Read Southern Rengma Naga MARK 12 Bible Online

MARK 12 - Southern Rengma Naga bible

MARK 12

¹Tsüselo a-le jokejvü pe anyugun ka zo sola, “Temi nme le vain low tsüshü, lo a-le chwi thyü pe hunlo, tson-o vainsha kethün bin nme thyülo, lo rikhun bin nme thyülo njüo tsü pe low ketsü nyu dan me tenyen shüo a-le rünyi kecha nme ki gunla.

²Tson-o a-gwünkho ka low ketsü tsüdan ka, vainsha hyukelo rüchün-o a-le a-gonyu nme nishü.

³Tson-e anyugun le temi tsügü tenlo njüo a-vü, tson-o thame pe a-gogü tsü tsümvuo a-no gunla.

⁴Tsüsika ko a-le a-go kecha nme nipe tsüdan ka shünishü; tsüselo anyugun le a-pe vü nthyü sa shüo a-nshwen nyhün sala.

⁵Lo tsüsika ko a-le a-gonyu kechanyu nme ni nishü, ai anyugun le tsügü ko dushvu nila. Lo tsüsiki-e kechanyu kechon sin nishü, ai anyugun le peha vü lo peha dushvu la.

⁶Tsüsiki-e a-le temi nme le bin zun, tsügü tsü le A-nyu A-kesogü. A-le hihontse rüchün-o zo, ‘Anyugun le Anyugü we rühvulo ti,’ tson-o a-nyugü nipe anyugun ki shü kenkhin tsin thyüshü.

⁷Ai low ketsünyu dan le anyugun npvü kenthon-o, ‘Higü hile a-hon tha aphu gwenlo nrün gü, nu, ngun a-dushvula nu! tson-o a-hon tsülope ngun hon thyülo ti!’

⁸Tson-o anyugun le a-tenlo njüo a-dushvula, lo a-khipe vain low n gwenzin shwe shüla.

⁹“Tsonyatselo vain low npugü le dihontse soti la? Jisu le ketso.” “A-le ryüo low ketsü tsüdan dushvu küla ti, tson-o low tsü lope kechanyu tsü la ti.

¹⁰‘Tso keyhen nyu le khekela tso gü mele tsü lope a-qün nyu keda tsingü thyüla.

¹¹Lo tsü Npugü ge thyülo laso; lo tsü rüchün pe ndunthyü!’ Tsonkethyü ketsinlesü jo higühi hagun le swü mvu ole?”

¹²Tsükatsü a-le anyugun ta-o jokejvü higühi zo, tsekethyü anyugun le shalo njüo a-tenkelo rüchün so, ai temi dan kenshvu genyu anyugun le a-khelao tinla.

¹³Tsüsika anyugun le a-jo ka a-ten kelo rüchün-o Farisinyu lo Herodianyu peha nipe a-ki shü.

¹⁴Lo tsüdan le ryüo, “Senkethyü gü, nle ketsingü le, lo nle temi nme-e nshvu hü kemvu agun le shabin nyo; kechamvule nle temi nme-e so kecha thyü hümvu, ai joketsin zo-o Sunggigü tsongü rüla zope mehi kehü genyu. Kaisar khajana pe ketsü le tejvü le mvula?”

¹⁵Ai a-le anyugun kerokon shalo njüo anyugun ka, “Hagun le nyuthyüo asemen hü nla? Ano shwishü nrün genyu pisa sen aki ryülo.” Tsontsin anyugun le pisa tsü senryü,

¹⁶lo a-le anyugun ka, “Hile segü men lo segü zan la?” Tsontsin anyugun le a-ka, “Kaisar le.”

¹⁷Tsonshü ntsin Jisu le anyugun ka, “Kaisar hon lo pe Kaisar tsüla lo, lo Sunggigü honlo pe Sunggigü tsüla lo!” Tsüselo anyugun le a-jo genyu anyugun dunthyü la.

¹⁸Lo tsüsika rhünni keso ndi tsekethyü zokehü Sadukinyu dan me le ryüo,

¹⁹“Senkethyügü, Mosa le lesü thu pe agun ka keshü le, kengüo tsasikezen gü thyükehü nme le a-nyenyu ndio sila-o a-nu khepe a-sikipon shüla yatselo, a-sikezen gü no a-nu tsü zen bin-o a-tsagü tsipwen yhunlo tseshü.

²⁰Lo agun dan nyu nduka mi tsenyü le tsasikezen gü thyüo bin hü. Lo peshü gü le tenulo shüo a-tsipwen nme-e ndio sila.

²¹Lo tsügü sika gü ko tenu tsügü zen bin, ai a-nyenyu nme-e ndio sila.

²²Lo kenshen gü ko tsü hontse thyüni, lo tsü hontse mi tsenyü tsü aphu a-lo-o a-nyenyu nme ndio sila. Tson-o tsüdan aphu lo tenugi ko tse sila.

