Read Southern Rengma Naga MARK 3 Bible Online

MARK 3 - Southern Rengma Naga bible

MARK 3

¹Tsüsika a-le sinagog ka nyu yü ntsin, temi a-ben kesinyu nme le tsünyu bin.

²Tsükatsü anyugun le a-nkhin kelo rüchün-o Kenshün jon nyü a-le temi higü thyü kesherhün shüti le mvuyo tseo a-nri ton bin.

³Tsontsin a-le a-ben kesi gü ka, “Solo-o npha ryü re,” tsonshü.

⁴Tson-o a-le anyugun ka, “Kenshün jon nyü me ge thakegwa kethyü le, le me ge thagwakemvu kethyü le tejvü la? Me thyü nrhün tile me dushvu tila?” tsonso.

⁵Ai anyugun le matse tinla. Tsontsin a-le anyugun nyunkerü rüchün pe a-nyunta, lo anyugun gwakemvu genyu a-le rani-o likipon hikipon nrio temi tsügü ka, “Nben ketoshü chi.” Tsontsin a-ben shwenshüo a-thyüngwalo.

⁶Tsüsika Farisinyu dan le kenyunrhün gü Herodia nyu dan zen-o Jisu boshvu kela rüchün-o kenthon so.

⁷Jisu le senthyükelonyu ju zen-o Galil züda kipon gunla; tsontsin Galil nyu temi danda nme le a-sithen lola.

⁸Tsüntimvule Judia, Jerusalem, Idumia nyu lo Jordan ri kho likipon lo Tur lo Sidon kerhon kipon temi danda nme le, a-le thyükeshü shakelo genyu a-ki ryü.

⁹Tsontsin me no a-tamvu titseo temi dan genyu senthyükelonyu ju no run keshe nme ndo pe a-khwen binlo tsela.

¹⁰A-le temi kechon thyü n gwashü kehü genyu keho le a-ge kebin nyu aphu a-kesü titseo a-then chuchu tse kehü genyu.

¹¹Lo nshünkemvu kapu dan-e a-hyulo ntsin a-mhundyü ka zhütsülo njüo, nra sen-o a-ka, “Nle Sunggigü Nyugü le,” tson sola.

¹²Ai a-le anyugun no a-rüla zope me tesha nyalo tseo anyugun kesinni shüshü tse tinla.

¹³Tsüsika Jisu le rinchothun ge külo njüo a-kendo nyu dan no a-ki ryülo tse koso. Tsontsin anyugun le a-ki ryülo.

¹⁴Tsükatsü a-le temi tseryü kenyhunche no a-zen hü lo tse, lo a-le anyugun nipe me senthyü titse,

¹⁵lo terogwakemvu hülo nrün kekvu pe anyugun tsüti tseo anyugun kejülo.

¹⁶Tsüdan tsüle: Simon, Jisu le a-lope Pitor thyü kelagü,

¹⁷lo Zebedi nyugü Jakob lo a-sikezen gü Johan; a-le tsühvu zen thope Boamerges, a-kon le “Tsangkesen nyu hvu” tseshü.

¹⁸Lo Andria, Filip, Bartholoma, Mathi, Thoma, Alfia nyugü Jakob,

¹⁹lo Thadia, lo Kanannyu gü Simon; lo a-tenpe me ben nyu shü kela gü Iskariot Judas.

²⁰Lo tsüka a-le ka nyu yülo. Tsontsin temi dan le ryüo kequen salo, tson-o anyugun no tyütsülo shvula.

²¹Lo Jisu kaminyu dan le tsü shashüo gungü a-zenlo lati tse sola; kechamvule anyugun le, a-le nnu binla sele tse so kela genyu.

²²Lo Jerusalem nyu nshye keryü lesü keshatsin nyu ju-e, “A-le Belzebul zen hü laso, lo terogwakemvu kedagü zen-o terogwakemvu ju hüla hü nle,” tson sola.

²³Tsontsin a-le tsüdan kope a-ki shülo njüo jokejvü zo-o anyugun ka, “Satan le nyu tsethyü satan hü logwa tila?

²⁴Lo raja lihigüe a-npvü a-pvükho titselo, raja tsügü le binlo hola ti.

²⁵Lo ka lihigüe a-npvü a-pvükho la yatselo ka tsügü le bin loho lati.

²⁶Lo Satan-e a-npvü a-shwirüchün-o kepvükho hü yatselo a-ko binlo hola-o nke lati.

²⁷“Ai temi nme-e kekvunyu phinlo ri kemvu we a-ka nyu yüo a-kanyü khilo ho; ai phinlo terio a-kanyü khilo gwa.

²⁸“Ale hagun ka zo tsentsü shüti le nje ntsenyü ju kemu aphu lo anyugun le me nkhin kehü jo aphu jü pe anyugun tsü shüti.

²⁹Ai temi lihigüe Kenshün Kapu kenkhin nyu we thame kae jü pe tsü loho, ai kethonthen kemu kipon a-no mu tin lati.”

³⁰(Jisu le hi zo shü kechamvule temi peha le, “A-le nshünkemvu kapu zen hüla sele,” tse kezo genyu.) zo kehü genyu.

³¹Lo tsükatsü a-jvü lo a-sikezen nyu dan le ryüo kamhun ki bin-o me nipe a-ki shüo no a-ko.

³²Lo tsükatsü temi dan me le a-hunpvü bin laryü anyugun le a-ka, “Hire, njvü lo nsikezen nyu ju le nfü ryüo kamhun ki dun bin nle,” tsonshü.

³³Tsontsin a-le anyugun ka, “Ajvü lo asikezen nyu dan le senyu la?”

³⁴Tson-o kerükerio a-hunpvü kebin nyu dan nrio anyugun ka, “Hidan hile ajvü lo asikezen nyu dan le!

³⁵Kechamvule temi lihigüe Sunggigü kendo thyülo zen kehünyu, tsünyu le asikezen nyu, lo a lüginyu, lo a jvü kethyü genyu.”