Read Southern Rengma Naga MATHI 26 Bible Online

MATHI 26 - Southern Rengma Naga bible

MATHI 26

¹Lo Jisu le jo tsü zothü shü ntsin, a-le senthyükelo ju ka,

²“Jonhvu sika nkenkegun nga nrün hagun ko shabin ti, lo tsünyü me no Temi Nyugü pe krus ge hüla lo tseo tenshü ti.”

³Lo tsükatsü peshü ju, lo temi dan nyu peshü kengun ju le gungü Kaifa tsekethyü peshü kengun tsin gü kanyu kequenlo.

⁴Tson-o anyugun le tedo pe Jisu gwen-o ten pe dushvu kela rüla kenthon.

⁵Ai anyugunle, “Nga jonka loho, temi dan nyu kevü soryü lalo keshvu genyu, tson so.”

⁶Lo Jisu le Bethani nyu Simon nyun le ketyügü kanyu kebin ka;

⁷tenunyu nme le terzü a-min ketsen alabaster khin mesen-o a-ki ryü; tson-o a-le me zen-o ho kebinka tsü jape a-pe ge shü.

⁸Ai senthyükelonyu dan le tsü shwi pe anyugun yhüthyü-o, “Nyuthyüo tha nke pe hihontse hü nla?

⁹Hilo pe pisa kechon heilo njüo pe kendinyu cheshü logwa.”

¹⁰Ai Jisu le tsü shalo njüo anyugun ka, “Hagun le nyuthyüo tenu higi kevü hü nla? A-le age thakegwa nme thyüshü laso.

¹¹Kendinyu we hagun zenzin bin ti; ai awe hagun zenzin bin loho.

¹²A-le terzü hilo pe amin ge keshü tsüle akesun ronye ndoshü kenyü genyu.

¹³Ale hagun ka zo tsentsü shüti, kazü aphu ka jolokegwa hi zope me senkethyü aphu ka tenunyu higi rüla rüchünlo nrün genyu a-le thyükeshü rülae pe sin-o zohü ti.”

¹⁴Tsükatsü tseryü kenyhunche dan nyu temi nme, Iskariot Judas tsekethyü gü le, peshükeda ju ki gungü anyugun ka,

¹⁵“Hagun le nyu pe atsü nyü bin nla? Ale a-ten pe hagun ben nyu shülo,” tsonso. Tsontsin anyugun le raka shenryü swü pe a-tsüshü.

¹⁶Lo tsü gerhonyu a-le Jisu ten pe anyugun ben ka shüti tse ndo ton binlo la.

¹⁷Tsüselo kebu no shümvuo tensü ketyü nga jon keri nyü senthyükelo dan le Jisu ki ryüo, “Nle agun no dikipon nkenkegun nga ndo keshü nkendo tila nno tyü nrün genyu?”

¹⁸Tsontsin a-le. “Hagun rünyi nyida gü nyu gungü temi nme ka, ‘Senkethyü gü le agwünkho pen bin laso, ale senthyükelo ju zen-o nka nyu nkenkegun nga nga ti,’ tse hü nle, tsonshü nye.”

¹⁹Tsontsin senthyükelo ju le gungü Jisu le anyugun ka zokeshü hontse thyülo njüo anyugun le nkenkegun nga tsü ndolo.

²⁰Lo khejeki thyülo ntsin a-le senthyükelo mitseryü kenyhunche dan zen dunlo.

²¹Lo anyugun le tyütsü kebin ka a-le anyugun ka, “Ale Hagun ka zo tsentsü shüti, hagun dan nyu temi nme le aten shüti.”

²²Tsontsin anyugun nyungwamvu sao a-ka, “Npugü, tsüle ale le? Ale le?” tson kü sola.

²³Tsontsin a-le anyugun ka, ayi kentsin-o ngüka a-ben lope khun nyu keshü gü tsüle aten shüti.

²⁴Temi Nyugü le a-rüla zope bin kenjü hontse tinla titse bin laso; ai Temi Nyugü tenshü nrün gü we chi, thyülo tiso! Temi tsügü nnyu ryü kemvu we a-genyu gwakvu nrün.

²⁵Tsükatsü a-tenshü nrün gü, Judas le a-ka, “Rabi, tsüle ale le?” tsonshü. Tsontsin a-le a-ka, “Ele, tsonla.”

²⁶Lo anyugun le tyütsü kebin ka Jisu le tensü khipenlo njüo jochüshüo boshwenlo-o, khipe senthyükelo dan tsüshüo anyugun ka, “Khipe tyülo lo, Hile athyü gü le,” tsonshü.

