Read Southern Rengma Naga MARK 10 Bible Online

MARK 10 - Southern Rengma Naga bible

MARK 10

¹Tsüsika Jisu le tsünyu solo njüo Judia lojvü teki lo Jordan züri se likipon ryüla. Tsükatsü temi danda gü tsüle a-ki niryülo, lo a-le ajvü hontseo temi tsüdan senthyü nishü.

²Lo tsükatsü Farisinyu le ryüo a-ka, “Pechenyu le a-nunyu khekela tsüle tejvü ole?” tson-o a-semen-o a-ketso so.

³Tsontsin a-le anyugun ka, “Mosa le nduka hagun ka nyu zoshü la?”

⁴Lo anyugun le, “Mosa we khekela lesü thu pe tsüla njüo khela lotse zole.”

⁵Ai Jisu le anyugun ka, “Hagun nyun kerü genyu a-le nduka tsühontse thu shü le.

⁶Ai sokerika Sunggigü le thyükeshü we peche nme lo tenu tse thyüshü.

⁷Tsügenyu pechenyu le a-pepvünyu khelao a-nunyu kho nni tinla ti, lo au le kengüo thyüme thyüla ti.

⁸Tson-o au kecha thyüo kenyhun thyü mvule thyüme thyü lati.

⁹Tsügenyu Sunggigü le thyü kerhün keshü tsü temi no thyürhola nyalo.”

¹⁰Tsüsika senthyükelo nyu dan le ryüo kanyu tsü rüla Jisu ka ketsoshü.

¹¹Tsükatsü Jisu le anyugun ka, “Temi lihigüe a-nunyu khelao tenu kecha loni yatselo a-le a-nu nyhen-o keyüla laso.

¹²Lo tenunyu-e a-npvü a-nyepvünyu khelao kechanyu ka kaluni yatselo tenu tsügi-e keyüla laso.”

¹³Tsüsika mele Jisu no ntsenyu dan kesüshü lotseo ntsenyu dan me zen ryü; ai senthyükelonyu dan le tsüdan kesüla.

¹⁴Tsüselo Jisu le tsü shwi pe a-kenyü mvuo anyugun ka, “N tsenyu dan no aki ryülo, anyugun khin nya chi; kechamvule Sunggigü keda le hihontse kethyü nyu hon kethyü genyu.

¹⁵Ale hagun ka zo tsentsü shüti, temi lihigüe ntsenyu nme hontseo Sunggigü keda fülo kemvu we a-le tsünyu yü keloi kemvu genyu.”

¹⁶Tson-o a-le tsüdan pensolo njüo a-ben hvu lope tsüdan ge shüo jochü pe tsüdan tsüshü.

¹⁷Tson-o a-le tson nyu gunzhü kethyü ka temi nme le n ton ryüo a-mhundyü ka nkhüntsü lo njüo, “Hire, senkethyü kegwa gü, ale kethonthen kerhün hyulo nrün genyu dihontse thyülo mvuloshvu la? tson-o Jisu ka ketsoshü.”

¹⁸Tsontsin Jisu le a-ka, “Nle nyuthyüo ano kegwa gü letse hü nla? Kegwagü tsüle nme nti a-me kecha ndi, lo tsüle Sunggigü le,” tsonshü.

¹⁹Tson-o a-le a-ka, “Nle me dushvu nya, keyüla nya, rühu nya, kenku jünzo nya, mekesa jozo nya, Npvü njvünyu rühvulo,” tson kenjü johokeshü jo nko sha bin ti.

²⁰Tsontsin a-le Jisu ka, “Senkethyü gü, ale a nchekanyu hi aphu zen soryü laso.”

²¹Tsontsin Jisu le a-nrishüo a-shwi njünla njüo, “Nle tha nme timvu bin zun, gü nhon kebin tsü aphu jwen pe kendinyu tsüla chi, tsonlo yatselo nle tsangge n kenya chonlo ti, tson-o ryü a sithenlo chi.”

²²Ai temi tsügü le Jisu jo tsügenyu a-mhun susen lola, tson-o a-nyun gwamvu satseo tin gunla; kechamvu le a-le nnya sa kebin nyu nme kethyü genyu.

²³Tsontsin Jisu le kerükerio a-le senthyükelo nyu dan ka, “Kenyanyu le Sunggigü keda nyu yü tsensa kethyü hile la?”

²⁴Lo senthyükelo nyu dan le a-jo tsügenyu anyugun dun thyüla; ai Jisu le anyugun ka, “Hire, ntsenyu ju, temi a-npvü a-kenya tenyen kehünyu le Sunggigü keda nyu yü tsenri hile!

²⁵Kenyanyu nme no Sunggigü keda bin nyu yü nrün we mvuo ut khipe chwenkü nyu kenna we nne kvu ti.”

²⁶Tsontsin anyugun le anyugun dunthyüo a-ka, “Tson yatselo senyu le kenikelo hyulo gwa tila?”

²⁷Tsontsin Jisu le anyugun nrilo njüo, “Temi le tsü thyü loho, ai Sunggigü we tson mvu; kechamvule Sunggigü we tha lihie thyülo gwa kethyü genyu.”

²⁸Lo tsüsika Pitor le a-ka zo, “Agun we tha aphu khelao nsithen tila so,” tson sola.

