Read Southern Rengma Naga MATHI 25 Bible Online

MATHI 25 - Southern Rengma Naga bible

MATHI 25

¹“Tsangge keda le lünyu mi tseryü le makenben khin pen-o senhügü tson shwi titse kegun hontse.

²Lo anyugun mi pvün le a-do gwamvu, ai mi pvün we a-do gwa.

³Lo a-do kendi dan we makenben khin khikelo ka mazü sen sinlo mvula.

⁴Ai a-do kegwa ju we anyugun makhin nyu mazü khipe shü sin senlo.

⁵Tson-o senhügü le ryü ntsüla ntsin anyugun aphu ngüo zhü kü tinla.

⁶“Ai tsanglu tsangzüki me le nra sen-o, ‘Hire, Senhügü le, hagun ryüo a-tson shwilo,’ tson ryü.

⁷Tsontsin lünyu tsüdan aphu sogü anyugun makhin ni boshwi külo.

⁸Tsükatsü a-do gwakemvu ju le a-do kegwa ju ka, ‘Hagun mazü pe agun tsüta; agun makenben le nmhü güzhü la sele.’

⁹Ai a-do kegwa ju le anyugun ka, ‘Tsonshü yatselo agun-e lo hagun-e tse gungü tilomvu lati ado; tsügenyu hagun npvü gungü jwen kehünyu ki hielo yatselo gwakvu ti.’

¹⁰Tson-o anyugun le hielo titse gunla ntsin senhügü le ryüla; tson-o ndo sen kebin dan zen-o senhü keho nyu gunla, tson-o ka khinlo la.

¹¹“Lo tsüka lünyu kechanyu dan tsüko ryüo, ‘Npugü, Npugü, ka khinshye pe agun tsüshü ta,’ tsonso.

¹²Ai a-le anyugun ka, ‘Ale hagun ka zo tsentsü shüti, ale hagun shamvu,’ tsonla.”

¹³Lo Jisu le jo kenkhin zo-o. “Tsügenyu hagun khwen binlo nye, hagun le a-tsangkeben jon gü nmvue tegikevü jagü shakemvu genyu.

¹⁴“Tsüntimvule temi nme le rünyi kecha nme ki gun titse-o a-gonyu koshüo a-hon pe tsüdan ben nyu keshü a-keme.

¹⁵Tsükatsü a-le anyugun do kegwa keshvu rüchün shwi titseo rakakhin shapvün pe nme tsüshü, khin hvu pe nme tsü lo khin me pe nme tsütse shüo tinla.

¹⁶Tsüselo khinpvün hyukelo gü le a-nyu kenkhi thyüo sen gungü tsü pe hathyüo kecha khinpvün chwilo.

¹⁷Lo khinhvu khikelo gü ko khinhvu chwilo.

¹⁸Ai khinme hyukelo gü we sen gungü kazü tsoshüo a-npugü raka tsü pe sun la.

¹⁹“Lo jon kethon thyü kela siki tsü anyugun npugü le ryüo anyugun ha kethyü tsü rüchün so.

²⁰Tsükatsü rakakhin pvün hyukelo gü le rakakhin kecha pvün pe sin sen ryüo, ‘Npugü, nle rakakhin pvün pe aben nyu shü; lo hire, ale rakakhin kecha pvün chwilo so.’

²¹Tsontsin a-npugü le a-ka, ‘Gwa binnyo, nle tego kegwa joketsin kezo nme; nle tha keshanyu kae joketsin zobin kelo genyu, ale nno tha kechon so bin ti; ryüo n npugü zen-o nsherhün binlo gwün re,’ tson.

²²“Lo raka khinhvu hyukelo gü ko ryüo a-ka, ‘Npugü, nle raka khinhvu pe aben nyu shü; hire, ale raka khin kecha khinhvu chwinilo so.’

²³Tsontsin a-npugü le a-ka, ‘Gwa bin nyo,’ nle tego kegwa joketsin kezo nme; nle tha keshanyu kae joketsin zobin kelo genyu, ale nno tha kechon so keda thyü ti, ryüo n npugü zen-o nshekerhün thyü binlo gwün re!’

²⁴“Tsüselo raka khin nme hyukelo gü ko ryüo a-ka, ‘Npugü, nle temi nyun kerü nme, nle gwünshü kemvu ki-e gvü hünyo, lo nle kezenshü kemvu ki-e jün kequen kehü ale sha.

²⁵Ale n nshvuo nraka tsü sen gungü kazü hensin ki sun pe binla; nhon le hi ma re,’ tsonshü.

