Read Southern Rengma Naga MATHI 24 Bible Online

MATHI 24 - Southern Rengma Naga bible

MATHI 24

¹Tsüselo Jisu le Kershvuka nyu chwio tinzhü ntsin; senthyükelo ju le a-ki ryüo Kershvuka tsin pe a-hi.

²Ai a-le anyugun ka, “Hagun le tha hi hyu kü bin le mvula? Ale hagun ka zo tsentsü shüti, tha hidan hi boshwenla mvuo tso nme-e no nme so bin pvü bin loho.”

³Tsüselo a-le gungü Oliv kazüthun ge bin lo ntsin senthyükelo dan le ryüo kebuo a-ka, “Tha hile di gwünkho ki thyü ryü mon, lo nyu lope nle keryü lo nje ntsenyü keyhun nyu keyhun gwünkho pen kela zansü thyü shütila? tsü pe agun ka zoshülo.”

⁴Tsontsin Jisu le anyugun ka, “Hagun me no hagun sala mvu nrün genyu petsü bin lo nye.

⁵Kechamvule temi kechon le azan sen ryüo, ‘Ale Khrista gü le,’ tson-o temi kechon sa zen tinla nrün genyu.

⁶Tsüntimvule hagun le teri kega kebin rüla zo swü kebin shalo ti, tsüka hagun nyun keyhun kerun mvu bin kelo rüchün lo nye; kechamvule le tha hidan hithyü mvu loho kethyü genyu, ai tsü le kekhin gü mvuzun.

⁷Tsükitsü temi dan mele dan kecha gü shwi rüchün, lo raja nme le raja nme shwi rüchün tse ti; lo lika hika chenda thyü lo kazü nnu tse gunryü ti.

⁸Ai tha tsü aphu kenjün kethyü kerigü nti zun.

⁹“Tsükitsü me le hagun ten pe kenjün kethyü nyu shüti, tson-o hagun dushvu ti; lo Azan genyu temi aphu no hagun ntsü ti.

¹⁰Lo temi kechon le che lati, lo khinyunyu ten pe me tsü ti, lo khinyunyu ntsü ti.

¹¹Tsüntimvule sidyükesha kenku kechon le soryüo temi kechon sa sen tinla ti.

¹²Lo tha gwakemvu chonri kela genyu temi kechon le keso mvu pe kuntsen tsela ti.

¹³Tson-e temi ligü higüe nyhen gungü ti kelo nyu le kenikelo hyu loti.

¹⁴Lo temi aphu mhundyü ka zan zoshwi keshü nme thyüshü titse kethyü genyu kazü aphu ka raja jolo kegwa hi zope me senthyü tishü ti; tson-o tsüsiki nyu kekhin tsingü le ryü ti.

¹⁵“Tsügenyu Daniel sidyükesha gü le nduka zokenjü tha gwen nrhu sa kethyü kentsükenchen kethyü gü le ryüo bin kenshün gü nyu bin kelo hagun le hyu kelo ka (jo tsü swü kehünyu no rüchün lo).

¹⁶Tsükatsü Judia nyu kebin nyu no tin sen-o kazüthun ge gunla.

¹⁷Lo ka soge kebin nyu no a-ka nyu tha khilo titse nitsen nye.

¹⁸Lo low nyu kehünyu no a-phi khilo titse nigun nya.

¹⁹Ai tsükatsü nyuphou pvü kehünyu lo a-ge a-nyu tsü kehünyu tse le kennjün thyü sati.

²⁰Tsügenyu hagun tsonkethyü tsüno tsangseka nmvue Sabbath jon nyü thyümvu nrün genyu hi bin lo nye.

²¹Kechamvule tsükatsü me no kenjünthyü pe kazü thyü lo nyemhun nyu ryüo ntsoka keti, nmvue tsüsiki-e tsühontse thyü lo keho thyüshü nrün genyu.

²²Lo tsangkeben jon tsü thyü pe züla kemvu we, temi nme-e kenikelo hyulo hola ti; ai kejükelonyu genyu tsangkeben jon tsü thyü pe züla ti.

²³“Tsükitsü me le hagun ka, ‘Hire, Khrista le hika bin nyo, nmvue luka bin nyo,’ tsonkethyü zo-e hagun tenyen nya.

²⁴Kechamvule Khrista kenku, lo sidyükesha kenku le soryüo thazansü lo ndun kethyü tho ju thyü pe me hiti; tson-o thyülo kegwa we kejükelonyue sa zen tinla nrün genyu.

²⁵Hire, ale nchwenyu hagun ka zoshüla sele.

