Read Southern Rengma Naga MATHI 27 Bible Online

MATHI 27 - Southern Rengma Naga bible

MATHI 27

¹Tsüselo tsangbenlo ntsin peshükeda ju lo temi dan nyu pelü kethyü aphu Jisu dushvula nrün genyu gungü kenthon.

²Tson-o anyugun le a-ben phinlo njüo a-zen gungü rünyi ahng gü Pilat ben nyu shüla.

³Tsükatsü Jisu tenkeshü gü Judas le mele Jisu nmu lo a-nkhin kela shalo njüo a-nyun kenjünthyüo raka shenryü tsü sen gungü peshükeda dan lo pelü kethyü ju tse tsüni-o anyugun ka,

⁴“Ale mu kemvunyu nme khipe meno boshvu titse kethyü ale mu laso.” Tson-e anyugun le a-ka, “Agun kendo mvu, nle n npvü khilo.”

⁵Lo tsükatsü a-le raka tsü shwen pe Kershvuka nyuki shülao tinla; tson-o a-le gungü khvüshon sila.

⁶Tsüselo peshükeda ju le raka tsü khilo njüo, “Hile tezi min genyu khipe raka khin nyu shü kenjü tejvü mvu.”

⁷Tson-o anyugun le gungü kenthonlo njüo tsü lope lobu nme heilo-o tsü nyu, tesin sun ti letse la.

⁸Tsügenyu nthu keti-e lobu tsügütsü le, “Tezi low,” tse hünyo.

⁹Tsükatsü nduka Jeremia sidyükeshagü le, “Israel nyu nyenyu le pe a-min thyü titse kenthon kelo raka shenryü tsü khipe

¹⁰la kethyü gü kazü hei,” tson kenjü jo tsüno penlo.

¹¹Tsükatsü Jisu le gungü ahng mhundyü ka binlo ntsin, ahng tsügü le a-ketso-o, “Nle Judanyu Raja gü ole?” Tsontsin Jisu le, “Ele, Ale tsügü le.”

¹²Tson-e peshükeda ju lo pelü ju le a-nkhin kesoka a-le thame zoni mvula.

¹³Tsükatsü Pilat le a-ka, “Me le kemu ditsü laki pe n ge shübin nla, nle thame shamvu ol?”

¹⁴Tson-e a-le thame zoni shü mvula; tsügenyu ahng no a-dun thyüla.

¹⁵Lo nga tsügü nyu tsü ahng gü le temi dan no do anyugun kendo nyu nme hokeshü tejvü le bin.

¹⁶Lo tsükatsü Baraba tsekethyü temi süda gü kesha nme le dothyü bin.

¹⁷Tsügenyu anyugun le gungü kequenlo ntsin, Pilat le anyugun ka, “A no digü khipe hagun tsülo hagun kendo mon? Baraba tile, Jisu Khrista letse kehü gü mon?”

¹⁸Kechamvule anyugun le a-shwi kerüchün genyu a-khipe a-ben nyu keshü a-le sha kebin genyu.

¹⁹Tson-o a-le ketso kethyü bin ge kebin ka ahng nu le me nipe a-ki shüo a-ka, “Nle kenshün tsügü ge thame thyü nya nye; kechamvule ale nthu aminki a-genyu kenjünthyü sa kelasi genyu.”

²⁰Tson-e peshükeda ju lo pelü ju tse le Baraba hilo, ai Jisu we dushvula lotseo temi dan thukeyhun shü.

²¹Tson-o ahng gü le anyugun ka, “A no au digü pe hagun ketsü hagun kendo ti la?” Tsontsin anyugun le, “Baraba khishülo,” tson sola.

²²Tsontsin Pilat le anyugun ka, “Tsonlo ano Jisu Khrista tse kehü gü lope nyu thyüla mon?” Tsontsin anyugun le aphu tse, “A khipe krus ge hü lalo,” tsonla.

