Read Southern Rengma Naga MATHI 28 Bible Online

MATHI 28 - Southern Rengma Naga bible

MATHI 28

¹Lo Sabbath jon penlao jon keri nyü lonyü nshwe ka Maria Magdalin lo Maria kecha tenunyu nme au sika nrishü titse ryü.

²Lo hire, kazü le nnu pe kemvu mvu thyüla; kechamvule Npugü lokethyü nyu nme le tsangge tsüryüo sika khenpvü ka tso gü tsü boketola njüo tsüge binlo la.

³Lo a-shwi pe tsangkekechwe hontse, lo a-phi a-nya le chon pe khetso hontse.

⁴Lo a-kenshvu genyu rikhun nyu aphu kesinyu hontse tinla.

⁵Ai tsangge lokethyü nyu güle tenunyu ju ka, “Hagun nshvu nya nye. Hagun le mele khipe krus ge hü kelagü Jisu fü keryü ale shabin laso.

⁶A-le hika ndi so; kechamvule a-le nduka zokeshü hontse rhüniso kelasi genyu. Hagun n pharyüo Npugü pe shü kethyü bin nrishü tare.

⁷Tson-o whütse gungü a-le senthyükelo nyudan ka, ‘A-le kesinyu dan nyu rhüni so laso,’ tson kethyü zoshü nye. Lo hire, a-le hagun mhundyü rio Galil nyu gunzhü laso; hagun le gungü tsünyu a-hyu loti. Hire, ale hagun ka zoshüla sele.”

⁸Lo tsonshü ntsin anyugun le nshvulo anyugun sherhün rilao sika tsü nken whütse chwigü jo tsü lope a-le senthyükelonyu dan ka zoshü.

⁹Tson-o anyugun le tin gunzhü ntsin Jisu le anyugun zen ketenolo njüo anyugun ka, “Kegwagü thyülo,” tsonshü. Tsontsin anyugun le tsügü a-pha nyu a-rüshvu.

¹⁰Lo tsükatsü Jisu le anyugun ka, “Hagun nshvu nyao gungü a sikethen nyu danka anyugun no Galil nyu ryülo tse zoshü nye, anyugun le tsünyu ahyulo ti,” tsonshü.

¹¹Tsüselo anyugun le gunkezhü ka, hire, rikhun nyu peha le rünyi nyida gü nyu ryüo tha thyü kela aphu pe peshükeda ju ka zoshü.

¹²Tsükatsü anyugun le gungü peshünyu ju zen kehyulo njüo kenthon-o anyugun le raka kechon khipe shüpahünyu tsüo anyugunka,

¹³“Hagun, a-le senthyükelo ju le anyugun npvü khejeki agun le zhü kebin ka ryüo rühu pen tinla sele.” tsonla nye.

¹⁴Lo jo higü le ahng gü nyetin ka gunla yatse-e agun le agun npvü a-nthon loti; hagun no hagun nyun kenjünthyüla loho.

¹⁵Tson-o anyugun le anyugun ka kezo hontse zola; lo jo tsüle ryüo nthu keti-e Judanyu dan nyu zo ryü bin zun.

¹⁶Tson-e senthyükelo tseryü nmeche ju le Jisu le nduka anyugun ka zokeshü hontse Galil nyu kazüthun ge gunla.

¹⁷Tson-o anyugun le gungü a-hyulo ntsin anyugun le a-rüshvu; ai peha le tenyen tsentsü mvula.

¹⁸Tsükatsü Jisu le anyugun ki ryüo anyugun ka, “Tsangge lo Kazü nyue kekvu aphu pe Atsü laso.

¹⁹Tsügenyu hagun gungü temi ligü higüe no a sikethen nyu thyülo lotse zoshü nye, lo Pvügü, lo Nyugü lo Kenshün Kapu zan nyu anyugun Baptaiz thyü shülo.

²⁰Lo anyugun ko no ale hagun ka zokeshü tsü aphu thyü lo zenlo nrün genyu anyugun senthyüshü nye. Lo hire, Ale nthenteyhen nyu ki-e hagun zenzin hüti.”