Read Southern Rengma Naga MARK 15 Bible Online

MARK 15 - Southern Rengma Naga bible

MARK 15

¹Lo tsangbenlo ntsin peshükeda ju lo pelü ju lo lesükeshatsin ju lo pelü kehun aphu kenthon-o Jisu phin zen gungü Pilat ben nyu shüla.

²Tsükatsü Pilat le, “Nle Judanyu Kedagü ole?” tson-o a-ketso sola. Tsontsin Jisu le a-ka, “Ele,” tsonla.

³Lo peshükeda ju le tha kechon zo pe a-nmu so,

⁴Tsügenyu Pilat le Jisu ka zonio, “Nle thame zope tsü kenishü mvuti ole? Anyugun le n nmu kebin dan aphu nyü shülo!”

⁵Tson-e Jisu le thame zonishü mvula. Tsügenyu Pilat no a-dun thyüla.

⁶Lo Nga tsügü nyu Rom Sorkari le do nyu nme hoshü pe Judanyu ketsü tsü le tejvü.

⁷Lo tsükatsü Baraba tse kethyü temi nme Rom sorkari shwirüchün-o kevü kesoka me dushvu kelanyu nme le dothyü bin.

⁸Lo temi dan le a-no tejvü nyu temi tsügü khipe anyugun tsüla lotse hiso.

⁹Lo tsükatsü Pilat le anyugun ka, “Ano Judanyu Rajagü hoshü pe hagun ketsü hagun kendo le mvu ola?”

¹⁰Kechamvule Judanyu dan le a-shwikerüchün genyu a-khipe a-ben nyu shü tsekethyü a-le shalo kela genyu.

¹¹Ai Peshükeda ju le a-no tsügü mvuo Baraba gü pe anyugun ketsü we anyugun sherhün kvu letse kethyü temi dan thukeyhun shü.

¹²Tsontsin Pilat le anyugun ka, “Tsonlo ano Judanyu Raja letse kehü gü we pe nyuthyü la mon?”

¹³Tsükatsü anyugun le nra sen-o, “A-khipe krus ge hüla lo,” tson sola.

¹⁴Tsontsin Pilat le anyugun ka, “Nyuthyüo la? A-le nyu gwakemvu thyüshü ola?” Ai anyugun le nra sen nio, “A-khipe krus ge hüla lo!” tson zo tonlo la.

¹⁵Lo Pilat le temi dan kenyü thyülao Baraba khipe anyugun tsüla, lo a-le Jisu vülao a-khipe krus ge hüla lo tseo khipe anyugun ben nyu shüla.

¹⁶Tsükatsü shüpahünyu dan le Jisu zen-o ahng ka kamhun ki chwi gü shüpahü kechanyu aphu ko pe kequenlo.

¹⁷Tson-o anyugun le phi nhon nshwen kethyü nme pe a-no benlo, lo tsehü keri pe keda perün nme thyü pe a-pe rün shü.

¹⁸Lo anyugun le, “Judanyu Raja gü no yhun kethon gü thyülo,” tson-o a-kelu.

¹⁹Lo anyugun le thün nme lo pe a-pe vü, nsü pe a-nyeo khosen tsügü a-rüshvu, tson sola.

²⁰Tson-o anyugun le a-lope keyüthyü kela siki phi nhon nshwen kethyü gü khila njüo a-npvü a-phi pe a-nben nishüo krus ge hüla titseo a-nrhisü zen gunla.

²¹Tsüsika rünyi kecha kipon Alekandria lo Rufo au pvü Simon tsekethyü Kurinnyu nme le tsükatsü ryü ntsin a-no Jisu krus pen gun lo tseo a-kemvu thyüo a-tenlo.

²²Tson-o anyugun le a-zen-o Golgatha, a-kon le “Pekhunru” tsekethyü kazü nme nyu ryülo.

²³Lo anyugun le kekhü no keri kethyü vain zu lope a-la so, ai a-le tsü mvula.

²⁴Tsüselo anyugun le a-khipe krus ge hüla njüo a-phi a-nya tsü di nyu le senyu zanka chwiryü tiyo tseo anyugun le tsü lope henshwio kenjünlo.

