Read Southern Rengma Naga MATHI 21 Bible Online

MATHI 21 - Southern Rengma Naga bible

MATHI 21

¹Tsüselo anyugun le Jerusalem nyu ryü ntsin Oliv kazüthun ge Betfage nyu ryülo; tsükatsü Jisu le senthyükelo nyu mihvu nishüo au ka,

²“Haile gungü rünyi hai ntsun kebin nyu gunlo ntsin mele gada tsü nme lo a-nyu nme sin tse dyü pe bin kenjü hyulo ti; tsügenyu tsühvu shwü sen-o aki ryü nye.

³Lo me le hai ka tha zoshülo, hai le me ka, ‘Npugü le hihvu hi pe tha nme thyü titse bin nle,’ tsonshü nye. Tson yatselo temi tsügü le tsühvu hoshü ti.”

⁴Tsonlo sidyükeshagü no nduka, zope bin kenjü penlo nrün genyu:

⁵“Hagun le Sion nyugi ka zoshü nye, Hire, n Rajagü le a-jvü gwasa tseo, Gada lü nme, a-kon le gadanyu lü nme ge küo nki gunryü zhü nyo.”

⁶Tsontsin senthyükelo tsühvu le gungü Jisu le au ka zo keshü hontse thyülo.

⁷Tson-o au le gada tsü lo a-nyu hvu nrhisü zen ryüo, anyugun phi pe gada hvu ge lashü ntsin; a-le kügü tsü ge binlo.

⁸Lo temi kechon le a-phi shü pe tson nyu lashü; lo kechanyu le senbin ge a-ro nti pe tson nyu lashü.

⁹Tson-o temi dan le a-mhundyü kehü ju lo a-sizin kehü ju tse nra sen-o, “Hosana, David Nyugü, Npugü zan sen ryü kezhü gü, Jochü kepvü ketsin gü, tsangge jochü no nge ryü kelogü thyü lota.”

¹⁰Tson-o a-le Jerusalem nyu ryülo ntsin rünyi tsü aphu ntun nbün lola. Temi dan le shün-o, “Temi higü hile segü yo?”

¹¹Danda dan le anyugun ka, “Hile Galil kazü nyu Nazaret nyu sidyükeshagü Jisu le.” tson.

¹²Jisu le Sunggigü Kershvuka nyu yüo tha hei lo tha gwen kebin hyulo-o tsü aphu hüla, lo seki raka kelu kebin miz-e lo paro jwen kebin nyu ju bin-e boketo küla.

¹³Tson-o a-le anyugun ka, “ ‘A ka hino kehika letse ti,’ Tsonkethyü thu njü nyo; ai hagun le hilope mehon seketyünyu ka thyü bin laso.”

¹⁴Tsüka Yhükepo ju lo phuhanyu le gunryüo a-le thyü ngwashü.

¹⁵Tson-o peshükeda dan lo lesükeshatsin dan tsele a-le thyükeshü ndun tho dan, lo ntsenyu dan le Kershvuka nyu sen-o, “David Nyugü no kvukelogü thyülo,” tson kehü-e shwipe anyugun nyun ntao a-ka,

¹⁶“Nle hidan le tha zokebin hi sha ado?” Tsontsin Jisu le anyugun ka, “E, ‘ntsenyu ju lo nyuhonyu ju mün nyu-e nkeshwen penti,’ tson kethyü nduka thu kenjü hagun le thame kae swüshwi mvu zun ole? ”

¹⁷Tson-o Jisu le nyida tsünyu anyugun khela njüo Bethani nyu gun-o tsüje tsünyu zhü tinla.

¹⁸Lo Lonyü gü a-le nyida gü nyu niryü kezhü ka, nnyon la.

¹⁹Lo tsonkho ka Kherobin nme le kebin hyulo njüo a-le tsünyu gun, ai tsüge tsü a-nyü nti a-me thame hyulo mvula; tsontsin a-le tsügü ka, “Nthu gerhonyu kethonthen nge nsha nyala gwün nye.” Tsonshü ntsin kherobin gü tsüle rügu la.

²⁰Tsontsin senthyükelo ju le tsü shwi pe anyugun dun thyülo njüo, “Kherobin le nyuthyü rügu whü layo?”

²¹Tsontsin Jisu le anyugun ka, “Ale hagun ka zo tsentsü shüti, hagun ke kenyunhvu la mvuo hagun ketenyen binlo, hagun le kherobin ge hihontse kelo ntimvule hagun le kazüthun higü kae ‘Nle tin-o züda ki yülalo,’ tsonshü-e tsü thyülo ti.

²²Tsüntimvule hagun le tenyen tsentsüo tha lihie hilo hyulo tsentsü ti,” tsonshü.

²³Tsüsika Jisu le yügü Kershvuka nyu me senthyü ketse ka peshükeda ju lo temi dan nyu pelü ju le a-ki ryüo, “Nle nyu kekvu sen-o tha hi thyülo hü nla? Lo segü le kekvu hi khipe ntsüshü la?”

²⁴Tsontsin Jisu le anyugun ka, “A ko hagun ka tha nme ketso ti, lo hagun le tsü pe aka zoshülo, a ko hagun ka nyu kekvu sen-o hithyülo hüyo zoshüti.

