda ki tsüo zü nyu hükhuvü shweshü chi! tson-o tsehü nsülo kerigü mün nyu nle raka nme hyulo ti; lo tsü khipe nnyi genyu tsüdan tsüla nye, tsonshü.