Read Southern Rengma Naga MATHI 2 Bible Online

MATHI 2 - Southern Rengma Naga bible

MATHI 2

¹Herod raja gwünkho ka Judia lojvü nyu Bethlehem rünyi nyu Jisu nnyu kelo ka, hire, yhüko kechwi kipon thakeshanyu ju mele Jerusalem nyu ryüo,

²“Judanyu raja gü tsü le dikipon nnyu bin nla? Kechamvule agun le yhüko kechwi kipon a-shyenyu hyulo-o a-rüshvu titse ryü kebin genyu,” tson ketso shü.

³Tsüselo Herod raja le jo tsü shalo njüo a-ko lo Jerusalem nyu aphu anyugun nyu keyhunkerun kü lola.

⁴Tson-o Herod le peshükeda ju lo temi dan nyu thakesha tsin ju ko kequenlo njüo, “Khrista gü tsüle dikipon nnyu titse hü nla?” tson-o ketso.

⁵Tsontsin anyugun le a-ka, “Judia kazü Bethlehem nyu ti.” “Kechamvule sidyükesha gü le hihontse thu kenjü genyu:

⁶‘Judia kazü nyu Bethlehem, nle Judia nyida keda ju dan nyu keshen tsingü mvuso; kechamvule n-ge kedanyu nme le soryü ti lo tsügü le atemi Israel nyu kekhwe güthyü nrün genyu.’ ”

⁷Tsontsin Herod le kebuo thakesha tsüdan kolo njüo shyenyu chwikeryü tsüle jon dikhola seyo tsekethyü anyugun ka sha tsentsülo.

⁸Tson-o a-le anyugun nipe Bethlehem ki shüo, “Gungü nyu tsügü rüla sha tsentsülo njüo a-hyulo ako no gungü a-rühvu nrün genyu aka zoshü nye.”

⁹Lo anyugun le raja gü jo shalo njüo tsonchüshü ntsin, hire, yhüko kechwi kipon anyugun le shyenyu kehyu gü tsüle anyugun mhundyü gun gü nyu tsü gü bin tilo njüo tsü so ntsenka sunlola.

¹⁰Lo tsükatsü anyugun le shyenyu tsü shwipe anyugun sherhün rila.

¹¹Lo anyugun le ka tsünyu yü ntsin Nyu tsügü le a-jvü Maria zen bin-o hyulo, tsüselo anyugun le khosen tsügü Jisu rüshvu; tson-o anyugun thajwen shwülo njüo, suna, nshünchün, lo a-rünkegwa zü ko tse khipe a-tsüshü.

¹²Tsüselo anyugun no Herod ki nigun mvu nrün genyu anyugun minki Sunggigü kendo shalo njüo tson kecha zen-o anyugun rünyi ki nigun la.

¹³Lo anyugun le tinla ntsin, hire, Josef minki Npugü lokethyünyu nme le ryüo, “Nle solo njüo Nyugü lo a-jvü au zen-o Ijipt ki gunlo nye, lo ale nka zoshü kemvuthen nle tsünyu bin tse nye; kechamvule Herod le nyugü dushvula titse fü kehü genyu,” tson.

¹⁴Tsontsin a-le khejeki solo njüo nyugü lo a-jvü au zen-o Ijipt ki gunla.

¹⁵Lo Herod le sila kemvuthen tsüki bin tinla. Npugü le sidyükeshanyu mün nyu, “Ale Ijipt nyu A nyu kolo,” tson kenjü jo tsüno penlo nrün genyu.

¹⁶Tsükatsü Herod le thakeshanyu dan le a-sakela shalo njüo a-kenyumvu sala, tson-o thakeshanyu dan ka a-gwünkho sha tsentsü kelo hontse me nipe Bethlehem lo tsüte tsümhun kebin aphu nyu pechenyu chenhvu nyu lo tsühensin aphu dushvu küla.

¹⁷Tsühontse Jeremiah sidyükesha gü le zo kenjü tsü thyü penlo:

¹⁸“Rama nyu thakhwen nme sha, chü lo chechüsa. Rachel no a-nyenyu chechü, tson-o tsüdan ndi kela genyu a-no a-nyun bwenlo mvula.”

¹⁹Ai Herod le sila ntsin, hire, Ijipt nyu Josef minki Npugü lokethyünyu nme le a-ki gunryü,

²⁰lo tsügü le, “Nle so-o Nyugü lo a-jvü au zen-o Israel nyu kazü ki gunlo; kechamvule Nyugü dushvula titse kehügü le si laso.”

²¹Tsüselo Josef le so-o Nyugü lo a-jvü au zen-o Israel nyu kazü ki gunla.

²²Ai Arkela le a-pvü Herod sunthyüo Judia kazü nyu raja thyü kebin shalo-o a-le tsünyu bin nshvula. Lo tsükatsü a-minki Sunggigü kendo shalo njüo Galil kazü ki nigunla.

²³Tson-o gun gü Nazaret tsekethyü rünyi nme nyu bin tinla; lo tsüle, a-no, “Nazaretnyu tseti,” tsonkethyü sidyükeshanyu le zo kenjü no penlo nrün genyu.