Read Southern Rengma Naga MATHI 9 Bible Online

MATHI 9 - Southern Rengma Naga bible

MATHI 9

¹Tsükatsü a-le run nyu yüo a-rünyi ki gunla.

²Tsontsin hire, temi dan me le terotho kethyü nme a-zhü nyuzhü gwünzin kehünyu nme zen ryü; lo tsüka Jisu le temi tsü dan ketenyen hyulo-o terotho gü ka, “A nyugü, ndyü benlo chü! Nkemu jüshüla sele.”

³Tsontsin hire, lesükeshatsinnyu dan me le anyugun npvü anyugun nyun ki, “Temi higü hile Sunggigü nkhin hünyo.”

⁴Ai Jisu le anyugun nyun kerüchün shalo njüo, “Hagun le nyuthyüo tha gwakemvu rüchün hü nla?

⁵‘Nkemu jüshüla sele nye,’ tsonkezo, lo ‘So-o tsonchülo chi,’ tson kezo jo hihvu digü le zo nne kvula?

⁶Ai temi kemu jüpe tsülo kegwa kazü hinyu Temi Nyugü kekvu le kebin hagun no shalo titse kethyü genyu.” Tson-o a-le terothogü ka, “So-o nzhü khilo njüo, nkaki gunla chi!” tsonshü.

⁷Tson zoshü ntsin temi tsügü le solo njüo a-ka ki gunla.

⁸Lo temi le tsü hyushüo shwi nshvula, lo kekvu tsühontse kethyü pe temi ge keshü genyu Sunggigü shwenla.

⁹Lo Jisu le tsünyu chwi zhü ntsin a-zan le Mathi tsekethyü nme le khajana keshvu bin nyu bin-o hyulo; tson-o a-le tsügü ka, “A sithenlo re,” tsontsin tsügü le a-sithen tinla.

¹⁰Tsüselo a-le yügü Mathi kanyu tyütsü bin ntsin hire, khajana keshvunyu lo kemunyu kechon le gunryüo Jisu lo a-sikethen nyu dan zen-o binlo.

¹¹Lo Farisinyu dan le tsü hyushüo Jisu le senthyükelonyu dan ka, “Hagun senkethyügü le nyuthyüo khajana keshvunyu lo kemunyu zen-o tyütsü hü nla?” tson.

¹²Ai Jisu le jo tsü shalo njüo, “Kegwanyu le dawa keshanyu zen-o thame kethyüi ndi, dawa keshanyu le kehonyu genyu le.

¹³Hagun gun gü ale kershvu gü mvule shwikenjün gü le akenyü, tson zo kenjü gü jo tsü a-kon rüchünlo nye; kechamvule ale kentsennyu mvule kemunyu kolo titse keryü genyu,” tsonla.

¹⁴Tsontsin Johan le senthyükelo nyu dan le Jisu ki ryüo, “Nyuthyüo agun-e lo Farisinyue nyen-o hi hünyo ai nle senthyükelonyu dan we nyen hümvula?”

¹⁵Ai Jisu le tsüdan ka, “Senhüho nyu senhügü le tesin dan zen kebin ka, anyugun le nyungwamvu bin logwa ole! Ai anyugun dan nyu senhügü zen tinkela gwünkho le gunryü ti, tsünyü anyugun le nyen ti.

¹⁶“Lo temi nme-e phi keshün sen gü phiren nkhvü hümvu, kechamvule nkhvü keshü phi gü le ligü sürhenla hünyo. Tson-o nrhen ketsin la hünyo.

¹⁷Lo temi nme-e vain zu keshün pe thyügi khin when nyu shü hümvu; tsonshü yatselo thyügi khin pvürhenla ti, tson-o vain zu no tsunla ti, lo thyügi khin-e gwamvu la ti. Ai vain zu keshün pe thyügi khin keshün ka shü hünyo, tsügenyu kenyhun nren gwa bin hünyo.”

