Read Southern Rengma Naga MATHI 5 Bible Online

MATHI 5 - Southern Rengma Naga bible

MATHI 5

¹Lo Jisu le temi danda dan hyushü njüo rincho ge gunla. Lo gungü binlo ntsin a-sithen kehünyu dan le a-ki ryü,

²tsüselo a-le a-mün khope anyugun senthyü keshü le hihontse:

³“Kapu kipon rhokedyü nyu le jochü kepvü tsin; kechamvule tsangge keda le anyugun hon genyu!

⁴“A-nyun kenjünkethyü ju le jochü kepvü tsin; kechamvule tsüdan le a-nyun bwenlo nrün genyu!

⁵“Ketekho kemvunyu le jochü kepvü tsin; kechamvule kazü pe anyugun hon thyülo nrün genyu!

⁶“Kentsen füo kenyoketeri thyü kehünyu le jochü kepvü tsin; kechamvule anyugun ginnyülo nrün genyu!

⁷“Me shwinjün kehünyu le jochü kepvü tsin; kechamvule tsüdan shwikenjün hyulo nrün genyu!

⁸“A-nyun Kenshün nyu le jochü kepvü tsin; kechamvule tsüdan le Sunggigü hyulo nrün genyu!

⁹“Gwaketho füshü kehünyu le jochü kepvü tsin; kechamvule tsüdan le Sunggigü nyu, tse kolo nrün genyu!

¹⁰“Ketsin jo genyu me no nshwen nyhün kehünyu le jochü kepvü tsin; kechamvule tsangge keda le anyugun hon genyu!

¹¹“A genyu me no hagun nkhin, lo hagun nshwen lo nkuo hagun ge jogwakemvu aphu zolo, hagun le jochü kepvütsin.

¹²Hagun sherhünlo, lo hagun kenyü rilo, kechamvule tsangge hagun chün gwasa nrün genyu; tsühontse me le nduka hagun mhundyü kehü sidyükeshanyue nshwen nyhün sa ryü.

¹³“Lo hagun le kazü tsin so, ai tsi-e a-keyhün ndila yatselo, nyu lope thyü nyhün lo mon? tsüselo thalihi mvulao shwen pe me no kedüla hünyo.

¹⁴“Hagun le kazü keben gü. Rincho ge kebin rünyi le me le a-hyu mvula hümvu.

¹⁵Nmvue me le mah nben pe tha hensin ki mvule makenben bin ge shü njü hünyo; tsonyatselo ka nyukebin nyu aphu gwün nbenlo hünyo.

¹⁶Tsühontse me no hagun tho kegwa hyuo tsangge kebin hagun Pvü zankechwi thyülo nrün genyu hagun keben pe me gwün nben lochi.

¹⁷“Hagun Ale sidyükeshanyu ju jo lo tejvü gü bokemhenla titse gunryü letse kethyü rüchün nya nye. Ale tsü bokemhenla titse mvule thyü penshü titse gunryü.

¹⁸Lo ale hagun ka zo tsentsüshü ti, tsang lo kazü ndila kemvuthen lo tha hi aphu thyüla kemvuthen tejvü nyu i nme lo kethu jvü nme-e thame thyüo ndila loho.

¹⁹Tsügenyu temi ligü higüe johokeshü keshen tsin dan nyu jo nme gwünrho, lo tsü zope me senthyü yatselo, tsangge keda nyu a-no keshentsin thyü ti; ai temi ligü higüe tsü thyü zenlo zope me senthyü shülo, tsangge keda nyu keda thyü ti.

²⁰Tsüntimvule ale hagun ka zoshü ti, hagun le lesükesha tsinnyu lo Farisinyu kegwa nyeki gwakvu mvu yatselo, hagun le thame thyüo tsangge keda nyu yülo nrün ndi.

²¹“Nduka zo kenjü tsü hagun le nyülo laso, ‘Me dushvu nya; temi ligü higüe me dushvulo, jokera nyu kenshvu le bin nyo.’

²²Ai ale hagun ka zoshü ti: temi ligü higüe a-kon a-ni kendi ka a-tsasikezen nyu ge a-nyuntalo jokera bin nyu kenshvu le bin ti, lo temi ligü higüe a-tsasikezen nyu rholo pelü ju kehun ka kenshvu le bin ti, lo temi ligü higüe, ‘Nle kennunyu,’ tsonlo Gehena mah nyu kenshvu le bin nyo.

²³Tsügenyu nle tha sen-o kershvubin ge kegun ka, n tsasikezen nyu ge kenyokenyü kethyü nsi rüchünlo;

²⁴tson-o nle tha sen kegun gü khipe kershvubin mhundyü nyu binla njüo, gun gü n tsasikezen nyu zen-o kegwa thyüla rio, tsüsiki nyu gunryüo tha tsü hoshü chi.

