Read Southern Rengma Naga MARK 14 Bible Online

MARK 14 - Southern Rengma Naga bible

MARK 14

¹Lo jonhvu siki Nkenkechwi lo Kebu no shümvu tseo tensü ketyü Nga gü nga titse binla. Lo tsükatsü peshükeda ju lo lesükeshatsin ju le nkuo Jisu ten pe dushvu kela rhi sola.

²Ai anyugun le kerao, “Temi le tha kevü kela kenshvu genyu nga higü ka we thyü loho,” tson sola.

³Lo a-le Bethani nyu nyule ketyü gü Simon kanyu bin-o tyütsü kebin ka tenunyu nmme le terzü a-rün kegwa a-min ketsen Alabaster khin me sen gunryü, tson-o a-npvü bokholo njüo ja pe Jisu pe ge shü.

⁴Ai temi dan me le anyugun kenyü mvuo zo sola, “Nyu genyu terzü nke pe hihontse hü nla?

⁵Terzü hile jwenshülo doli tsishen soki-e hei pe thakendinyu a-gwünshvu kehü gü shwi shülo gwale!” tson-o anyugun le a-ge kenyo sola.

⁶Ai Jisu le, “Tson nyalo! Hagun le nyuthyüo a-kevü hü nla? A-le age tha kegwa nme thyü shüla sele.

⁷Lo kendinyu we hagun zen zin bin hünyo, tsügenyu hagun le lihi gwünkho kae tsüdan ge thakegwa thyünyü lo thyüshü logwa. Ai hagun le awe azen zin bin loho.

⁸A-le thyülo kegwa gü thyüshü laso; a-le nchwenyu akesun ronye rüchün-o terzü pe amin yünshü laso.

⁹Lo ale hagun ka zo tsentsü shüti, kazü aphu nyu jolokegwa zo pe me kezen aphu ka tenunyu higi rüla rüchünlo nrün genyu a-tho-e sin-o zoti.”

¹⁰Tsüsika Iskariot Judas tsekethyü tseryü kenyhun che dan nyu nme le Jisu ten pe peshükeda ju ben nyu shü kela rüchün-o tsü ka gun.

¹¹Lo anyugun le a-jo shakelo ka anyugun shekerhün thyüo raka pe a-tsü titse a-ka zoshüla. Tsontsin a-le thyülo kegwa gwünkho ka a-khipe anyugun ben nyu keshü rhi sola.

¹²Lo Kebu no shümvuo tensü ketyü Nga jon kerigü nyü anyugun le Nkenkechwi Nga tanyünyu dukeshvu jon nyü tsü, a-le senthyükelo nyu dan le a-ka, “Nle agun no gungü dikipon Nkenkechwi Nga gü nga nrün bin ndo keshü le nkendo la?”

¹³Tsügenyu a-le senthyükelo nyu mihvu nishüo au ka, “Hai rünyi nyida gü nyu gunlo nye, lo hai le temi nme le zü laki nme pen kehü hyulo ti.

¹⁴hai temi tsügü sithen gunlo nye; tson-o hai a-le keyü ka nyu yüo ka npugü ka, ‘Senkethyü gü le, ano senthyükelonyu dan zen-o Nkenkechwi Nga tyülo nrün bin ndo kenjü tsüle dikipon bin nla?’ tsonzo hü nle tsonshü nye.

¹⁵Tsonshülo a-le kahe tesoki ndo pe khwen kebin katsen nme tsin pe hai hishü ti. Lo hai le ka tsünyu tsü ngun genyu tha ndolo nye.”

¹⁶Tsontsin senthyükelo hvu le rünyi nyida gü nyu ryülo ntsin, a-le au ka kezo hontse bin-o hyulo. Tson-o au le tsünyu tsü Nkenkechwi Nga gü tsü ndolo.

¹⁷Lo ngwün lo ntsin, a-le tseryü kenyhun che dan zen gunryülo.

¹⁸Tson-o anyugun le chvütyü kebin ka Jisu le, “Ale hagun ka zo tsentsü shüti, hagun azen kerhün-o tyü kebin nyu nme le aten pe me ben nyu shüti!”

¹⁹Tsontsin anyugun le anyugun nyungwamvu sa tseo a-ka, “Ale le? Ale le?” tsonso.

²⁰Lo a-le anyugun ka, “A-ben sen-o azen kentsin-o khun nyu keshü tseryü kenyhunche dan nme le.

²¹Kechamvule Temi Nyugü le nduka a-rüla thu kenjü hontse tinla ti sele tse bin kelasi genyu. Ai Temi Nyugü ten pe me ben nyu keshü gü we chi, thyülo tiso! Temi tsügü nnyu ryü kemvu we gwakvu nrün laryü!”

