Read Southern Rengma Naga MARK 16 Bible Online

MARK 16 - Southern Rengma Naga bible

MARK 16

¹Tsüselo Sabbath jon penla ntsin Magdalin Maria lo Jakob a-jvü Maria, lo Salome anyugun le tharün kenyi pe Jisu min yün titseo heilo.

²Sabbath jon keri nyü lonyü nshwen ka yhüko chwiryü ntsin anyugun le gungü sika tilo.

³Tsükatsü anyugun le, segü no sika gü khenpvü tso gü keto shütiyo, tsonkethyü kenthon gunzhü.

⁴Tson-o anyugun le nyi sogü sika nrishü ntsin tso gü tsü le keto kela hyulo. Lo tso tsüle tso keda nme.

⁵Tson-o anyugun le sika nyu tsü yü ntsin ponyu nme le phi kechon khiben-o njüzin kipon kebin hyulo njüo anyugun le anyugun dun thyüla.

⁶Tsontsin tsügü le anyugun ka, “Hagun dunthyü nya, hagun le Nazaret Jisu mele pe krus ge hü kela gü fü kehü hile la. A-le rhünlo njüo so laso; a-le hika ndi so. Hire, a-lope keshü bin-e nrishü re!

⁷Tson-e gungü a-le senthyükelo nyu dan lo Pitor kae zoshülo. A-le hagun mhundyü rio Galil ki gun zhü la sele nye. A-le nduka hagun ka zokeshü hontse hagun le gungü tsüki a-hyulo tile nye.”

⁸Tsontsin anyugun le sika nyu chwiryüo tin gunla; kechamvule anyugun le nshvu pe ndün lo anyugun dunthyü ri kela genyu. Lo tson-o anyugun le temi nme kae thame zolo mvula.

⁹Lo Sabbath jon kerinyü a-le rhünlo njüo lonyü nshwen ka gü a-le nduka tenunyu nme tero gwakemvu tsenyü le a-ge bin-o hü kela gi Magdalin Maria tesha keritsin thyüshü.

¹⁰Tsontsin a-le gungü nduka a-zen kehü a-nyu kenjün thyü lo chü kebin dan ka zoshü.

¹¹Lo anyugun le a-le rhünlo njüo tenunyu tsügi no a-hyu tsekethyü shae tenyenlo mvula.

¹²Tsükatsü temi mihvu le rünyi nme ki gun kezhü ka Jisu le a-keyhun kecha nme thyü pvüo au tesha shü.

¹³Tson-o au le ryüo kechanyu dan tesha shü, ai anyugun le tsühvu jo-e tenyen mvula.

¹⁴Lo tseryü nmeche dan le kengüo chvütyü kebin ka a-le ryüo anyugun teshashü; tson-o a-le rhünniso kela siki mele a-kehyu tsü anyugun le tenyen kemvu lo anyugun nyunkerü tsü anyugun kemu zope anyugun rhoshü.

¹⁵Lo a-le anyugun ka, “Hagun kazü aphu nyu gungü Jolokegwa gü zope temi aphu hishü gwün nye.

¹⁶Temi ligühigüe tenyenlo njüo baptaiz thyülo yatselo kenikelo hyulo ti; ai temi ligü higüe tenyen kemvu gü we nmu lati.

¹⁷Lo tenyen kehünyu ge tha zansü hihontse kethyü le bin ti: anyugun le azan ka tero gwakemvu hülo ti; anyugun le khwen keshün sen-o tha aphu zoti;

¹⁸anyugun le peri pensolo ti, nmvue terün tsüo anyugun gwün nshvula loho; lo anyugun ben shwen pe kehonyu ge shülo gwa loti.”

¹⁹Tson-o anyugun ka tha zoshü kela siki Npugü Jisu zen-o tsangge küla, lo kü gü Sunggigü ben njüzin bin tinla.

²⁰Tsüselo anyugun le gungü Jolokegwa zo pe lihikae me zen tinla. Lo Npugü le anyugun zen-o tha thyü lo tha zansü dan thyükelo kekvu pe anyugun ketsü sen-o jo gü che pe nko gwen gwen tse chwiryü la. Amen.