²⁵“Lo nle nge kenyo kebin gü zen-o tsonne nyu kengügwa whütselo chi; nmvu yatselo nge kenyo kebin gü le nten pe jokera kehü güben nyu shüla ti, lo jokera kehü gü le nten pe kedagü ben nyu shüla ti, tson-o nten pe doka nyu shülae shamvu.

²⁶Ale nka zo tsentsüshü ti, nle gungü pisa nme-e tho penla kemvuthen we thame thyüo tsünyu chwilo nrün ndi.

²⁷“ ‘Nle keyüla loshvu,’ tson kenjü hagun le shalo semon?

²⁸Ai ale hagun ka zo tsentsüshü ti, temi ligü higüe keyüla nyüo tenunyu nri yatselo, a-nyun ki tsügi zen-o keyüla laso.

²⁹Lo nyhütyü njüzin le nthyü nshvulo nge tsü tseritho pe shwenla chi: kechamvule nmin aphu pe Gehena mah nyu shüla nrün we nthyü jünme ndi kela gü le nkechwi genyu.

³⁰Tsüntimvule nben njüzin le nthyü pe nshvulo, nge tsü duthü pe shwenla chi: kechamvule nmin aphu pe Gehena nyu rola nrün we nthyü peha ndi kela we nkechwi genyu.

³¹“ ‘Lo temi ligü higüe a-nu khela titselo a-khekela lesü pe tsünye,’ tsonkethyü thu njü.

³²Ai ale hagun ka zoshü ti, temi ligü higü keyüla genyu kemvu we a-nunyu khela yatselo, a-no keyülanyu thyüla hünyo; lo temi ligü higüe me le khekelagi lo yatselo, a-ko keyüla laso.

³³“ ‘Tsüntimvule nle nkuo swe nya, ai Sunggigü kipon swe-o zope bin kenjügü thyü penlo nye,’ tson-o ndukanyu le zokenjü hagun le shalo laso.

³⁴Ai ale hagun ka zoshü ti, thame zo-o swe nya; tsangge zo nya, tsüle Sunggigü Raja bin.

³⁵Kazüe zo nya, tsü le a-pha bin genyu; Jerusalem ko zo nya; tsüle Rajagü rünyi genyu.

³⁶Tsüntimvule nle npe-e zo-o swe nya, kechamvule nle shüntsü nme-e thyü pe chon nmvue metsen loho kethyü genyu.

³⁷Ai njo no ‘Ele’ tselo ele, ‘Nmvu’ letselo nmvu letselo; nmvuo tsünyeki chonla yatselo tsüle gwakemvu gü kanyu chwikeryü laso.

³⁸“ ‘Yhütyü nme lo yhütyü nme, hü nme lo hü nme tsonti; ’ tson kethyü zo kenjü hagun le shalo laso.

³⁹Ai ale hagun ka zoshü ti, gwakemvu nyu hontse nya; tsonkethyü mvule me le njon njüzin vüshülo kecha kipon-e kerüni pe tsü nye.

⁴⁰Lo me le nmirün lonyüo nzen gun gü jokera titselo, nphi-e sin pe tsü nye.

⁴¹Lo temi ligü higüe n kemvuthyüo nzen-o mail ja nme güti tselo, zen-o mail kenyhun-e gü nye.

⁴²Me le nka tha hilo, pe tsüshü nye; lo me le nka tha tepu kenyü nyu nrhila nya.

⁴³“ ‘Nle n kazonkazin solo, lo n shwikerüchün nyu shwirüchünlo,’ tson kezo hagun le shalo laso.

⁴⁴Ai ale hagun ka zoshü ti, hagun rinyu solo, jochü pe hagun swetsü kehünyu tsülo, lo hagun nshwen kehünyu genyu hilo.

⁴⁵Tsonlo yatselo hagun le tsangge kebin hagun Pvügü nyenyu thyülo ti; kechamvule a-le a-yhüko gü no kegwanyue gwakemvunyue benshü hünyo, lo tsangri pe kenjünyue lo njü kemvunyue tsüshü kehü genyu.

⁴⁶Tsonmvuo me le hagun so kehünyu nti so kehü gwünzin yatselo hagun le nyu hyulo mon? Khajana keshvunyue tsühontse hü mvu ole?

⁴⁷Lo hagun le hagun tsasikezen nyu nti rühvu kehü gwünzin yatselo, tsü le tha ole? Sunggigü shakemvunyue tsühontse thyülo hü mvu ole?

⁴⁸Tsügenyu tsangge kebin hagun Pvü le gwati kethyü hontse hagun ko gwatilo nye.