²⁶“Tsügenyu mele hagun ka, ‘Hire, a-le kazü kesi ki hünyo,’ tson-e gun nya. ‘Hire, a-le kanyutsen ki bin nyo,’ tson zo-e tenyen nya.

²⁷Kechamvule yhüko kechwi kipon tsangkechwe sh"lo, yhüko keche zin-e hyu gun kehü hontse, Temi Nyugü keryüe tsühontse nrün genyu.

²⁸“Lihiki-e kesi min le kebin bin ka güda le gun gü tsünyu kequen bin hünyo.

²⁹“Tson-e kenjün kethyü tsangkeben jon tsüdan sika yhüko le zün whüla ti, lo shye-e benshü mvu lati, tsüntimvule shyenyü le tsangge nrhi lati, lo tsangge kekvu ju sükenu kü lati.

³⁰Tson-o Temi Nyugü le me yhühyu thyü ryü zhü kela zansü hyu loti; lo kazü nyu kebin tsipwen aphu chü ti, lo anyugun le, Temi Nyugü le tsangge nmhu soge kekvu lo zoshwe zonye thyü ryü kezhü hyu loti.

³¹Tsü Katsü a-le a-lokethyü nyu nipe anyugun no shu khun pe tetso sa shü ti, tson-o anyugun no tsang nme zin gungü kecha zin keti kazü quenzi nyu a-le kejükelonyu fü kequen loti.

³²“Lo kherobin ge hagun a-rüla jokejvü gü shalo nye; a-ro le bwenlo njüo a-nyü sen chwiryü keloka tsang le nyen güzhü so tsekethyü hagun le shabin nyo.

³³Tsühontse hagun ko tha tsü aphu hyukelo ka a-khonni tsin thyü laso, kakhin ka bin laso, tson kethyü shalo nye.

³⁴Ale hagun ka zo tsentsü shüti, tha tsü aphu thyü penla kemvuthen we nje ntsenyü nyu keyhun hile ndila loho.

³⁵Tsang lo kazü le ndila ti, ai ajo we ndila loho.

³⁶“Ai jon tsünyü lo tegikevü ja tsünyü rüla Apvü nti a-me temi nme-e, tsangge lokethyünyu ju, nmvue Nyugüe shamvu.

³⁷Lo Noa keyhun ka hontse Temi Nyugü keryüe tsühontse ti.

³⁸Lo tsükatsü zü le chon soryü kemvuthen lo Noa le run nyu yülo kemvuthen me le tyütsü, kalu, lo tenulo tse bin-o ti.

³⁹Tson-o zü le chon soryüo anyugun aphu kenyon pvü tinla kemvuthen we shabin mvu; Temi Nyugü keryü ko tsühontse ti.

⁴⁰Tsükatsü mihvu le low nyu hüti, tsühvu nme zen tinla ti, lo nme khela ti.

⁴¹Tenunyu mihvu le thakekerütso sen-o tha kerü bin ti, tsühvu nme zen tinla ti, lo nme khela ti.

⁴²“Tsügenyu khwen binlo nye, kechamvule hagun le Npugü le dinyü ryüti yo sha kemvu genyu.

⁴³Ai kerühunyu le dicheka ryü tiyo tsekethyü kanyu npugü le tsü shabinlo, a-ka khwen bin-o me no yügü a-kanyü rühu mvulo ti, jo hi shalo nye.

⁴⁴Tsügenyu hagun ko ndo sa binlo nye; kechamvule hagun le shamvukebin tegikevü jagü ka Temi Nyugü le ryüla nrün genyu.

⁴⁵“Lo segü le tego joketsin kezogü lo a-do kegwa gü thyüo a-npugü no a-thyü pe a-ka nyu go dan so kedagü thyüo a-gwünkho ka tha hope anyugun tsülo mon?

⁴⁶Npugü le keryü ka tsühontse bin-o hyulo nrün tego, tsügü le a-hen kegwa tsin.

⁴⁷Ale hagun ka zo tsentsü shüti, a-le temi tsügü no a-hon aphu so keda thyü ti.

⁴⁸Ai tego serikemvu gü le a-npvü a-nyun ki, a npugü le ryü ntsü ti,

⁴⁹tson-o tego kechanyu vü, lo kenzeü nyu zen-o tyütsü tinla.

⁵⁰Tego tsügü Npugü le a-le rüchün mvu kebin jon nme nyü ryü ti, lo gwünkho tsügütsü a-le shamvu.

⁵¹Npugü le a-duthü kenyhun thyülao a-khipe kerokon kehünyu ju dan nyu shü lati, tsünyu chü lo a-hü keta tse bin ti.