Read Southern Rengma Naga MATHI 23 Bible Online

MATHI 23 - Southern Rengma Naga bible

MATHI 23

¹Tsüselo Jisu le temi dan ka lo senthyükelo ju ka.

²“Lesükeshatsin ju lo Farisinyu dan le Mosa bin ge bin hünyo.

³Tsügenyu anyugun le tha lihi zoshüe tsü thyü, lo zenlo; ai anyugun tho hontse kethyü we thyü nya, kechamvule anyugun le kezo we zo hünyo; ai thyü hü kemvu genyu.

⁴Tson ketsin, anyugun le khvü kensu lo me no pvü solo keho tsü khipe me buthun ge shü hünyo; ai anyugun npvü we anyugun zenkero-e pe bokenu-e shü hümvu.

⁵Lo me no hyu nrün genyu; anyugun le tha lihie thyü kehü gwünzin. Anyugun le ketsin lesü nyu jo thu pe anyugun senpvü nmvue anyugun buthun ge shüpvü hünyo, lo anyugun phishwen-e thyü pe tseyho sen hü nyo.

⁶Lo keho nyu gun kethyü ka, kedanyu bin nyu, lo sinagog ka nyu-e bin kegwa dan tsüle anyugun kenyü hünyo.

⁷Lo hakethyü bin nyu me no anyugun kelu kethyü tsüle anyugun kenyü hünyo; lo meno anyugun ka, ‘Rabi’ tsekethyü anyugun kenyü hünyo.

⁸Tson-e hagun we me no hagun ka, ‘Rabi’ tse ko nya nye; kechamvule hagun senkethyü gü le nme nti, lo hagun we tsa sikezen nyu nti genyu.

⁹Lo kazü hinyu we temi nme-e no hagun ‘Pvü’, thyü nya nye; kechamvule tsangge kebin gü nti hagun Pvü genyu.

¹⁰Tsüntimvule me no hagun ka, ‘Senkethyü gü’, tsekethyü zo nya nye; kechamvule Khrista nti hagun senkethyü gü genyu.

¹¹Lo hagun dan nyu kedagü no hagun lokethyü gü thyü ti.

¹²Lo temi ligü higüe a-npvü a-thyü pe gon kehü gü thyü pe shen lati; ai temi ligühigüe a-npvü a-thyü pe shen kehügü thyü pe gon shüti.

¹³“Lesükeshatsin ju lo Farisinyu dan, hagun kerokon kehü ju, hagun le me no tsangge keda nyu keyü khin pvü kebin genyu hagun we chi thyülo tiso! Kechamvule hagun le hagun npvüe yülo-e hümvu lo yüti tse kebin nyue no yü hü kemvu genyu.

¹⁴Hagun lesü keshatsin nyu ju lo Farisinyu, hagun kerokon kehü dan, thyülo tiso! Hagun le maginyu ka khintyü hü nyo, lo me no hyu nrün genyu kehi thyü thonsa hünyo, higenyu hagun shaja no rükvu ti!

¹⁵“Lesü keshatsin nyu lo Farisinyu, hagun kerokon kehü ju, hagun we chi, thyülo tiso! Kechamvule hagun le temi nme-e no Juda nyu jvü zenlo titseo züda nyu lo kazünyu tse ho hünyo; tson-o no shalo yatselo hagun le thyü pe no hagun jünhvu kho, kentsuntsin gü ki shüla kehü genyu.

¹⁶“Hagun jvü nyu, ‘Temi ligü higüe Kershvuka gü zo-o swelo tha kon nme-e ndi tse hünyo; ai temi ligü higüe Kershvuka nyu suna gü zo-o swelo temi tsügü le tha nme thyü laso,’ tson kethyü zo hü nyo.

¹⁷Hagun kepin nyu ju lo a-yhütyü kepo ju, kha, suna gü le suna gü thyü nshünlo kelagü, Kershvuka gü, tsühvu digü le gon la?

¹⁸Tsüntimvule, ‘temi ligü higüe kershvubin gü zo-o swe-e tha me mvu; ai temi ligü higüe tha khipe tsüge rüshvu keshü gü zo-o swelo a-le tha nme thyü laso,’ tson hü nyo.

¹⁹Hagun yhütyü kepo ju; tha khipe rüshvu kebin kanyü gü le, tsüdan thyü nshünlo kehü kershvubin gü, tsühvu digü le gon la?

²⁰Tsügenyu temi ligü higüe kershvubin gü zo-o swelo, tsügü lo tha tsü soge kebin aphu zo-o swe kü laso.