²⁷Tsüsika a-le honpen gü ko khipen lo-o jochü shüo, pe anyugun tsüo anyugun ka,

²⁸“Hagun hi tsü külo nye; kechamvule hile temi kechon kemu jülo nrün genyu tsun chwikeryü kejozen kelo azigü genyu.

²⁹Ai ale hagun ka zo tsentsü shüti, ale Apvü Raja nyu vain zü keshün tsü kemvuthen ale nthu gerho vain-bin higü ge hi tsüsin loho so.”

³⁰Tsüselo anyugun le lü nme thyüshüo Oliv kazüthun ge gunla.

³¹Tsükatsü Jisu le anyugun ka, “Aphu ntsoje akhelao tin kü lati, ‘Ale tanyü kekhwen gü vüshüti, tsontsin tanyü dan le tin tsenchvü lati,’ tson thu pe bin kenjü genyu.

³²Ai ale rhün niso kelo siki ale hagun mhundyü rio Galil nyu gunti.”

³³Pitor le a-ka, “Hidan le aphu nkhe külae awe le nkhe loho.”

³⁴Jisu le a-ka, ale nka zo tsentsü shüti, “Ntsoje tero kekhun mhundyü nle gwünshen ge azan zomvu lati.”

³⁵Pitor le a-ka, “A no sila lotse-e ale nzan zomvula loho le.” Lo senthyükelo nyu aphu tsonzo küla.

³⁶Tsüselo Jisu le anyugun zen-o Getsemane tsekethyü bin nme ki gungü a-le senthyükelo nyu ju ka, “Ale lika gungü kehi thyü tin kela ka hagun hika bin tse nye.”

³⁷Lo a-le Pitor lo Zebedi nyuhvu pe a-sinlo-o gungü a-nyun kenjünthyü, lo a-nyun keyhunkerunla.

³⁸Tsükatsü a-le anyugun ka, “A nyun kenjünthyü pe si güzhü laso; hagun le hinyu azen-o khwen binlo nye.”

³⁹Tson-o a-le anyugun mhundyü rikhe gungü nkhüntsülo-o kehithyü-o hihontse zo, “Apvü, thyü logwa yatselo, honpen hino a nrhila ta! Ai akendo hontse nya, nkendo hontselo,” tsonshü.

⁴⁰Tsüsika a-le rani sen-o senthyükelo nyu ki ryü laryü anyugun le zhü bin-o hyulo ntsin a-le Pitor ka, “Kha, hagun le tegi kevüja nme-e azen-o khwen bin loho se ole?

⁴¹Hagun kesemen nyu yüla lo kenshvu genyu khwen binlo, lo hibin lo, Kapu gü we thyünyü sa bin nyo, ai thyümin le kvu mvu.”

⁴²Tson-o tsüsika ko nigungü hi-o, “Apvü, ano hi tsümvu tse khela loho yatselo; nkendo thyülo chi.”

⁴³Tsonshüo rani ryü ntsin anyugun le zhü kebin hyunilo, anyugun le anyugun yhütyü ko loho tse kebin genyu.

⁴⁴A-le gwünshen ge gü ka ko anyugun khela njüo gü ngüka hontse hini shü.

⁴⁵Tson-o a-le senthyükelo nyu ki ryüo anyugun ka, “Ntsokhin hagun le zhü rüyü bin zun le! Hire, Temi Nyugü ten pe kemunyu ben nyu shü titse bin laso.

⁴⁶So-o ngun tinla je! Hire, atenshü nrün gü le ryüo tilo bin laso.”

⁴⁷Lo a-le jozo kebin ka, tseryü kenyhun che dan nyu nme gü Judas le peshükeda ju lo temi dan nyu thakeshanyu dan ka zhethon lo senkethü kepen temi dan zen ryüla.

⁴⁸Lo tsü mhundyü a-tenshü nrün zansü nme thyü pe anyugun hi-o, “Ale a-mbokeshü gü tsü le nye, a-tenlo chi,” tsonshü la.

⁴⁹Tsontsin a-le whütse Jisu ki ryüo a-ka, “Salam, Rabi,” tson-o a-mboshü.

⁵⁰Tsontsin Jisu le a-ka, “Apvü gü, nle thyü titse ryü kebin gü tsü thyülo chi!” Tsüselo anyugun le ryüo Jisu tenlo.

⁵¹Tsükatsü hire, Jisu zen kehünyu nme le a-ben sen gü a-zhethon sütholo njüo pe peshükeda tsingü gonyu nme duso ntsin a-nyetin duthüla.

⁵²Tsüka Jisu le a-ka, “Nle nzhethon lope a-khin nyu shünilo lachi. Kechamvule zhethon sen kehünyu aphu zhethon genyu nke küla nrün genyu.