²³Lo a-le, “Nyuthyü ola? A-le nyu gwakemvu thyüshü ola?” Ai anyugun le sen ketsintsin tseo, “Alope krus ge hü lalo,” tsonla.

²⁴Tson-o Pilat le kvu kelogü mvule tha kekevü chon ketsin ni kela genyu, a-le temi dan mhundyü nyu zü lope a-ben tseo anyugun ka, “Temi kenshün higü dukeshvu kipon we ale nshün lo njü machi nye; hagun npvü hagun ge lenye.”

²⁵Tsontsin temi tsüdan aphu a-ka, “A-zi no anpvü age-e lo anyenyu ge-e ryülo!”

²⁶Tsüselo a-le Baraba khipe anyugun tsüla, lo Jisu vülao khipe krus ge hüla lotseo khipe anyugun ben nyu shüla.

²⁷Tsükatsü ahng gü shüpahü dan le Jisu zen-o süda bin nyu yügü shüpahünyu aphu no ryüo a-hunpvülo.

²⁸Tson-o anyugun le a-phi a-nya rhola njüo phi kenhon nme pe a-no benlo.

²⁹Lo tsehü perün thyü pe a-pe rünshü, lo terithün nme pe a-ben njüzin shü; lo anyugun le a-mhundyü ka khonyilo njüo a-shwinyüo a-kelu-o a-ka, “Hire, Judanyu Rajagü, Kvukelogü thyülo ta.”

³⁰Tsüselo anyugun le nsü pe a-mhun di, lo terithün khipe a-pe vü.

³¹Lo anyugun le a-khipe keyüthyü kela siki a-ge a-phi a-nya rhola njüo a-npvü a-phinya lope a-no sen nilo njüo krus ge a-hüla ti tseo a-nrhisü zen gunla.

³²Lo anyugun le chwizhü ntsin Simon tsekethyü Kurinnyu nme hyulo; tsontsin anyugun le a-no Jisu krus penlo tseo a-kemvu thyüo a-tenlo.

³³Tsüselo anyugun le gungü Golgatha tsekethyü a-kon le me, “Pekhunru Bin,” letse kethyü kazü nme tilo.

³⁴Lo anyugun le vain zü pe kekhü ka keri kethyü pe a-no tsülo lotse shü; ai a-le tsü khipe ntsin shwio tsümvu la.

³⁵Lo anyugun le a-khipe krus ge hüla njüo a-phi a-nya pe henshwio kenjünlo.

³⁶Tson-o anyugun le tsünyu bin-o a-khwen bin.

³⁷Tsüntimvule anyugun le a-pe soge a-kenkhin jo thuo “HILE JUDANYU RAJA GÜ JISU LE,” tsonkethyü thushü.

³⁸Tsükatsü kerühunyu mihvu no a-sin-o hü, nme no a-njüzin lo nme no a-ngwazin tse hü.

³⁹Lo tsükatsü kensinkenshye nyu aphu a-shwinyüo, a-pe pvü kengüo a-ka,

⁴⁰“Nle Kershvuka borhola njüo jonshen nyü thyülo titse kehügü! Nle n npvü nkenilo ta! Nle Sunggigü Nyugü yatselo, krus ge tsenryülo!”

⁴¹Tsühontse peshü ju-e lo lesükeshatsin ju lo pelü dan ko tse a-shwinyüo, “A-le me kechanyu we kenilo hünyo; ai a-npvü we a-kenilo ho:

⁴²A-le Israel nyu Raja gü le a-no ntsoka krus ge tsenryülo, tson yatselo agun le a-tenyenti.

⁴³A-le Sunggigü tenyen hü kethyü le; Sunggigü no a-shwi pe a-kenyü yatselo, no ntsoka a-kenishü ta. A-le, ‘Ale Sunggigü Nyugü le,’ tsonkehü genyu.”

⁴⁴Tsüntimvule a-sin pe krus ge hü kethyü hvu-e tsühontse zope a-kesü sola.