²¹Lo temi ligü higüe Kershvuka gü zo-o swelo tsügü lo tsünyu kebin Sunggigü sin-o zo pe swe laso.

²²Tsüntimvule temi ligü higüe tsangge zo-o swelo, Sunggigü Raja bin lo tsüge kebin güe zo-o swe laso.

²³“Lesü keshatsin nyu ju, lo Farisinyu ju, hagun kerokon kehü dan, hagun we chi, thyülo tiso! Kechamvule hagun le nyeju lo rivü lo sahü tse jüntseryü thyüo jünme khishü hünyo; ai tejvü nyu we tsüdan nyeki jo keda ju, njü, tsentsü, shwikenjün, lo ketenyen khe kü laso. Ai hagun le hidan-e thyülo zenlo zü, lo lidan-e khela zümvu.

²⁴Hagun yhütyü po-o tson tsin pe me zen kehü ju, hagun le tekhvü we thonlo hünyo, ai ut we nyilo la hünyo!

²⁵“Lesü keshatsin nyu lo Farisinyu dan, hagun kerokon kehünyu ju, hagun we chi, thyülo tiso! Kechamvule khun lo honpen a-soki we sü nshünla hünyo, ai a-nyuki we me kesükedün ketyü lo tha tyütsü kenyü tse pe süpvü kehü genyu.

²⁶Nle Farisinyu, nyhütyü kepogü, honpen-e lo khun-e tse a-nyuki sü nshünla ri chi, tsonlo yatselo tegwen ki-e nshün chwiryü loti.

²⁷“Lesü keshatsin ju lo Farisinyu dan, hagun kerokon kehü ju, hagun we chi, thyülo tiso! Kechamvule hagun le sika hyu nchon kenjü hontse kethyü genyu; tsüle tegwen ki we hyu pe zegwa sa, ai a-nyuki we kesinyu ru lo tha kerhu aphu no süpvü bin hünyo.

²⁸Tsühontse hagun ko tegwen ki temi yhühyu ka we hyu pe nshün, ai a-nyu ki kerokon kethyü lo tha gwakemvu no hagun süpvü hünyo.

²⁹“Lesü keshatsin ju lo Farisinyu dan, hagun kerokon kehü ju, hagun we chi, thyülo tiso! Hagun le sidyükeshanyu sika khwen hünyo, lo kentsennyu dan sika thyü kezegwa shü hünyo; tson-o,

³⁰‘Ngun ko npvünyu dan keyhun ka hü yatselo, tsüdan zen-o sidyükeshanyu dushvu loho atale,’ tson zo hünyo.

³¹Tson-o hagun le hagun npvü hagun le nduka sidyükeshanyu dushvu kehü nyenyu letse hü.

³²Thyülo lo, tson-o, hagun ko hagun pepvünyu hontselo lo!

³³Hagun peri ju, hagun ribo tsipwen ju, hagun le dihontse Gehena mah nyu shaja kethyü nrhilo titse bin nla?

³⁴Tsügenyu hire, ale sidyükeshanyu lo thakeshanyu lo lesükeshatsin nyu nipe hagun ka shüti; lo hagun le tsüdan peha dushvu, lo krus ge-e hüti; lo hagun le hagun sinagog ka nyu peha vü, lo hü kela pe rünyi aphu nyu shüti.

³⁵Tson-o Abel temi kenshün gü dukeshvu nyu gun gü Kershvuka gü lo kershvubin au janyu hagun le dushvukela Barakia nyu Zakaria dukeshvu keti kazü hinyu kenshün nyu aphu dukeshvu kemu tsüno hagun pe ge ryü ti!

³⁶Ale hagun ka zo tsentsü shüti, tha tsü aphu nje ntsenyü nyu ge hi ryü kü ti.

³⁷“Hire, sidyükeshanyu dushvu kehü lo me nipe nka keshünyu tso pe jonshvu kehü, Jerusalem, Jerusalem! Tero tsü le a-nyu khokequen pe a-sekin hensin nyu shülo kehü hontse, ale gwün dije ge ditsülaki n nyenyu ju ko kequenlo nyü sola? Ai hagun npvü nmvu laso.

³⁸Lo tson-o hagun Kershvuka no nrunla lo khe lati.

³⁹Ale hagun ka zo tsentsü shüti, ntsoka gerho, hagun le, ‘Npugü zan sen ryü kezhü gü le kengvü ketsin,’ tsonkethyü zo kemvuthen we hagun le ahyulo hoso.”