²²Tson-o anyugun le tyütsü kebin ka a-le tensü khipen-o jochü shü, tson-o boshwenlo-o khipe anyugun tsüshüo, “Tyülo, higü hile amin güle,” tsonshü.

²³Lo tsüsika a-le honpen gü khilo njüo, Sunggigü shwen shüo pe anyugun tsüshü, lo anyugun aphu tsü tsükü.

²⁴Lo a-le anyugun ka, “Higü hile temi kechon genyu tsunchwikeryü Jopenron kelo azi gü le.

²⁵Ale hagun ka zo tsentsü shü ti, ale Sunggigü keda nyu vain zü keshün tsü kemvuthen ale vain bin higü ge tsü sin loho so.”

²⁶Tson-o anyugun le lü nme thyüshü njüo Oliv kazüthun ki nsin la.

²⁷Lo Jisu le anyugun ka, “Hagun aphu akhe küla ti; kechamvule, ‘Ale tanyü kekhwen gü vüti, tson-o tanyü dan no tin tsenchvü lati,’ tson kethyü thu kenjü genyu.

²⁸Tson-o ale rhünniso kela siki ale hagun mhundyü rio Galil ki gunla ti.”

²⁹Ai Pitor le, “Kechanyu le aphu nkhelae awe tsonlo ho!”

³⁰Tsükatsü Jisu le a-ka, “Ale nka zo tsentsü shü ti, nle ntsoje tero khun hvu ge kethyü mhundyü arüla zomvu gwünshen ge ti!”

³¹Ai a-le nra a-yhenthyüo, “Ano nzen-o sila lo tse so-e, ale nrüla zomvula loho.” Lo kechanyu-e tsühontse zo küla.

³²Tsüsika anyugun le Getsemane tsekethyü chwi nme nyu ryülo; tson-o a-le senthyükelo nyu ju ka, “Ale gü hi kebin ka hagun le hika hibin tse nye.”

³³Tson-o a-le Pitor lo Johan lo Jakob tse pe a-sinlo njüo anyugun zen npha. Tson-o a-nyun kenjün thyü pe ketetsin thyülo la.

³⁴Lo a-le anyugun ka, “Anyun kenjün thyü pe sigü zhüla sele. Hagun we hika bin-o khwen bin nye.”

³⁵Tsüsika a-le ketu din npha gü a-mhun pvü nkhün tsügü kazü rünlo njüo, “Thyülo gwalo tegi kevü ja higü no a nrhi tinla lo,” tse kethyü kehi thyü bin.

³⁶Tsüsika a-le, “Aba,” “Apvü! Nwe le tha aphu thyülo gwa. Nle akhoka honpen higü hi khilo la lo; ai akendo mvule nkendo thyülo chi.”

³⁷Tson-o a-le tsüsika npha ryü ntsin, senthyükelo mishen dan le zhü kebin hyulo. A-le Pitor ka zo-o, “Simon, nle zhü tinla se ole? Nle tegikevü ja nme-e khwen bin lohola se ole?

³⁸Hagun kesemen nyu yüla mvu nrün genyu khwen zin binlo, lo hizin binlo. Kapu gü kipon we thyünyü sabin nyo, ai thyümin kipon le kvu mvu bin laso.”

³⁹Tson-o a-le ni npha gü ngüka jo hontseo hishü.

⁴⁰Tsüsika ko a-le ni npharyü ntsin, anyugun le zhü kebin hyunilo. Anyugun le anyugun yhütyükho loho kebin genyu; anyugun le a-ka tha kezo-e rüchünlo shamvu la.

⁴¹Tsüsika a-le gwünshen ge gü ka anyugun ki npharyüo, “Ntsokae hagun le zhü lo rüyü bin zun ole.? Tsüle gwaso! A-gwünkho penla so! Hire, meno Temi Nyugü ten pe kemu nyu ben shüla titse binla so!

⁴²Solo njüo tinla tile je. Hire, aten pe me ben nyu shü nrün gü le ryüo kekhonilo laso.!”

⁴³Lo a-le jotsü zoshü ketseka tseryü kenyhunche dan nyu nme Judas le, peshükeda ju lo lesükeshatsin ju lo pelü ju zen-o zhethon lo senkethü sen-o temi dan me zen whütse ryü.

⁴⁴Lo a-ten pe me ben nyu shü nrün gü le tsü mhundyü tha zansü nme thyüshü titseo ale a-nbo keshü gü tsügü tsü lenye, hagun a-nrhisülo njüo a-khwen sa zen gunlo nye, tson zoshü la.

⁴⁵Lo a-le ryü ntsin Jisu ka whütse ryüo a-ka, “Rabi,” tsonshüo a-nbo shü.

⁴⁶Tsontsin anyugun le ryüo anyugun ben pe a-tenlo.