⁴⁵Lo tegi tseryü kenyhun che kevü ka gungü tegi kenshen kevü keti kazü aphu nyu zünti tsela.

⁴⁶Tson-o tegi kenshen kevü gwünkho ka Jisu le nra sen-o, “Eloi, Eloi Lama Sabakthani,” a-kon le, A Sunggigü, A Sunggigü, Nle Nyuthyüo A Khela la?

⁴⁷Tsontsin tsüka kebinnyu jo tsü keshanyun dan le, “Temi higü le Elia ko bin laso.”

⁴⁸Tsontsin anyugun nme le tin whütse gungü spunj khipe keshonzü ka ntsenlo njüo pe kheyi pun ka shü pe a-lashü.

⁴⁹Ai temi kechanyu we a-ka, “Matselo, Elia le a-kenishü titse tsüryü tile mvuyo shwi bin shwi!”

⁵⁰Tsüselo Jisu le nra sen-o a-kapu hoshü la.

⁵¹Tsontsin hire, Kershvuka nyu phi lope khinthü kenjü gü tsü le a-pesun ka nrhen tsügü a-pha keti nrhen ketunkü kenyhun thyüla; lo kazü nnula, lo tsoe ko baba tse sola,

⁵²lo sikae pe küla; kesinyu kenshün nyu kechon min tsüno rhüni so ryüla.

⁵³Tson-o tsüdan no anyugun sika nyu chwiryüo rhün nikelo siki anyugun le rünyi kenshün gü nyu yüo temi kechon no anyugun hyu.

⁵⁴Tsükatsü tsiso kedagü, lo a-zen-o Jisu rikhun kebinnyu ju tse, kazü nnu kela lo tha aphu thyü kela shwi pe nshvurila njüo, “Hile Sunggigü Nyugü ketsin le.”

⁵⁵Lo Galil nyu Jisu sithen-o a-lothyü kehü tenunyu kechon le perezin bin-o nri bin.

⁵⁶Lo tsüdan dan nyu Maria Magdalin, lo Jakob lo Joses au jvü Maria, lo Zebedi nyuhvu jvüe sin bin.

⁵⁷Tsüselo ngwünki Arimathia nyu keryü a-zan le Josef letse kethyü kenyanyu nme le ryü, lo a-ko Jisu sikethennyu nme,

⁵⁸temi tsügü le Pilat ka gungü Jisu min hi. Tsontsin Pilat le khilo lo tse zoshü.

⁵⁹Lo Josef le a-min tsü pen gungü linen phi kenshün nme pe jelo njüo pe a-npvü a-sika tso nme run kenjü nyu shüla.

⁶⁰Tson-o tso keda nme keto pe sika tsügü kakhin nyu nkela njüo tinla.

⁶¹Lo Maria Magdalin lo Maria kechagi ko tse sika tsümhundyü nyu bin-o hyu.

⁶²Lo tsüsinyü tha ndonron kethyü sinyü peshükeda ju lo Farisinyu dan tse kengü gungü Pilat ka zo.

⁶³Kedagü, mesa kehü temi higü le a-kerhün ka, “Ale jonshen nyü rhün nisolo ti, tsonkethyü zokehü agun le a-jo tsü rüchünlo laso.

⁶⁴Tsügenyu jonshen keti a-sika khwen sa binlo tsekethyü njo hoshülo, a-le senthyükelo dan le ryüo rühu pen tinlao temi ju ka, a-le kesinyu dan nyu rhün niso laso, tsonla yatselo kenshvu genyu; tson yatselo thakekevü kenkhin gü le kerigü nyeki gwamvu kvula ti.”

⁶⁵Tsontsin Pilat le anyugun ka, “Rikhun zenlo njüo hagun npvü thyü lo kegwathen khwensa binlo chi.”

⁶⁶Tsontsin anyugun le gungü tso so ge mohor vülao rikhun lope tsünyu shüla, tson-o sika tsü khwen petsü sa lola.