Read Southern Rengma Naga MARK 13 Bible Online

MARK 13 - Southern Rengma Naga bible

MARK 13

¹Tsüsika a-le Kershvuka nyu chwiryü kejü ka a-le senthyükelo nyu nme le a-ka, “Senkethyü gü! Hire, tso hidan hi le tso nyu tsekethyü dan me layo no, lo ka tho-e nyu tsethyüo thyülo yono!”

²Tsontsin Jisu le a-ka, “Nle a-kethon keda hihontse kethyü hi hyu bin amon? Tso hidan hi boketola mvutseo tso nme-e no hika hi kesomin pvüo bin loho,” tson.

³Tsüsika a-le OLiv kazüthun ge Kershvuka mhundyü zin bin kelo ka Pitor lo Johan lo jakob lo Andria nyugun le kebuo a-ki ryü.

⁴Anyugun le zo, “Hidan hile nyuche ka thyüla tiyo, lo nle tha hi aphu thyü nrün ka nyu lope zansü thyüshü mon? Tsü lope agun ka zoshü ta!” tson-o.

⁵Lo tsükatsü Jisu le anyugun ka zo, “Temi nme-e no hagun sa zen tinla mvu nrün genyu hagun petsü sa binlo chi.

⁶Tsükatsü temi kechon le azan sen-o, ‘Ale Khrista gü le,’ tson-o temi kechon sa zen tinla ti.

⁷Tson-o hagun le teri kega kethyü jo shakelo ka hagun nyun keyhunkerun la nya chi. Tsüdan tsü thyü mvula loho; ai tsügü tsü-e kenkhin gü mvuzun le.

⁸Temi dan me le kechanyu dan me shwinyü mvu soti, lo raja nme le raja kecha nme shwinyü mvu soti, lika hika kazüe nnun soti; lo chenda thyü ryü ti; tsüdan tsü le kenjün kethyü bin kezen sele.

⁹“Tson-e hagun petsü sa binlo nye; kechamvule mele hagun ten pe pelünyu kehun ka shüti; lo sinagog ka nyu hagun vüti; lo kedanyu lo raja nyu-e no shalo nrün genyu a genyu hagun no tsüdan mhundyü kae gun mvulo keshvu genyu.

¹⁰Tson-o jon kenkhin ti nrün mhundyü Jolokegwa gü zope temi kebin aphu hishü teri mvuloshvu.

¹¹Lo hagun nrhisü zen gü me ben nyu shüla nrün ka hagun le nchwen nyu jozo nrün rüchün pe hagun nyun kenjün thyü nya nye. Ai tegi kevüja tsügü nyu hagun no zolo tse keshü gü tsü zolo nye; jo tsüle hagun le zo mvule Kenshün Kapu le zo nrün genyu.

¹²Lo tsükatsü a-tsagü le a-npvü a-sikezen gü ten shü ti, lo a-pvü le a-npvü a-nyu ten pe meno dushvu ti; lo me nyenyu le a-npvü a-pepvünyu shwinyü mvuo meno tsüdan dushvu ti.

¹³Lo azan genyu temi aphu no hagun ntsü ti; ai nyhen gungü tikelo gü we kenikelo hyulo ti.

¹⁴“Tson-e hagun le ‘Tha gwün nrhu nrün gü Kentsü Kenche’ kethyü gü le binzü kemvu bin ka bin kethyü kehyu ka (swü kehünyu no tsü rüchün lo) tsüka Judia nyu kebin nyu no tin sen-o rincho ki küla.

¹⁵Lo ka soki kehünyu no kazü nyu nitsen nya, nmvue a-ka nyu tha khilo titseo niryü nya.

¹⁶Lo low nyu kehünyu ko no aphi khilo titseo nigun nya.

¹⁷Tson-e tsükatsü nyuphou kepvünyu lo a-nyu le a-ge tsü kehü nyu tse le kenjün thyü sa ti!

¹⁸Tsügenyu tsüno tsangseka tsü thyü mvu nrün genyu hagun hilo nye.

¹⁹Kechamvule tsükitsü Sunggigü le tha thyükeshü keritsin kanyu ryüo ntsoka keti kenjün thyü pe tsühontse kemvu, lo hisiki-e tsühontse lo keho thyü ryü nrün genyu.

²⁰Lo Npugü le a-npvü tsangkeben jon tsüdan thyü kezü thyü shü kemvu we temi nme-e kenikelo hyulo ho; tson-e a-le a-npvü kejükelonyu dan genyu tsangkeben jon tsü thyü pe rhoshü ti.

²¹“Lo tsükatsü temi lihigüe hagun ka, ‘Hire, Khrista le hika bin nyo! Nmvue lika bin nyo,’ tson zo-e tenyen nya nye.

²²Kechamvule Khrista kenku dan lo sidyükesha kenku dan le soryüo tha zansü lo tha ndun kethyü tho thyü pe me hio thyülo kegwathen kejükelo nyu-e sa zen tinla nrün genyu.

²³Tson-e hagun petsü sa binlo; hire, ale nchwenyu tha aphu hagun ka zoshüla sele nye.

²⁴“Ai kenjün kethyü tsangkeben jon tsüdan tsü siki yhüko le zünla ti, lo shye le benshü mvula ti,

²⁵lo tsangge shyenyü dan-e nrhi lati, lo tsangge tha kekvu dan sükenun shüti.

²⁶Lo tsükatsü meno Temi Nyugü le a-kekvu keda sen, lo gingvü tseo nmhu ge ryü kezhü hyulo ti.

²⁷Lo tsükatsü a-le a-lokethyünyu dan nishüo anyugun no kazü keni keti nyu-e lo tsangge keni keti ki-e tsangkenbu pezi dan ka a-le kejükelonyu ko zen ryüo kequen loti.

²⁸“Lo hagun kherobin ge jokejvü gü ko shalo tare. A-nyü nrhila njüo a-nyü senni chwiryü kezhü ka tsang nyen chwiryü zhü kela shalo hünyo.

²⁹Tsühontse hagun ko tha tsüdan thyü kebin kehyu ka a-kho nni laso, kakhin khoka bin laso, tson kethyü shalo nye.

³⁰Ale hagun ka zo tsentsü shü ti, tha tsü aphu thyüla kemvuthen nje ntsenyü keyhun temi dan hi ndila loho.

³¹Tsang lo kazü ndila ti, ai ajo dan we ndila loho.

³²Ai tsangkeben jon tsügü lo tegikevü ja tsügü tsü le Pvü gü nyeki temi nme-e lo tsanggelonyu lo Nyugü-e shamvu.

³³“Hagun petsü binlo, lo khwen-o nri binlo, lo hi binlo; kechamvule hagun le tsügü gwünkho tsü shabin kemvu genyu.

³⁴Tsügü tsü le temi nme le a-ka khelao a-tho a-tsentsen khipe a-gonyu dan tenyen lao kakhin kekhwen gü-e no khwen petsü bin lo tse shü lao rünyi kecha nme ki gun kela hontse le.

³⁵Tsügenyu hagun khwen petsü bin lo nye; kechamvule ka Npugü le ngwün ki tile, kheje nyu tsanglvu ka tile, tero kekhun ki tile, le lonyü tiyo a-le keryü gwünkho sha kemvu genyu.

³⁶A-le whütse ryüo hagun le zhü kebin hyu yatselo kenshvu genyu.

³⁷Lo Khwen ntsen binlo nye, tsekeshü jo hile ale temi aphu ka zo bin nyo!”