Read Southern Rengma Naga MATHI 8 Bible Online

MATHI 8 - Southern Rengma Naga bible

MATHI 8

¹Tsüselo Jisu le rincho ge tsenryü ntsin temi danda le a-sithen ryü.

²Lo hire, Nyun le ketyünyu nme le ryüo a-rüshvu, “Npugü, Nkendolo, nle athyü nshün shü logwa; ” tsonshü.

³Tsontsin Jisu le a-ben shwen pe temi tsügü ge shüo, “A kendo le, nle nshünlo chi,” tsontsin nyun le ketyü tsüle nshünlo la.

⁴Lo Jisu le a-ka, “Nle me ka zoshvu tsin, ai gü nmin pe peshükeda gü no nri nye, tson-o me no shalo nrün genyu Mosa le zokenjü phukerho jvügü thyüla nye,” tsonshü.

⁵Tsüselo Jisu le Kapernaum nyu yü ntsin tsiso kedanyu nme le ryüo tenge tse a-ka,

⁶“Npugü, agogü le terotho thyüo kenjünthyüo ka nyu yhon bin nyo,” tsonso.

⁷Tsontsin a-le a-ka, “Ale ryüo a-thyü ngwashü ti.”

⁸Ai tsiso kedagü le a-ka, “Npugü ale nno aka hensin yüryülo kümvu, ai nle jo nme zoshülo agogü le gwalo ti.

⁹Kechamvule ako kedanyu hensin kebin nyu nme; lo a hensin-e shüpahünyu le bin nyo; lo ale nme ka, ‘Nle gun chi,’ tsonshülo a-le gun hü nyo; lo kechanyu nme ka, ‘Nle ryü re,’ tsonshülo ryü hünyo; lo agonyu ka, ‘Nle hithyüshü re,’ tsonshülo a-le tsüthyüshü hünyo.”

¹⁰Lo Jisu le jotsü nyülo ntsin a-dun thyülo njüo a-sikethen nyu ju ka, “Ale hagun ke zo tsentsü shü ti. Ale Israel nyu dan nyu ketenyen keda hihontse kethyü hyumvu zun.

¹¹Lo ale hagun ka zoshü ti, yhüko kechwi kipon lo yhüko keche kipon temi kechon le ryüo tsangge keda nyu Abraham, Isak, Jakob nyugun zen bin tinla ti.

¹²Ai keda nyenyu ju we khipe kamhun kezün ki shü lati; tsünyu chü lo hüketa bin ti.”

¹³Tsonshüo Jisu le tsiso kedagü ka, “Gunlo, nle tenyen kelo hontse ngenyu tsü thyü penlo nye; ” tsontsin go tsügü le tsügwünkho ka tsü ponlo la.

¹⁴Lo Jisu le Pitor ka nyu yü ntsin tsügü nu a-jvü le rükao zhü kebin hyulo.

¹⁵Tson-o a-le tenu tsügi ben kesüshü ntsin a-le rüka mvula; tsontsin tsügi le soryüo a-lothyü shü.

¹⁶Lo tsüje me le tero gwakemvu le zen kehünyu kechon zen ryü lo a-jo no tero tsüdan hüla, lo kehokenyünyu aphu thyü ngwashü.

¹⁷Hile Isaya sidyükeshagü le zo kenjü no penlo nrün genyu, “A-le nkvukemvu lo kenjünkethyü khilola, lo nkethyükenyü dan pvülola.”

¹⁸Tsüsika Jisu le temi danda nme le a-hunpvü kebin hyulo njüo a-le tsüdan no perezin külo lotse ahza hoshü.

¹⁹Lo tsükatsü lesükeshanyu nme le gunryüo a-ka, “Senkethyü gü, nle dika gü tiyo ako nsithen tile,”

²⁰Tsontsin Jisu le a-ka, “Mesükerun-e a-kü le bin, lo tegüe a-sü le bin; ai temi Nyugü we a-pe lope tesun kelo bin-e ndi.”

²¹Lo senthyükelo kecha nme le a-ka, “Senkethyü gü, ano gungü apvü sunla rilo.”

²²Ai Jisu le a-ka, “A sithenlo, lo kesinyu no a-npvü kesinyu sunlalo,” tsonla.

²³Tsüsika a-le run nme nyu yülo ntsin senthyükelo ju le a-sithen gunryü.

²⁴Lo hire, züda nyu tsü terün thyü ryü,lo zükenkhün le run tsü ketyü sen tinla, ai a-le tsüka zhü bin.

²⁵Tsontsin anyugun le gungü a-kesun-o a-ka, “Agun kenishülo, Npugü, agun le nke güzhü laso!” tsonshü.

²⁶Lo a-le anyugun ka, “Hire, ketenyen kerho ju, hagun le nyuthyüo nshvu hü nla?” Tson-o a-le sogü tsangkenbu lo züda rhoshü; tsontsin ma tsela.

²⁷Tsügenyu temi ju no a-dun thyüo, “Tsangkenbu, lo züdae a-jo zen kehü hile temi nyutsekethyü nme sela?” tsonla.

²⁸Tsüsika a-le tsü nken gun gü Gadaranyu kazü tilo ntsin gwakemvu kapu no nthyü nnyü zen kehü nyu mihvu le me sika nyu chwiryüo a-tenolo, lo au jvü gwamvu pe ketetsin thyü kethyü genyu temi nme-e tsütson zen gunlo hümvu.

²⁹Lo hire, au le Jisu tenolo ntsin sen-o, “Sunggigü Nyugü, Nle ayi zen-o nyuthyü mon? A-gwünkho tikemvu ka nle ayi nthyü nyü titse ryü ole?”

³⁰Lo tsükatsü tebo dan me le anyugun kepen ka a-chvü hotyü bin.

³¹Lo tero gwakemvu ju tsüle a-ka, hio, “Nle agun hüshwi shülo agun nipe tebo dan nyu tsü shülo.”

³²Tsontsin a-le anyugun ka, “Gülo,” tsonshü ntsin anyugun le chwio tebo dan nyu yüla; lo hire, tsü aphu tin sen-o tsokhin nyu yügü züda nyu nke küla.

³³Tsontsin kekhwenyu dan le tin-o nyida gü nyu gungü tero gwakemvu le zen kehü hvu ge tha thyükela dan aphu zoshü.

³⁴Lo hire, Nyida tsünyu kebin aphu Jisu zen keteno titse chwiryü, lo anyugun le a-hyulo ntsin a-no anyugun kazü nken tinla lotse tenge tse hi sola.