²³Tsügenyu rhünni keso ki tenunyu tsügi le anyugun digü nu thyü tila? Anyugun mitsenyü aphu a-lo kethyü genyu.”

²⁴Tsükatsü Jisu le anyugun ka, “Hagun le ketsin lesü lo Sunggigü kekvu sha kemvu, higenyu hagun le tha thyüzüla hü mvu ole?

²⁵Temi le rhünni keso siki anyugun le tenu lo-e hümvu, lo kalu-e hümvu, ai tsangge lokethyünyu hontse bin kü tinla hünyo.

²⁶Ai kesinyu le rhünniso kelo rüla nduka Sunggigü le senhvu nme ge Mosa ka, ‘Ale Abraham Sunggigü, lo Isak Sunggigü, lo Jakob Sunggigü,’ tsonkethyü hagun le Mosa lesü nyu swü shwi mvuzun ole?

²⁷A-le kesinyu Sunggigü mvule rhün kehünyu Sunggigü le; hagun le rüchün zü sa hü nyo.” tsonla.

²⁸Tsükatsü lesükeshatsin nyu nme le ryüo anyugun kenyi kebin dan nyu bin. A-le Jisu le zo tsentsü pe Sadukinyu dan keni keshü hyulo njüo a-ka, “Johokeshü dan nyu jo digü le jo keritsin gü la?” tson-o a-ka ketso.

²⁹Tsontsin Jisu le a-ka, “Hire, ‘Israel, nyülo ta! Npugü tsü le Sunggigü le, Npugü le nme nti.

³⁰Tsügenyu nle nnyun aphu, n kekvu aphu, n keyhunronzin aphu, lo n kerüchün aphu sen-o Npugü so lo rühvulo ta,’ tsonkethyü gü tsü le jo kerigü le.

³¹Lo kenyhun gü le, ‘Nle n kazonkazin so pe n npvü n keso hontselo chi,’ tsonkeshü gü tsüle johokeshü nme-e hihvu nyeki keda ndi.”

³²Tsontsin lesükesha tsingü le a-ka zonio, “Ketsin le, Senkethyü gü, Npugü le nme, lo tsü le Sunggigü, lo tsüsiki kecha ndi tsekethyü nle zo tsentsü shü laso.

³³Lo nle nnyun aphu, lo nle nkesha nkerüchün aphu lo nkekvu aphu sen-o a-so lo a-rühvu titse kethyü lo nkazonkazin so pe n npvü nkeso hontselo titse kethyü tsüle tha kerüshvu aphu nyeki gwa.”

³⁴Tsontsin a-le tha rüchün petsü sao zoni keshü shalo njüo Jisu le a-ka, “Nle Sunggigü keda zen-o nithen sarimvu le.” Lo tsüsiki we temi nme-e a-ka tha ketsoshü nrün la.

³⁵Tsüsika Jisu le Kershvuka nyu me senthyü kebin ka a-le zoshü, “Nyuthyüo lesükeshatsin ju le Khrista gü no, David nyugü letse hü nla?

³⁶David le a-npvü nduka Kenshün Kapu nyu hihontse zo njü: ‘Npugü le a Npugü ka: ale nshwikerüchün nyu pe npha hensin shüla kemvuthen, nle aben njüzin bin tselo,’ tson zoshü.

³⁷David ko tsügü no, ‘A Npugü’ le tselo, tsügü le nyu tsethyüo a-nyu thyülo tila?” Lo tsükatsü temi danda le a-sherhün satseo a-khwen nyülo.

³⁸Lo a-le anyugun senthyü ketseka, a-le zo, “Mirün ketseyho sen kehü lo hakethyü bin nyu-e meno a-kelu kehü,

³⁹lo sinagog ka nyu bin ketetso ka lo kejün keho ka nyu kedanyu bin le a-kenyü kehü lesü keshatsin nyu dan genyu hagun petsülo chi.

⁴⁰Tsüdan le maginyu dan ka khintyü hünyo, lo tharothyüo kehi thyü thonsa hünyo; tsüdan we me nyeki a-shaja le tsen kvu hyuti.”

⁴¹Tsüsika a-le mele tha kequen kehü khin mhundyü nyu dunlo, tson-o temi dan le seki raka pe thakequen khinyu shü kebin tsü shwi bin; lo tsükatsü kenyanyu kechon ki-e tha kechonchon pe hoshü bin.

⁴²Tsüka tenunyu magi tha kendinyu nme le ryüo tero pisa kenyhun, a-kon le pisa nme kho kewhe pe thakequen kehü khinyu shü.

⁴³Tsontsin a-le senthyükelo nyu dan kope a-ki shülo njüo anyugun ka, “Ale hagun ka zo tsentsü shü ti, mele tha hope thakequen khinyu shü kebin aphu nyeki magi tha kendi higi we tha hoshü chonkvu laso.

⁴⁴Kechamvule me we kesükela kethyü pvünyu hoshü bin nyo; ai tenunyu higi we a-kendi pvünyu-e a-pvü a-gin kebin aphu hoshü kela genyu.”