Read Southern Rengma Naga MATHI 20 Bible Online

MATHI 20 - Southern Rengma Naga bible

MATHI 20

¹“Lo tsangge Raja kethyü phen tsü le temi nme le meno a-vain low nyu tsügü thathyülo tseo lonyü nshwen tsügü me jonshe kelo hontse.

²Lo Tsükatsü a-le doli pe tsüti tseo me zen kenthon-o tsüdan nipe a-vain low ki shüla.

³Tson-o tegi tekü kevü gwünkho ki-e a-le gungü temi dan me le hakethyü bin nyu thathyümvu tse dun kebin hyulo.

⁴Lo a-le tsüdan ka, ‘Hagun ko a vain low ki tsüta, tsonlo ale hagun chün kho lope hagun tsüti le,’ tsonshü. Tsontsin anyugun le tsüla.

⁵Tsüsi ki-e a-le tegi tseryü kenyhun che kevü ki lo tegi kenshen kevü ki-e tse nichwi gü tsonshü.

⁶Lo tegi pvün kevü gwünkho ka ko nichwigü temi kechanyu dan me le kebin hyulo; tson-o tsüdan ka, ‘Hagun le nyuthyüo thathyümvuo jongwün hika dun bin nla?’

⁷Tsontsin anyugun le a-ka, ‘Agun jonkeshe temi kendi genyu le.’ Tsügenyu a-le anyugun ka, ‘Hagun ko a vain low ki tsü nye.’

⁸“Tson-o khejeki low npugü le a-gogü ka, ‘Low nyu thathyü kebin dan koshüo, low nyu tsü kekhin tsin dan ka gun gü tsükeri tsin dan keti anyugun chün pe tsüshü nye.’

⁹Tsontsin khejeki tegi pvün kevü ki ko kelonyue ryüo doli hyulo.

¹⁰Tsüsika keritsin ju le ryüo anyugun we me nye chon hyulo ti ado tse ryü; ai anyugun ko me hontse nme le doli hyulo.

¹¹Lo anyugun le tsü hyulo ntsin a-npugü ge kenyo lola, tson-o a-ka,

¹²‘Kekhin hidan le tegi kevüja nme nyesin thathyü mvu, lo agun we jongwün tsang kenyen ka kenjünthyü thatho thyü-tson-e nle khipe agun ketsü kho khipe anyugun ko tsü laso!’

¹³“Ai a-le anyugun nme ka, ‘Apvügü ale nge a-zükemvu nme-e thyümvu amon? Nle nnyi doli nme titse kejozenlo mvu ole?

¹⁴Nhon tsü khilo njüo gunla, nketsü kho pe kekhin hidan tsüti letse kethyü a kendo.

¹⁵Ale a npvü ahon pe akendo kethyü le a-zümvu ole? Ale nho kethyü genyu nle a shwi pe nyhü kelu hü ole?’ ”

¹⁶Lo Jisu le jo kenkhin zo-o, “Tsühontse kerinyu le khin lati, lo kekhinnyu le rila ti.”

¹⁷Tsüselo Jisu le Jerusalem nyu gun kezhü ka senthyükelo tseryü kenyhunche ju zen kecha thyü kehü ka a-le tson nyu anyugun ka,

¹⁸“Hire, ngun Jerusalem nyu gunzhü nyo; lo gun ntsin mele Temi Nyugü ten pe peshükeda ju lo lesükeshatsin ju ben nyu shüla ti; tson-o anyugun le a-nkhin-o a-dushvula lotse soti.

¹⁹Lo a-khipe keyüthyü lo a-vü lo a-khipe krus ge hüla lo tse-o a-ten pe Sunggigü shakemvunyu ben nyu shüla ti; lo a-le jonshen nyü rhünniso lati.”

²⁰Tsükatsü Zebedi nyu hvu jvü le a-nyuhvu zen ryüo a-rüshvuo tha nme hi.

²¹Tsükatsü a-le tenunyu tsügi ka, “Nle nyu hinyü hü nla?” Tsontsin tsügi le a-ka, “Nle nraja bin nyu anyuhvu nme no nnjüzin lo nme no n ngwazin tse bin kelo njo hoshüta; ” tsonshü.

²²Ai Jisu le a-ka, “Hagun le hi kehügü shamvu tse hi hünyo. Hai le ahonpen nyu Ale tsüti tse ndo sen kebin gü tsülo gwa mon?” Tsontsin au le a-ka, “Ayi le tsü thyülo gwa.”

²³A-le au ka, “Hai le ahonpen nyu tsülo gwa ketsin; ai a njüzin lo a ngwazin bin kelo we a npvü khishü mvule Apvü le a-npvü ndo sen kebin nyu tsüti.”

²⁴Lo tsüka mi tseryü dan le jo tsü shalo ntsin anyugun le tsa sikezen tsühvu ge anyugun nyun ntala.

²⁵Ai Jisu le anyugun kozen-o a-ki ryülo njüo anyugun ka, “Me kentsen nyu le me sogon hünyo. Lo kekvunyu no anyugun so kedagü thyü kehü hagun le sha bin nyo.

²⁶Ai hagun dan nyu we tson loho; tsonkethyü gü mvule hagun dan nyu temi ligühigüe gon kenyü gü le hagun go thyüti.

²⁷Temi ligühigüe hagun dan nyu ri kenyü gü le hagun gonyu thyü mvuloshvu.

²⁸Tsühontse Temi Nyugüe meno a-leyi titse mvule me keleyinyu thyü titse lo temi kechon rhinhilo nrün genyu a-phou hoshü titse tsükeryü genyu.”

²⁹Tsüselo anyugun le Jeriko nyu chwi kezhü ka temi danda nme le a-sithen hü.

³⁰Tsükatsü yhükeponyu mihvu le tsonkhoka bin tse njüo Jisu le tsü denzin gunzhü nle tse kethyü shashüo nra sen-o, “David Nyugü! Nle ayi shwinjün shüta!”

³¹Tsontsin temi ju le au no nra nyalo tseo au kesü, ai au le nra sen ketsinni-o, “David Nyugü! Nle ayi njün shüta,” tson bin.

³²Tsüka Jisu le sunlo njüo au ko-o au ka, “A no hai ge nyuthyü keshü hai kendo la?”

³³Tsontsin au le a-ka, “Npugü, ayi yhütyü no tha hyulo ta.”

³⁴Tsügenyu Jisu le au njün-o au yhütyü kesüshü; tsontsin au yhütyü le ko chwiryülo, tson-o au le a-sithen tinla.