²⁹Lo Jisu le, “Ale hagun ka zo tsentsü shüti, temi nme-e a genyu lo jolokegwa genyu tseo, a-ka, nmvue a-tsasikezen nyu, nmvue a-lüginyu, nmvue a-jvünyu, nmvue a-pvünyu, nmvue a-nyenyu, nmvue a-low khelao;

³⁰ntsoka keyhun hinyu meno a-nthyü nnyü kehünyu le, a-ka, a-low, a-tsasikezen nyu lo a-lüginyu, lo a-jvünyu lo a-nyenyu lo a-kazü jün tsi-e hyulo keho ndile; tsüntimvule siki kethonthen kerhün-e hyu sinlo ti.

³¹Ai kerinyu kechon le khinla ti, lo kekhinyu kechon le rila ti.”

³²Jisu lo a-le senthyükelo nyu dan le Jerusalem nyu nsin titseo tson nyu kehü ka, Jisu le anyugun mhundyü ka hü. Tsontsin anyugun le anyugun dunthyüla; tson-o anyugun sikethen nyu dan le nshvu lola. Tsükatsü a-le tseryü kenyhun che dan zenlo njüo a-ge tha thyüla nrün rüla zope anyugun hi.

³³Lo a-le, “Hire, ngun le Jerusalem nyunsin zhü; lo mele Temi Nyugü ten pe peshükeda tsin ju lo lesükesha tsin ju ka shü lati, lo anyugun le a-nmuo a-dushvula lotse soti, tson-o a-khipe Judakemvu nyu dan ben ka shü lati.

³⁴Tson-o tsüdan no a-khipe keyüthyü, lo nsü pe a-nye ti, lo a-vüti, tson-o a-dushvu lati; lo jonshen siki a-le rhünniso lati,” tson zoshü.

³⁵Tsüsika Zebedi nyuhvu Jakob lo Johan au le a-ki ryüo a-ka, “Senkethyü gü, ayi le nka tha hi titse kebin gü ayi le nno tsü thyü pe ayi tsünyü bin nle.”

³⁶Tsontsin a-le au ka, “Hai le ano nyuthyü pe hai tsünyü bin nla?”

³⁷Tsontsin au le a-ka, “Nle zankechwi kethyü nyü ayi nme no nben njüzin lo nme no ngwazin tse binlo kegwa hoshülo.”

³⁸Ai Jisu le au ka, “Hai le hi kebin gü tsü shao hi bin mvu; hai le ale tsü titse kebin honpen gü tsü tsülo gwa ti ole? Lo ale baptaiz thyülo nrün baptism gü pe baptaiz thyülo gwa ole?”

³⁹Tsontsi au le a-ka, “Ayi le tsü thyülo gwa le.” Lo Jisu le au ka, “Hai le ale tsü titse kebin honpen gü tsülo gwa, lo ale baptaiz thyülo nrün Baptism pe baptaiz thyü ti.

⁴⁰Ai aben njüzin lo ngwazin binlo nrün we ale khishülo nrün ndi; ai Sunggigü le bin tsü hvu khipe a-le tsüti tseo ndo kebin nyu tsü ti.”

⁴¹Tsüselo mitseryü dan le tsü shalo ntsin Jakob lo Johan au ge anyugun kenyü mvulo la.

⁴²Tsükatsü Jisu le anyugun kope a-ki shülo njüo anyugun ka, “Sunggigü shakemvunyu le meno anyugun kekhenilo kegwanyu no anyugun sogo hünyo, lo anyugun le kedanyu ju no anyugun so npu thyü kehü hagun ko sha bin ti.

⁴³Ai hagun we no tsonlo ho; temi lihigüe hagun dan nyu gon kenyünyu no hagun leyi ti.

⁴⁴Lo temi lihigüe hagun dan nyu rilo kenyü güno hagun aphu lothyü ti.

⁴⁵Kechamvule Temi Nyugü ko meno a-leyi titse mvule me leyi titse lo a-phou hoshüo temi kechon rhinhilo titseo ryü kethyü genyu.”

⁴⁶Tsüselo anyugun le Jeriko rünyi nyu ryülo; lo a-le Jeriko rünyi nyu a-le senthyükelo nyu lo temi danda dan zenchwi kezhü ka Timia nyugü Bartimia tsekethyü gü le a-yhütyü po lao tson khoka bin-o shvutyü bin hü.

⁴⁷Temi tsügü le Nazaret nyu Jisu letse kethyü shalo ntsin nra sen-o, “David nyugü Jisu, nle ashwi njün shülo!” tson sola.

⁴⁸Tsontsin temi kechon le a-no nra nyalo tseo a-kesü sola; ai a-le nra sennio, “David nyugü, nle ashwi njüshülo!” tsonni sola.

⁴⁹Tsükatsü Jisu le sunlo njüo, “Hagun a-ko shü chi.” Tsonshü ntsin anyugun le a-yhütyü kepo gü ko-o, “Nnyungwamvu nyao solo chi! A-le nko bin nyo!” tsonshü.

⁵⁰Tsontsin a-le a-phinya khela njüo tsonchü sen-o Jisu ki ryü.

⁵¹Lo tsükatsü Jisu le a-ka, “Nle ano nge nyu thyükeshü le nkendo la?” Tsontsin a-yhütyü kepo gü le a-ka, “Raboni, ano tha hyulo ta!”

⁵²Tsüselo Jisu le a-ka, “Tsonchü gunlo, nketenyen le nthyü ngwa shü laso!” Tsonshü ntsin a-le tha hyulo njüo tsonchü sen-o a-sithen tinla.