²⁵Johan le me Baptaiz thyülo kegwa kekvu tsüle dikipon ryü la? Tsangge le, temi ka ryü la?” Tsontsin anyugun npvü kenthon-o,“Tsangge letse zoshülo, a-le ngun ka, ‘Tsonlo hagun le nyuthyüo a-tenyen mvu ola?’ tsonla ti.

²⁶‘Temi kanyu ryü le,’ tsonshülo ngun le temi dan nshvu; kechamvule temi aphu Johan le sidyükeshanyu nme letse hünyo.”

²⁷Tsontse njüo anyugun le Jisu ka, “Agun le shamvu,” tsonla. Tsontsin a-ko anyugun ka, “A ko shamvu, nyu kekvu sen-o tha hithyülo hüyo pe hagun ka zo loho.

²⁸“Ai hagun nyu ki nyu rüchün hü nla? Temi nme le a-nyu le pechenyu mihvu le bin; a-le kerigü ka ryüo, ‘A nyugü, nle nthu vain low ki tsünye,’ tsonshü.

²⁹Tsontsin a-le, ‘Ale tsü loho,’ tsonla; ai tsüsiki a-nyunkelulo njüo tsüla.

³⁰Lo a-le kechagü kako gun gü tsühontse zonishü, lo tsü gü le a-ka, ‘Ale tsüti, apvü,’ tsonshü njüo tsümvula.

³¹Kha, tsühvu digü le a-pvü kenyü thyüshü la?” Tsontsin anyugun le a-ka, “Püshü gü le.” Tsontsin Jisu le anyugun ka, “Ale hagun ka zo tsentsü shüti, khajana keshvunyu ju lo keyüla chün ketyü ju le hagun mhundyü rio Sunggigü keda nyu yü lati.

³²Kechamvule Johan le kentsen tson zen-o hagun ki ryü, ai khajana keshvunyu lo keyüla chün ketyünyu ju le a-tenyenlo; lo hagun le tsü hyu-e hagun nyunkelulo-o tenyenlo mvula.

³³“Jokejvü kecha ko nyülo ta,” Jisu le zo. “Nduka temi nme le vain low nme tsülo, tson-o chwi thyü pe hunlo, tsüselo tsünyu vain zü kethün bin nme tsolo, tson-o rikhun bin khwenshü njüo pe lowketsünyu dan me tenyenla njüo rünyi kecha nme ki günla.

³⁴Tson njüo a-tho tsüle a-sha nsha kelo gwünkho penlo ntsin tsü hyukelo rüchün-o a-gonyu dan me nipe lowketsü tsüdan ka shü.

³⁵Tsüselo lowketsü tsüdan le nme tenlo njüo vü lo kechanyu nme dushvula.

³⁶Lo tso pe nme jonla, ai a-le akerigü nyeki chonkvu kethyü a-gonyu dan me ni nishü, lo tsüdan ge-e anyugun le tsühontse thyüni la.

³⁷Tson-e a-le kekhin ki we a-le a-npvü a-nyugü nipe tsüdan ki shüo, ‘Anyugun le anyugü we rühvulo ti ado,’ tsonso.

³⁸Tson-e low ketsü tsüdan le Nyugü hyushü ntsin anyugun npvü kenthon-o, ‘Higü hile Nyutsingü so, je, ngun a-dushvula njüo a-kenya aphu pe ngun hon thyülo tile nu!’

³⁹Tson-o anyugun le a-tenlo-o süketo sen chwigü vain low kepen ki shülo njüo dushvula.

⁴⁰“Tsügenyu vain low npugü le ryüo anyugun ge nyu thyüshü mon?” Jisu le tsonshü.

⁴¹Tsontsin anyugun le a-ka, “A-le temi serikemvu tsüdan nke nmhüla ti, tson-o vain low khipe a-gwünkho ka a-sha khipe a-tsüshülo kegwa temi kechanyu tsüla ti.”

⁴²Tsontsin Jisu anyugun ka, “Hagun le nduka ketsinlesü nyu, ‘Ka kethyünyu le khekela tsogü, me le tsülope a-qün ka mvulokeshvu tsingü thyülo laso. Tsüle Npugü le thyüshü lo nyhühyu ka ndun thyü!’ Tson thu kenjü swüshwi mvu zun le?

⁴³Tsügenyu ale hagun ka zo tsentsü shüti, “Hagun ka Sunggigü Raja gü tsü selo njüo khipe a-sha nshalo kegwa temi dan me tsü lati.

⁴⁴Lo temi ligü higüe cheo tso tsügü so ketsünyu le jonshwe jonren lati, lo a-le cheo temi ligü higü soge tsü-e tsünyu le nnyon kenphü hontsela ti.”

⁴⁵Peshükeda ju lo Farisinyu ju le a-jokejvü tsü shalo njüo, a-le anyugun rüla zo letse kethyü rüchünlo.

⁴⁶Tson-o anyugun le a-tenlo titse ndo so, ai temi dan le Jisu le sidyükeshanyu nme letse tenyen kehü genyu tsüdan nshvula.