Read Southern Rengma Naga MATHI 22 Bible Online

MATHI 22 - Southern Rengma Naga bible

MATHI 22

¹Lo tsüsika Jisu le jokejvü dan me pe tsüdan ka zoni.

²“Tsangge keda le Rajanyu nme le a-nyu no tenulo-o me zen-o ho kethyü a-keme.

³Tsükatsü a-le gonyu dan me nipe no senhü keho nyu ryülo tseo ko pe bin kenjü dan koshü; ai anyugun le ryü nyü mvula.

⁴Tsontsin a-le go kecha dan me nishüo anyugun ka, hagun gungü ko pe bin kenjü ju ka, ‘Hire, ale keho gü ndo penlo laso; athu tse, lo a senru aphou kegwa dan boshvu njü so; tson-o tha aphu ndo penlo laso; tsügenyu hagun senhü keho nyu ryülo gwünlo, tsonshü gwün nye,’ tsonshü.

⁵Ai anyugun le jo tsü rüchün kenshenlo njüo anyugun npvü anyugun kendo ki tin küla, temi nme le a-low kitsüla, kechanyu nme le a-npvü a-hathyü gunla.

⁶Lo a-sen ju le a-gonyu dan tenlo njüo anyugun dushvula.

⁷Tsontsin Raja gü tsüle a-nyun ntalo njüo me dukeshvu tsüdan nkela, lo anyugun rünyi-e rola.

⁸Lo tsüsika a-le a-gonyu dan me ka, ‘Senhü keho ndo pe bin laso; ai kope bin kenjü dan le ryülo kümvu laso.

⁹Tsügenyu hagun tsoncho nyu gungü temi hyukelo aphu no senhü keho hinyu ryülo tse zoshü nye.’

¹⁰Tsontsin a-gonyu dan le gungü tsoncho tsonda nyu kegwa keshvu hyukelo aphu ko zen ryüo kequenlo; tson-o senhü keho tsünyu temi le ryüo sülo.

¹¹“Ai Raja gü le me ko zen gunryü kebin tsüdan nri titse chwiryü ntsin, yügü senho keho tsünyu keho phinya senkemvunyu nme hyulo.

¹²Tson-o a-ka, ‘Apvügü, senhü keho nyu phinya sen mvutse nyuthyüo yüryü bin nla?’ Tsontsin temi tsügü le jozolo nrün ndila.

¹³Lo tsükatsü Raja gü le a-gonyu dan ka, ‘Hagun a-pha a-ben phinlo njüo ten pe tegwen kezün ki shüla nye; tson-o no tsünyu chü lo a-hü keta tse bin ti.’ ”

¹⁴“Tsühontse ko kelo nyu we chonsa ai kejükelonyu we rho.”

¹⁵Tsüsika Farisinyu ju le gungü a-jo kezo nyu a-ten kelo rüchün-o kenthon.

¹⁶Tson-o anyugun le anyugun sikethen nyu nipe Herodianyu sin-o nipe a-ki shüo a-ka, “Senkethyü gü, nle joketsin zo hünyo, lo nle temi nme-e nshvu hü kemvu agun le shabin nyo; kechamvule nle nkenyünyu sha kecha thyü hü kemvu genyu.

¹⁷Tsügenyu nkerüchün gü pe agun ka zoshülo; Kaisar khajana pe ketsü le a-zü le mvula.”

¹⁸Ai Jisu le anyugun nyun serikemvu shalo njüo, “Hagun kerokon kehü ju, hagun le nyuthyüo asemen hü nla?

¹⁹Khajana pisa pe ahishülo.” Tsontsin anyugun le nme pe a-hishü,

²⁰tsüka Jisu le anyugunka, “Hile segü men la, lo segü zan le bin nla?”

²¹Tsükatsü anyugun le a-ka, “Hile Kaisar men le,” tsonshü. Tsüselo a-le anyugun ka, “Tsonlo Kaisar hon pe Kaisar tsüla, lo Sunggigü hon pe Sunggigü tsüla lo,” tsonla.