²⁵Lo tegi tekü khoka a-khipe krus ge hüla.

²⁶Lo krus pesun ge: “JUDANYU RAJAGÜ,” tson a-nkhi kethyü jo thu pe binla.

²⁷Lo anyugun le a-njüzin nme lo a-ngwazin nme tse mehon seketyünyu mihvu pe a-sin-o krus ge hü.

²⁸Tsühontseo ketsinlesü jo no penlo, “A-lope tejvü gwünkerho nyu sinlo.”

²⁹Lo tson nyu kensin kenshye nyu aphu a-pe pvü kengüo a-kesüo, “Ha! Kershvuka borhola njüo jonshen nyü thyülo titse kehü gü.

³⁰Nle n npvü nkenilo njüo krus ge tsenryülo chi!”

³¹Tsühontse peshükeda jue lesükeshatsin nyu ju zen-o a-shwinyüo, “A-le me kechanyu we kenilo, ai a-npvü we a-kenilo mvu!

³²Agun no hyulo-o tenyenlo nrün genyu Israelnyu Raja Khrista gü no krus ge tsenryü ta!” tson zoso. Lo a-sin-o krus ge hü kenjü hvue a-kesü sola.

³³Tsüselo tegi kenyhun ka gungü kenshen kevü keti kazü tsügü aphu nyu tsang le zünla.

³⁴Lo tegi kenshen gwünkho ka Jisu le nra sen-o, “Eloi, elio, lama sabakthani?” a-kon le, “A Sunggigü, A Sunggigü, nle nyuthyüo akhela la?”

³⁵Tsontsin tsüka kebin nyu peha le jo tsü shalo njüo, “Hire, a-le Elia ko bin nyo.”

³⁶Tson-e temi nme le nton gü keshon zü ja pe spunj nme ntsenlo njüo pe nbopun nme nyu nna pe a-lashüo, “Matse! Elia le tsüryüo a-süsheshü tile mvu yo n gun a-shwi bin nu.”

³⁷Lo tsükatsü Jisu le nra tetso sashüo a-kapu hoshü la.

³⁸Lo tsükatsü phi pe Kershvuka nyu sükhin kenjü gü tsüle a-pesun ka nrhen tsügü a-thin tio, nrhen kenyhun thyüla.

³⁹Lo a-le tsühontseo a-phou hoshü kela tsü tsiso kedagü le tsü hyushüo, “Temi higü hile Sunggigü Nyu ketsin le!” tson sola.

⁴⁰Lo tenunyu dan me ko a-kepen ki bin-o nri bin, tsüdan nyu Magdalin Maria lo Jakob nchegü lo Joses au jvü Maria lo Salome ko bin.

⁴¹Tsüdan le a-le Galil ki kehü kanyu a-sithen lo a-lothyü hü. Lo tsüntimvule a-zen Jerusalem nyu nsin keryü tenunyu kecha kechon khi-e hü.

⁴²Tsüselo ngwün ki tha ndonron kethyü jon, Sabbath mhundyü nyü kela genyu Sunggigü keda khwen kebin nyu nme a-zan le Josef tsekethyü Arimathia nyu nme le ryü.

⁴³Temi tsügütsü le pelü ju dan nyu teshwen kepvünyu nme, tsügenyu a-le nshvu mvutse gungü Pilat ka Jisu min tsü hi.

⁴⁴Tsontsin Pilat le Jisu le sila sele tse kethyü sha pe a-dun thyü la. Tson-o a-le tsiso kedagü ko zen ryüo, “A-le sila sele?” tsonkethyü ketso.

⁴⁵Tson-o tsiso kedagü ka tsürüla shalo njüo Jisu min pe Josef tsüla.

⁴⁶Lo tsükatsü Josef le linen phi nme heilo njüo Jisu min penshye pe linen phi tsüno jelo njüo pen gungü tso yhen pe bin kenjü sika nme nyu shüla. Tson-o a-le tso nme keto pe sika kakhin nyu khinla.

⁴⁷Lo Magdalin Maria lo Joses a-jvü Maria au le Jisu khipe keshü bin tsü hyu.