Read Southern Rengma Naga MARK 11 Bible Online

MARK 11 - Southern Rengma Naga bible

MARK 11

¹Lo anyugun le tsonchü sen-o Jerusalem khokeni Oliv kazüthun khoka Betfage lo Bethani nyu ryülo ntsin a-le senthyükelo nyu mihvu nishüo au ka,

²“Hai tsonchü sen-o hai mhundyü ka kebin rünyi nyu tsü gunlo chi; lo hai le tsünyu yülo ntsin nduka temi nme-e a-ge küshwi kemvu gada nyu nme dyü pe bin kenjü hyulo tile nye. Tsügenyu hai le tsügü shwülo njüo zen ryü chi.

³Lo temi peha le hai ka, hai le nyuthyüo tson bin la? tsonyatselo, hai le, Npugü le higü sen-o tha nme thyü titse yale,” tson zoshülo a-le khishü ti.

⁴Tsontsin au le gun laryü tsonte nyu gada nyu nme pe ka nme kakhin ge dyü pe bin kenjü hyulo, lo au le gada nyu gunda kedyü tsü shwülo.

⁵Tsüselo tsüka kebin temi peha le au ka, “Hai le nyu thyü titseo gada nyu gü shwü bin nla?”

⁶Lo au le Jisu le au ka kezo hontse pe anyugun ka zoshü, tsontsin anyugun le au khin mvula.

⁷Tsüselo au le gada nyu gü zen-o Jisu ki ryüo a-ge anyugun phi pe lashü; tson-o Jisu no tsü ge binlo.

⁸Tsüntimvule temi kechon le a-phi lope tson nyu lashü; lo kechanyu we low nyu bokelo tehen jonnyü sen ryüo tson lashü.

⁹Tson-o rikehü ju lo khin kehü ju le nra sen-o, “Hosana, Npugü zan sen-o ryü kezhü gü le kegwa tsin gü le!

¹⁰Npvü David raja bin nyu Raja thyü ryü kezhü gü le kegwatsin gü le! Tsangge jochü no n ge ryü kelo gü thyü lo chi!” tson sola.

¹¹Tson-o a-le Jerusalem Kershvuka nyu yülo njüo; rani gü lukipon hikipon tha aphu pen shü ntsin ntsüla, tsüselo a-le tseryü kenyhun che dan zen-o Bethani nyu gunla.

¹²Lo tsüsinyü anyugun le Bethani nyu chwiryü kezhü ka a-le nnyon la.

¹³Tsükatsü a-le ntsenki kherobin nme le a-nyü sen kebin hyu shüo tsügü ka tha peha hyukelo rüchün-o,tsüka gü, ai a-le tsügü ka kegü ka, a-nyü nti a-me tha nme-e hyulo mvula; kechamvule tsügwünkho tsüle kherosha le nsha hü kemvu gwünkho kela genyu.

¹⁴Tson-o a-le kherobin tsü gü ka, “Nthu gerho temi nme-e no nge nsha tyü nyalo,” tsonla. Lo tsükatsü a-le senthyükelo ju le jo tsü sha.

¹⁵Tsüselo anyugun le Jerusalem nyu ryülo; tson-o Jisu le Kershvuka nyu tha hei thajwen kebin dan hü sola, lo seki raka kelu kebin dan miz-e lo paro jwen kebin bin-e bokekhün la.

¹⁶Tson-o a-le temi nme-e no tha khini sen-o Kershvuka nyu nigun mvula.

¹⁷Tsüntimvule a-le anyugun senthyüo, “Aka no kehi ka tse kethyü temi aphu no koti tson thu pe bin njü mvu ole? Ai hagun le hilope me hon seketyü ka thyü bin laso.”

¹⁸Tsüselo peshü keda ju lo lesü keshatsin ju le jo tsü shalo njüo a-dushvukela rhiso; kechamvule temi aphu a-jo tsü shao anyugun dunthyü lo anyugun le a-rüla rüchün pe nshvu kela genyu.

¹⁹Lo n gwünlo ntsin anyugun le rünyi tsünyu tinla.

²⁰Tson-o lonyü gü anyugun le tson tsügü zenni ryü kezhü ka kherobin tsügü le si tsügü a-me ti kebin hyulo.

²¹Tsükatsü Pitor le a-si rüchünlo njüo Jisu ka, “Rabi, hire, nle kherobin swetsü keshü gü tsüle sila so.”

²²Lo Jisu le anyugun ka, “Hagun Sunggigü kipon hagun ketenyen no binlo chi.

²³Ale hagun ka zo tsentsü shüti, temi lihigüe kazüthun higü ka, ‘Nle ketu sen-o züda nyu yüla chi,’ tson-o kenyun hvu mvushüo a-le zokeshü gü tsü thyülo titse rüchün yatselo, tsü thyülo ti.

²⁴Tsügenyu ale hagun ka zoshü ti, hagun le hagun nyun ketsin thyüo tha lihi-e hi yatselo, tsü hyulo laso tsekethyü rüchün lo chi; tsonlo yatselo tsü hyulo ti.

²⁵Lo hagun le lihikae hi titseo so kelo ka hagun le temi peha ge tha peha le bin yatselo, tsü jü pe tsüla, tson yatselo tsangge kebin hagun Pvü ko hagun kemu jü pe hagun tsü lati.

²⁶Ai hagun le me kemu jü pe me tsü mvulo tsangge kebin hagun Pvü ko hagun kemu jü pe hagun tsü loho.”

²⁷Tson-o anyugun le Jerusalem nyu niryüo a-le Kershvuka nyu kehü ka peshükeda ju lo lesükeshatsin ju lo pelü ju le a-ki ryü.

²⁸Lo anyugun le a-ka, “Nle nyu kekvu sen-o tha hidan hi thyü hü nla? Nmvue segü le nno tha hidan hi thyü kelo kekvu pe ntsü shü la?”

²⁹Tsontsin Jisu le anyugun ka, “Ale hagun ka tha nme ketsoshü ti, lo hagun le tsü pe aka zoshü yatselo ako nyu kekvu sen-o tha hidan thyü hüyo tsekethyü pe hagun ka zoshü ti.

³⁰Johan baptist gü tsü le tsangge le temi ge gunryü la? Tsü pe aka zoshü ta.”

³¹Tsükatsü anyugun le anyugun npvü gü kenthon-o, tsangge letse kethyü zo yatselo a-le anyugun ka, tsonlo hagun le nyuthyüo a-tenyenlo mvu la? tson sola ti.

³²Nmvue temi ge ryü le tse zolo temi aphu Johan tsüle sidyükeshanyu nme tse zo kehü genyu, anyugun le temi dan le tso pe anyugun jon nrün nshvula.

³³Tson-o anyugun le Jisu ka, “Agun le tsü shamvu le.” Tsontsin Jisu le anyugun ka, “Ako nyu kekvu sen-o tha hidan hi thyü lo yo tsekethyü pe hagun ka zo loho,” tsonla.