¹⁸Lo a-le anyugun ka johi zoketse ka, hire, peshünyu nme le ryüo a-rüshvuo a-ka, “A nyu le ntsoka sila so, ai nle ryüo nben pe a-ge shüshülo, tsonlo a-le rhünlo ti.”

¹⁹Tsüselo Jisu le solo njüo a-kethennyu dan sin tse tsügü sithen gunla.

²⁰Lo Tsükatsü chen tseryü kenyhun che tezi tsun hü kela tenunyu nme le a-sizin gunryüo a-phishwe kesüshü.

²¹Kechamvule a-le a-nyunki, “Ale a-phi kesüshü gwünzin-e gwalo ti,” tson rüchün kehü genyu.

²²Lo Jisu le ranigü a-hyulo njüo a-ka, “A nyugi, ndyübenlo chi, nketenyen le a-npvü nthyü ngwashü sele,” tsonshü. Tsontsin tsügwünkho ka tsü tenunyu tsügi thyü ngwashü la.

²³Lo Jisu le gungü peshü gü ka tikelo ka kheli kekhunyu le kevü keben kebin hyulo.

²⁴Tson-o a-le anyugun ka, “Hagun tinla chi; lünyu higi le sila mvu, ai zhü kebin gwünzin,” tsonshü. Tsontsin anyugun le a-shwinyü la.

²⁵Ai temi tsüdan hü pe kamhun ki shükela siki a-le kanyuki yügü lünyugi ben süshü ntsin, a-le soryüla.

²⁶Tsontsin kazü tsügü nyu aphu tsü rüla zo sü gunla.

²⁷Lo Jisu le tsünyu gunzhü ntsin a-yhütyü keponyu mihvu le a-sithen-o nra sen-o, “David Nyugü, Nle ayi shwinjün shüta!”

²⁸Tsüselo Jisu le me ka nyu yüla ntsin a-yhükepo hvu ko a-then yüla, tsükatsü Jisu le au ka, “Ale hi thyü logwa letse kethyü hai le tenyen bin nle?” Tsonsin au le, “Ele, Npugü,” tsonshü.

²⁹Tsontsin a-le au yhütyü kesüo, “Hai ge hai ketenyen hontse thyülo chi!” tsonshü. Tsüselo au yhütyü tsüle kochwiryüla-

³⁰tsüselo Jisu le au khin tenge tseo, “Temi nme-e no shamvu nrün genyu hai ndolo chi!” tson.

³¹Ai au le chwi ntsin kazü tsünyu me le a-rüla zoshwen zonye la.

³²Tsüsika anyugun le gun kezhü ka, hire, me le tero gwakemvu le zen kehü lo jozolo kemvunyu nme zen a-ki gunryü.

³³Lo tero gwakemvu tsü hüla ntsin jozolo hükemvu gü le jozo shwi chwiryüla, tsontsin temi dan le anyugun dunthyüo, “Israel nyu dan nyu honkethyü thame kae hyu hü mvu.”

³⁴Ai Farisinyu dan le, a-le tero gwakemvu kedagü zen-o tero gwakemvu hüla hünyo, tsonla.

³⁵Tsüsika Jisu le rünyi nyida nyue lo rünyi keshen kae aphu ka gun-o anyugun sinagog ka nyu yügü me senthyü; lo keda jolokegwa zope me hi, lo me kehokenyü aphu lo kenjünthyü kebin nyu aphu thyü ngwa küshü.

³⁶Lo a-le temi dan kehyu ka anyugun le tanyü a-kekhwen kendi hontse kenjün thyü lo tsenchvü tinkela genyu a-le anyugun shwi njün sala.

³⁷Tsükatsü a-le senthyükelonyu dan ka, “Lowbin le chonsa, ai lothonyu rhori.

³⁸Hagun tsügenyu low Npugü no thakethyünyu nipe a-low ki shülo nrün genyu hilo chi.”