⁴⁷Lo tsüka kebin nyu nme le a-zhethon sütholo njüo peshükedagü gogü duso ntsin a-nyetin nti thüla.

⁴⁸Tsükatsü Jisu le anyugun ka, “Hagun le mehon seketyü nyu keten hontse zhethon lo senkethü pen-o aten ryü zhü le?

⁴⁹Ale khenyütsen hagun zen-o Kershvuka nyu bin-o me senthyü bin hü, ai tsüka we hagun le atenlo mvu. Ai ketsinlesü jo no penlo nrün genyu,hihontse laso.”

⁵⁰Tsonshü ntsin senthyükelonyu aphu a-khela njüo tin küla.

⁵¹Tsükatsü ponyu nme le linen phi nme nti khiben tseo a-sithen gunzhü.

⁵²Lo mele a-nrhisülo ntsin a-le a-phi tsü khela njüo a-kenben nton tinla.

⁵³Tsüsika anyugun le Jisu zen-o Peshükeda tsingü kanyu gun; tsünyu peshükeda ju lo pelü ju lo lesükeshatsin ju le gü tsünyu kehun bin.

⁵⁴Lo Pitor le a-ti sarimvu tseo a-sithen-o peshükeda tsingü ka sü nyu yüo rikhun dan zen-o mah ha bin.

⁵⁵Lo tsükatsü peshükeda ju lo pelü ju kehun aphu Jisu dushvula nyüo a-ge kenku jünkezo füso; ai anyugun le tsü hyulo mvula.

⁵⁶Kechamvule anyugun temi kechon le kenku jo zope a-nzhü so, ai anyugun jo tsüle kerhünlo mvu kela genyu.

⁵⁷Tsükatsü peha le kenku jo zope a-nzhüo, ale a-jo kesha le,

⁵⁸“Ale n-ben no kethyü Kershvuka gü hi borholao ben senmvu tseo jonshen nyü thyünilo ti,” tson zo kehü le.

⁵⁹Tson-e anyugun jo kerhünlo mvula.

⁶⁰Tsüsika peshükeda tsingü le anyugun dan nyu solo njüo, “Nle thame zonimvu ti ole? Hidan le tha ditsüki zope n ge shü bin nla?” tson-o a-ketso shü.

⁶¹Ai a-le matse gwünzin bin, lo thame zonishü mvula. Tsontsin peshükeda tsingü le a-ka, “Nle Kegwatsin gü Npugü Khrista ole?” tson-o a-ketso.

⁶²Lo tsükatsü Jisu le, “Ele, ale tsügü le, lo tsüntimvule hisiki hagun le Temi Nyugü le kekvu gü njüzin kebin lo tsangge nmhu ge keryü hyuti!”

⁶³Tsontsin peshükedatsin gü le a-phi sürhen-o, “N gun jo kecha füni pe nyu thyü tila?

⁶⁴Hagun npvü-e a-le Sunggigü kenkhin jo kezo shalo la sele la. Hagun le nyu rüchün bin nla?” Tsontsin anyugun aphu a-no silae gwa le tse kü sola.

⁶⁵Tsüselo anyugun peha le nsü pe a-nye, lo anyugun le a-mhu jela njüo jenthün pe a-jen. Tson-o a-ka, “Segü le n jenshü yo zoshü shwi!” Tson-o rikhun nyu a-zenlo-o a-jü sola.

⁶⁶Tsükatsü Pitor le kasü tesizin kipon bin, lo peshükeda tsingü gonyu tenunyu nme le ryü.

⁶⁷Tsügi le Pitor le mah ha kebin hyushüo a-nrilo-o, “Nko Nazaret Jisu zen hü amon?” tson.

⁶⁸Ai a-le nmvu letseo, “Ale nle kezo shae mvu lo rüchün-e lomvu,” tsonlao a-le kasü hensin ki tin chwila. Tsontsin tsükatsü tero le khunla.

⁶⁹Lo tsüsika ko gonyu tsügi le a-hyulo njüo a-khoka kebin dan ka, “Higü hiko a-pvünyu nme le!” tsonni so.

⁷⁰Ai a-le nmvu letse zonila. Lo tsüsi kheka tsüka kebin nyu dan le Pitor ka, “Nko a-pvünyu ketsinnyu nme le, nle Galilnyu nme laryü!” tsonni sola.

⁷¹Ai a-le swe-o, “Ale nle a-rüla zo kebin gü tsü shamvu le!”

⁷²Tsonshü ntsin tero khun hvu ge la, tsüsiki nyu Pitor le himhundyü ki Jisu le a-ka, “Nle tero khun kenyhun ge mhundyü arüla zomvu gwenshen ge ti,” tsonkeshü jo tsü a-si rüchünlo. Tson-o a-le jo tsügü rüchün-o chü tinla.