Read Southern Rengma Naga MATHI 4 Bible Online

MATHI 4 - Southern Rengma Naga bible

MATHI 4

¹Tsüselo Jisu le Satan no a-semen titseo Kapu no a-zen-o tehen ki temi kendi bin ki gunla.

²Lo a-le tsangkeben jon henzi lo tsangkezün jon henzi tse tyütsü mvukela ka nnyo la.

³Tsontsin Satan le ryüo a-ka, “Nle Sunggigü Nyugü yatselo, tso hidan ka zoshüo no tensü ngwalo ta.”

⁴Ai Jisu le a-ka, “Temi le tensü genyu nti rhünlo hümvu, ‘ai Sunggigü mün nyu chwikeryü jo genyu rhünlo ti,’ tsonkethyü thu njü nyo.”

⁵Tsüselo Satan le a-zen-o rünyi kenshün gü nyu gun-o a-no Kershvuka pesun ge binlo-o

⁶a-ka, “Nle Sunggigü Nyugü yatselo, hige chetsü shwi, kechamvule, ‘Sunggigü le n-genyu a-lokethyünyu nishüo, nno tsügü tso ge jon mvulo nrün genyu, anyugun no anyugun ben pe npen loti,’ tsonkethyü thu kenjü genyu,” tsonshü.

⁷Ai Jisu le a-ka, “Nle n Npugü Sunggigü semen loshvu,” tson kethyü thu njü nyo; tsonla.

⁸Ai Satan le a-zen-o kazüthun ketetso nme ge nikü gü kazü rünyi keda aphu lo tsünyu kenya aphu gwüngwa thyü tsinpe a-hishü.

⁹Tson-o a-ka, “Nle nkhüntsü gü arüshvu lo ale tha hi aphu pe ntsü lati,” tsonshü

¹⁰Tsontsin Jisu le a-ka, “Tinla chi, Satan! Kechamvule nle ‘Npugü Sunggigü nti rüshvulo, lo a-lothyü binlo,’ tson kethyü thu pe bin kenjü genyu!”

¹¹Tsontsin Satan le a-khela, lo hire, tsangge lokethyünyu le tsüryüo a-ntsenlo la.

¹²Tsüselo mele Johan tenlo kela shalo njüo Jisu le ketu sen-o Galil nyu gunla.

¹³Lo Jisu le Nazaret nyu bin mvuo Galil züda khoki Zebulon lo Naftali au ja nyu kebin Kapernaum nyu gungü bin tinla.

¹⁴Lo tsüle kechamvule Isaya sidyükeshagü le zo kenjü tsüno penlo nrün genyu,

¹⁵“Jordan zürikho züda kipon kebin, Zebulon lo Naftali kazü, Juda kemvunyu Galil!

¹⁶Kezün nyu kebin temi dan le, keben keda nme hyulo so. Lo kesi kazü lo a-kengüshye nyu kebin dan ge, ben chwiryülo so,” tson.

¹⁷Tsüselo tsükitsü Jisu le me senthyüo, “Hagun nyu kelulo nye; tsangge keda khonni bin kelasi genyu,” tson.

¹⁸Tsüselo a-le Galil züda khoki gun kezhü ka, tsasikezen nyu mihvu, Simon Pitor tse kehügü lo a-sikezen gü Andria au le joh sen-o zü nyu tsehü ten bin, au le tsehüketennyu kethyü genyu.

¹⁹Lo Jisu le au ka, “Hai A sithenlo je, lo Ale hai no temi ketennyu thyülo ti,” tsonshü.

²⁰Tsüselo au joh tsü khe whütsela njüo a-sithen tinla.

²¹Lo a-le tsüka ni npha zhü ntsin tsasikezen kecha mihvu Zebedi nyu Jakob lo a-sikezen gü Johan, au le au pvü Zebedi zen-o run nyu joh nkhvü bin-o hyulo; tsüselo a-le tsühvu ko koshü.

²²Tsontsin au le au run lo au pvü khela njüo a-sithen tinla.

²³Tsüsika Jisu le ntsü sen-o Galil kazü aphu nyugun-o anyugun Sinagog ka nyu yügü me senthyü, lo jolokegwa rüla zope me zen-o temi dan kehokenyü aphu thyü ngwa shü.

²⁴Lo tsükatsü Siria kazü aphu nyu a-rüla zope sü gunla, lo kethyükenyü kechacha pvü kehü nyu aphu, lo tero gwakemvu no nchün ndyü zen kehünyu, lo terothonyu-e zen-o a-ki ryü, lo a-le tsüdan aphu thyü ngwashü.

²⁵Tsontsin Galil lo Dekapoli (Rünyi Tseryü) Jerusalem lo Judia kazü ki-e lo Jordan züri kho likipon kebin temi danda nme le a-sithen tinla.