²²Tsüselo anyugun le jo tsü sha pe anyugun dun thyülo njüo a-khelao tinla.

²³Tsünyü tsü rhüni keso ndi tse kehü Sadukinyu dan le ryüo a-ketso.

²⁴Senkethyü gü, Mosa le agun ka, “Temi nme le anyenyu ndio sila yatselo a-sikezen gü no a-tsagü tsipwen yhun shülo, tson hü.

²⁵Lo nduka agun dan nyu tsa sikezen gü kethyü mi tsenyü le bin hü; lo tsüka keritsingü le tenulo-o a-tsipwen nme ndio silao a-nu khe pe a-sikezen gü tsüla.

²⁶Lo kenyhun güe lo kenshen güe tson gungü tsenyü tila.

²⁷Lo tsühontse anyugun aphu sila, lo tenugi ko sila.

²⁸Tsügenyu rhünni keso ki tenunyu tsügi le anyugun digü nu thyü mon? Tsüdan aphu a-lo kü kethyü genyu.”

²⁹Ai Jisu le anyugun ka, “Hagun le ketsin lesü lo Sunggigü joe shamvuo thyüzü kehü gwünzin le.

³⁰Kechamvule rhünni keso ki tsüle tenu-e lolo ho lo kalue loho, tson-o tsangge lokethyünyu hontse bin tinla hünyo.

³¹Lo rhünni keso rüla Sunggigü le, ‘Ale Abraham Sunggigü, lo Isak Sunggigü, lo Jokob Sunggigü le,’ tson zope bin kenjü hagun le swü mvu ole?

³²Sunggigü le kesinyu rüla kipon mvule rhünlo nrün nyu rüla kipon le.”

³³Tsontsin temi dan le jo tsü shalo njüo a-jo genyu anyugun dun thyüla.

³⁴Tson-o Farisinyu le Jisu le Sadukinyu jo nnyi kemhenla kethyü shalo njüo gungü kequenlo.

³⁵Lo anyugun dan nyu tejvü keshanyu nme le a-semen titseo a-ka tha nme ketso so.

³⁶“Senkethyü gü, tejvü nyu jo digü le jo keda tsingü la?”

³⁷Tsontsin Jisu ale tsügü ka, “ Nle nnyun aphu, lo nkeyhun aphu, lo nkerüchün aphu sen-o n Npugü Sunggigü so, lo rühvulo nye.”

³⁸Jo tsügü tsü le jo keda tsin le.

³⁹Lo tsühontse tsügü sikae, “Nle nkazonkazin so pe nnpvü nkeso hontselo chi,” tson keshü gü tsü.

⁴⁰Tejvü gü aphu lo sidyükeshanyu jo aphu jo tsühvu tsü pe a-jobin thyü kü.

⁴¹Lo Farisinyu le ryüo kequen ketseka Jisu le anyugun ka, tha nme ketsoshü.

⁴²“Khrista rüla hagun le nyu rüchün hü nla? A-le segü nyu la?” Tsontsin anyugun le a-ka, “David nyugü le.”

⁴³Lo Jisu le anyugun ka, “Tsonlo David le nyuthyüo Kapu no a-tson tsin-o a-ka, ‘Npugü’ tse a-ko hü nla? David le zo,

⁴⁴‘Npugü le a Npugü ka: Ale n shwikerüchün nyu khipe npha hensin nyu shüla kemvuthen, Nle aben njüzin binlo ta’ tson hü nla?

⁴⁵David le a-ka, ‘Npugü’ tse ko yatselo a-nyu thyü logwa ti ole?”

⁴⁶Tsontsin temi nme-e a-ka thame zolo nrün ndila; tsüntimvule tsünyü gerho nyu temi nme-e a-ka tha ketso sin nshvula.