⁵³Hagun kerüchün le, ale Apvü ka hishülo, A-le ntsokae tsangge lokethyünyu legion tseryü kenyhunche kelae nishü loho letse bin ole?

⁵⁴Tsonla yatselo dihontse ketsinlesü jo no penlo tila?”

⁵⁵Lo tsügwünkho katsü Jisu le temi dan ka, “ Hagun le kerühunyu keten hontse zhethon lo senkethü pen-o aten titse ryü zhü ai la? Ale khenyütsen Kershvuka nyu bin-o me senthyü bin hü, ai tsüka hagun le atenlo mvula.

⁵⁶Tson-e sidyükeshanyu dan le thu pe bin kenjü ketsinlesü jo no penlo nrün genyu hihontse thyükelo gwünzin.” Tsonshü ntsin senthyükelo nyu dan le a-khelao tin küla.

⁵⁷Tsüselo Jisu tenzen kehü dan le a-zen-o peshükengun gü Kaifa ki gunla; lo tsünyu tsü lesükesha tsin dan lo peshü dan tse gungü tsünyu kequen bin.

⁵⁸Lo Pitor le a-ti sarimvu tse a-sithen gungü peshükeda tsin gü kamhun tilo njüo dihontse tiyo tsekethyü nri titseo yügü rikhun kebin nyu dan nyu binlo.

⁵⁹Tsükatsü peshükeda ju lo süda kehun gü aphu Jisu dushvula titseo tedo rhio a-ge kenku jo füso.

⁶⁰Lo kenku jünkezo kechon le ryü, ai a-kemu nme-e hyulo mvula. Tson-o kekhin ki mihvu le ryüo,

⁶¹“Temi higü hile himhundyü, ‘Ale Sunggigü Kershvuka gü borholao jonshen nyü thyünilo gwa,’ tson zo le.”

⁶²Tsontsin peshükeda tsingü le solo njüo a-ka, “Nle thame zomvu ti ole? Hidan le nka tha zokebin hile nle nyuthyü letse bin nla?”

⁶³Tson-e Jisu le ntsema tse nila. Tsüselo peshükeda tsingü le a-ka, “Ale rhünzin bin kehü Sunggigü zan sen-o swe-o zoti, nle Sunggigü Nyugü Khrista gü le nmvu la? pe agun ka zoshülo.”

⁶⁴Tsontsin Jisu le a-ka, “Njo gü tsüle; ai ale hagun ka zoshü ti, Hisiki hagun le Temi Nyugü le Kekvu gü ben njüzin kebin, lo tsangge nmhu ge keryü hyuti.”

⁶⁵Tsontsin peshükeda gü le a-phi sürhen-o, “A-le Sunggigü kenkhin jo zo laso, ngun le jünkezo kecha füsin-o nyu thyü se mon? Hire, hagun aphu tse a-le Sunggigü kenkhin jo kezo shalo laso; hagun le nyu rüchün bin nla?”

⁶⁶Tsontsin anyugun aphu tse, “A-le sila zü le,” tson sola.

⁶⁷Lo tsükatsü anyugun le nsü pe a-mhun di, lo jenthün thyü pe a-jen; lo peha le a-benje pe a-vü, tseo a-ka,

⁶⁸“Hire, Khrista, segü le nvüshü la? Agun ka sidyükesha jo zoshü ta.”

⁶⁹Tsükatsü Pitor le kamhun tegwen ki kehü ka, lünyu nme le ryüo a-ka, “Nko Galilnyu Jisu zen hü amon?”

⁷⁰Ai a-le anyugun mhundyü nyu nmvu letseo, “Ale njo tsü shamvu.”

⁷¹Lo tsüsika ko a-le nigü kasü ki kebin ka, lünyu kecha nme le a-hyushüo a-ka, “Temi higü hiko himhundyü Nazaret nyu Jisu zen hü le,” tson ni.

⁷²Tson-e a-le nmvu letse swe-o, “Ale temi tsügü shamvu le.”

⁷³Lo tsüsi kheka tsünyu kebin nyu nme le ryüo Pitor ka, “Nko temi tsügü kethen nyu nme ketsin le; njo nyu nshalo la sele,” tson ni.

⁷⁴Tsontsin a-le sweni ni tseo, “Ale temi tsügü shamvu le.” Lo tsügwünkho toka tsü tero le khun chwiryüla.

⁷⁵Tsüsiki nyu Pitor le himhundyü Jisu le a-ka, “Nle tero kekhun mhundyü gwünshen ge arüla zomvula ti,” tse kezo jotsü rüchünlo. Tson-o a-le kamhun ki chwigü chüsa tinla.