Read Southern Rengma Naga MATHI 6 Bible Online

MATHI 6 - Southern Rengma Naga bible

MATHI 6

¹“Temi no hyu titseo temi mhundyü ka hagun tho kegwa thyü mvulo nrün genyu petsü lo nye; kemvu we tsangge kebin hagun Pvü ki hagun chün nme-e hyulo ho.

²“Tsügenyu nle thape me ketsü ka, kerokon kehü temi dan le teshwen pvülo kenyü genyu sinagog ka nyu lo tsoncho nyu thyü kehü shu kekhun hontse sen bin nya nye. Ale hagun ka zo tsentsüshü ti, tsüdan we anyugun chün hyulo laso.

³Ai nwe thaho keshü ka nben njüzin pe keshü gü ngwazin no sha nya.

⁴Tson-o nle thaho keshü no kebulo; tsonlo yatselo kekebu ki hyu kehü npvü le nchün thyü pe ntsü ti.

⁵“Lo nle hi kethyü ka kerokon kehünyu hontse nya; tsüdan we me no hyu nrün genyu sinagog ka nyu lo tsoncho nyu bin-o hi kethyü tsü anyugun kenyü hünyo. Ale hagun ka zo tsentsüshü ti, tsüdan we anyugun chün hyulo laso.

⁶Ai nle hi kethyü ka, yügü nkanyu tsen ki kakhin pvüo kekebu ki kebin n Pvü ka hi lonye, tsonlo yatselo kekebu ki hyu kehü n pvü le nchün thyü pe ntsü ti.

⁷“Ai nle hi kethyü ka, Sunggigü shakemvunyu hontse nkezosi zonini nya, tsüdan we anyugun le jo kechon kezo genyu anyugun kehi thyüshü titse rüchün hünyo.

⁸Tsügenyu hagun we tsüdan hontse nya; kechamvule hagun Pvü le hagun le a-ka kehi mhundyü hagun rhokedyü shakü kebin genyu.

⁹Tsügenyu hagun hihontse hilo nye: ‘Tsangge kebin agun Pvü: Nzan kenshüngü thyülo;

¹⁰N keda no ryü kelogü thyülo; tsangge hontse kazü hiko pe nkendo thyülo.

¹¹Nthu agun chvü pe agun tsüshü.

¹²Agun le me kemu jüshü kehü hontse, agun kemu jüshü ta.

¹³Lo agun no kesemen nyu yüla nya, ai kesemen nyu agun kenishü ta.’

¹⁴“Hagun le me kemu jüpe me tsülo, tsangge kebin hagun Pvü ko hagun kemu jüpe hagun tsüti.

¹⁵Ai hagun le me kemu jü pe me tsümvulo, tsangge kebin hagun Pvü ko hagun kemu jüpe hagun tsü loho.

¹⁶“Tsüntimvule hagun le tyütsü mvuo nyen kethyü ka kerokon kehün nyu hontse, hagun mhu nsu bin nya; tsüdan we me no anyugun kenyen hyu nyüo anyugun mhu gwamvu sa bin hünyo. Ale hagun ka zo tsentsüshü ti, tsüdan we anyugun chün hyulo laso.

¹⁷Ai nwe nyen kethyü ka terzü pe npe yünlo, lo nmhue süla.

¹⁸Tson-o nkenyen me no hyu nya, ai kekebu ki kehü n Pvü no hyulo; tsonlo yatselo kekebu ki hyu kehü gü n Pvü le nchün thyü pe ntsü ti.

¹⁹“Shyebün nyun lo mokegwün no tyü pe ndila lokegwa lo kerühu nyue no rhen yügü rühulo kegwa kazü nyu hagun kenya kequen nya chi.

²⁰Tson kethyügü mvule shyebün nyun lo mokegwün no tyü kemhenlo keho lo kerühu nyu no durhen yügü rühulo keho tsangge hagun kenya kequenlo nye.

²¹Kechamvule nkenya kebin bin ki nyun-e tsüki bin kehü genyu.

²²“Nmin keben gü tsüle n yhütyü. Tsügenyu n yhütyü le gwa binlo, nmin aphu benchvü bin ti.

²³Ai n yhütyü gwamvulo, nmin aphu züntin lati. Tsügenyu nnyunki kebin keben gü tsüle zünlo ditsüki zünla tila!

²⁴“Mego thyü kehünyu temi nme le mihvu go thyü kerhün loshvu; tsonyatselo a-le nme shwinyü mvu, lo nme shwi pe a-kenyü lati; nmvue nme kipon bin tinlao kechagü ntsüla ti. Hagun Sunggigü lo Mammon au go thyü kerhün loshvu.

²⁵“Tsügenyu ale hagun ka zoshü ti, hagun keyhun rüla, ketyüketsü, nmvue hagun min genyu phinya, hidan rüchün pe hagun nyun kenjün thyü nya. N keyhun le nchvü nyeki gwakvu, lo nmin le nphinya nyeki gwakvu mvu ole?

²⁶Tegü rüla rüchün shwi; tsüdan le ntsi shü hümvu, nmvue gvüe hümvu, ai tsangge kebin hagun Pvü le tsüdan gin-e thyü hünyo. Hagun le tsüdan nyeki gwakvu mvu ole?

²⁷Hagun segü le a-nyun kenjünthyüo tsügenyu a-keyhun jon tsume kho-e thyü pe thonlo gwa tila?

²⁸“Lo nyuthyüo nphi nnya rüla rüchün pe nnyun kenjünthyü hü nla? Low nyu tegvütyü kepun rüla rüchün shü shwi; tsüle yhun sokeryü thae thyü hümvu, nmvue kedokezen-e thyü hümvu.

²⁹Ai ale hagun ka zoshü ti, Solomon a-ronye gwasa kethyü güe tsüdan hontse zegwa mvu.

³⁰Ai low nyu nthu yhun bin-o senduki phü pe mah nyu shüla nrün tehen dan-e Sunggigü le tsüdan nthyüshü hünyo, hire, hagun ketenyen kerho ju, a-le tsünyeki hagun phin rüchün kvu mvuti ole?

³¹“Tsügenyu hagun we, nyu tyütsü tiyo tsekethyü. nmvue nyu lope nkanyü nthyü tiyo tsekethyü rüchün pe hagun nyun keyhun kerun nya.

³²(Sunggigü shakemvunyu le a-zintse tha hidan hi fü bin hünyo.) Ai tsangge kebin hagun Pvü le hagun le tha hidan hi aphu senmvulo keshvu tsü shakü bin nyo.

³³Ai hagun we Sunggigü keda kethyü lo a-kentsen fü terilo, tsonlo yatselo tha tsüdan aphu pe hagun tsü tsinshü ti.

³⁴Tsügenyu senduki phin rüchün pe hagun nyun kenjün thyü nya; kechamvule sendukinyu senduki phin rüchünlo gwa kethyü genyu. Khenyütsen genyu tsünyü phin rüchün mvulo keshvu kho le bin kü.