²⁶“Ai a-npugü le a-ka, ‘Nle serikemvu thathyü kentsü tego gü, ale gwünshü kemvu bin ki gvü kehü, lo kezenshü kemvu bin ki jün kequen kehü nle sha hü ola?

²⁷Nle tsügenyu araka tsü sen gungü pisa ka nyu shü njü kethyü we ale gun keryü ka raka lo a-kechwi sin-o hyu keloi.

²⁸Tsügenyu hagun a-ben nyu raka khin tsü se sen gungü raka khin tseryü sen kebin gü tsüla chi.’

²⁹Kechamvule temi ligühigüe tha le kebin gü khipe tsü sinshü ti, tsontsin a-le chonsa loti, ai kendigü we a-ben nyu kebin keshanyu tsüe khini sen tinla ti.

³⁰Lo me no tego tha lihi kemvu gü shwe pe tegwen kezün ki shüla ti; tsünyu chü lo hüketa tse bin ti.’

³¹“Tson-e Temi Nyugü le zoshwe zonye sen-o tsangge lokethyü aphu pe a-sin keryü ka, tsükatsü a-le a-Raja bin zoshwen zonye kethyü nyu binti.

³²lo temi aphu zenryüo a-mhundyü ka kequen loti; tson-o tanyü kekhwenyu le tenyü dan nyu tanyü hükholo la kehü hontse, a-ko me khoka pe danhvu thyüla ti.

³³Lo a-le tanyü dan we pe a-njüzin shülo ti, ai tenyü ju we pe a ngwazin shü lati.

³⁴Tsükatsü raja gü le a-njüzin kebindan ka, ‘Apvü le jochü pe hagun ketsü ju, hagun ryüo kazü thyülo nyemhun ka raja bin ndo pe hagun khwen kebin gü gwenlo gwün re.

³⁵Kechamvule ale nnyon kebin ka, hagun le tha pe atsü, ale teri kebin ka hagun le zü lope ano tsülo; ale tesin thyü kehü ka hagun le a nsinlo.

³⁶A kenben kehü ka hagun le phinya pe ahenshü; ale hobin kethyü ka, hagun le ryüo a shwishü, ale dothyü kebin ka, hagun le ryüo a nthon kethyü genyu.’

³⁷“Tsükatsü kentsenyu ju le a-ka, ‘Npugü ale nyu tsekethyü ka nle nnyon kebin hyuo, tha pe ntsüshü la? Nmvue teri kebin hyuo tha pe nla shü la?

³⁸Lo ale diche ka nle tesinthyü kehü hyuo n nsinlo la? Nmvue nle phinya ben mvu kebin ale shao dicheka phinya pe nhenshü la?

³⁹Lo agun le dicheka, nle ho kebin lo dothyü kebin shao ryüo n nthon la?

⁴⁰Tsükatsü raja gü le anyugun ka, ‘Ale hagun ka zo tsentsü shüti, hagun le a sikezen nyu keshen hidan nme ge-e thyükeshü tsüle, age thyükeshü keme!’ tsonla ti.

⁴¹“Lo tsükatsü a-le a-ngwazin kebin nyu dan ka, ‘Hagun keswekesü kepvü dan, hagun hinyu tin sen-o tero gwakemvu gü lo a-lokethyü nyue sin tse genyu ndo pe bin kenjü gü kethonthen bin kehü mah nyutsü gunla chi.

⁴²Kechamvule ale nnyon kelo ka, hagun le tha pe ano tyü mvu; ale teri keloka, hagun le tha pe ano tsülo mvu.

⁴³Ale tesin thyü kehü ka hagun le a nsinlo mvula; ale akenben kehü ka hagun le phinya pe a henshü mvula; lo ho lo dothyü kebin kae hagun le ryüo a nthon mvukela genyu.’

⁴⁴“Lo tsükatsü anyugun ko a-ka, ‘Npugü, agun le dicheka nle nnyon kehü lo teri kehü, lotesin thyü kehü, lo nkenben kehü, lo ho, lo dothyü kebin hyuo n leyi mvula ola?

⁴⁵Lo tsükatsü a-le anyugun ka, ‘Ale hagun ka zo tsentsü shüti, keshen tsin temi hidan ge thyüshü kemvu tsü le age thyüshü kemvu keme.’

⁴⁶Tsüselo tsüdan le kethonthen shaja kethyü nyugun la ti; ai kentsen nyu ju we kethonthen kerhün nyu gunla ti.”