Read Southern Rengma Naga MARK 4 Bible Online

MARK 4 - Southern Rengma Naga bible

MARK 4

¹Tsüsika a-le züda kho nme ka me senthyü ni; tsontsin temi danda nme le ryüo a-khoka kequenlo.

²Tsügenyu a-le run nme nyu yü-o züda nyu dunlo; lo temi dan le züda seki kazü kesin ki binlo, tsontsin a-le jokejvü ki tha kechon zope anyugun senthyü.

³Lo anyugun senthyü keshü ka a-le anyugun ka, “Nyülo chi! Hire, ntsi kegwün gü le ntsi gwün titse tsü.

⁴Lo a-le ntsi gwün shü ntsin, peha le tsonte ki chela, tsontsin tegü le ryüo tsüdan jüntyüla.

⁵Lo ntsin peha le tso soge chetsü la,

⁶tson-o nnyon le tso so rüpvüri kethyü genyu tsü whü chwiryü; ai tsang le nnyü chwiryü ntsin pho rügula, tson-o a-men kendi genyu rüguo sila.

⁷Lo peha le tsehü dan nyu chetsü la, tson-o tsehü no yhun chwiryüo a-zeü pe a-no a-sha nshalo mvula.

⁸Lo kechanyu we kazü kegwa nyu chetsülo, tson-o tsüyhun soryüo a-sha nshalo, peha le shenryü, lo peha le hentsero, lo peha le tsi-e nshalo.”

⁹Tson-o a-le, “Temi lihigüe a-nyetin le kebin nyu tsünyu no nyülo chi.”

¹⁰Tsükatsü a-le a-npvü kebin ka tseryü kenyhunche dan le ntsi jokejvü rüla a-ka ketso.

¹¹Tsontsin a-le anyugun ka, “Tsangge keda rüla jokentsun dan lope hagun ka zoshü laso; ai tegwenki kebin nyuka we jokejvü tha lihi-e pe anyugun ka zohü.

¹²Kechamvule, ‘Anyugun le kehyu we hyuti, ai sha loho, anyugun le kenyü we nyü ti, ai rüchün loho. Anyugun no ho ni ryüo, anyugun kemu jünikelo kenshvu genyu.’ ”

¹³Tson-o a-le anyugun ka, “Hagun le jokejvü higühi shamvu ole? Tson yatselo hagun nyutsethyü jokejvü aphu shalo mon?

¹⁴Ntsi kegwün gü tsüle Jo lope gwünshü hü.

¹⁵Tsonkho ka cheketsü jo dan tsüle, anyugun le jo tsü shalo ntsin satan le whütse ryüo anyugun nyun nyu chetsükeryü jo tsü seü sen tinla kehü ju le.

¹⁶Tso soge ketsünyu dan tsüle, anyugun le jotsü shalo ntsin anyugun kenyü sa tse zen whütselo.

¹⁷Ai anyugun nyun ki anyugun men kendi genyu gwüngwa nti bin kelo gwünzin la hü; tsüsika jo genyu kenjünkethyü nmvue nthyünnyü kethyü le soryülo a-nyun ranila kehü ju.

¹⁸Lo tsehü dan nyu keyü ntsin dan tsüle, jo tsü shalo njüo ntso ntsenyü keyhun ka rüla rüchün pe a-nyun kenjün kethyü ju, lo nsala kehü kanyü,

¹⁹lo thakecha ketepen jvü gü tsü le anyugun nyun ka yülo njüo jo gü takemhenlao anyugun sha nshalo mvukela dan le.

²⁰Lo kazü kegwa nyu chetsü kelo tsi dan tsüle, jo tsü shalo njüo pe anyugun hon thyülo, tson-o anyugun sha shenryü, hentsero, lo tsi nshalo kehü dan le.”

²¹Tsüntimvule a-le anyugun ka, “Mele makenben sen gü makenben bin ge shümvuo khipe tha hensin ki nmvue rokhu no rünla hü le?

²²Kechamvule pe me teshashü titse kethyü a-me tha nme-e kebu kethyü kon ndi; lo me no shalo titse kethyü a-me thame tesütebu kethyüi ndi kethyü genyu.

²³Temi lihigüe a-nyetin le bin-o nyülo kenyünyu tsünyu no nyülo chi!”

²⁴Lo a-le anyugun ka, “Hagun tha nyülo kehü nyu petsülo chi; hagun le ndo keshügü nyu ndoni pe hagun tsüti.

²⁵Kechamvule temi lihigüe kebin gü le pe tsü sinshü ti; lo temi lihigüe kendi gü we a-ben nyu keshanyu le kebin tsüe senni tinla nrün genyu.”

²⁶Lo a-le, “Sunggigü keda le temi nme le ntsi sen tsügü kazü nyu gwünshüo,

²⁷khejeki gungü zhü tinla, lo tsangbenlo lo soryüo ntsi tsüle dihontse tsüsoryüo gonlo hüyo tsekethyü shakemvu keme.

²⁸Kazü gü le a-npvü a-sha nshalo, a-nyü senlo teri, tsüsika a-pwen, lo tsüsika a-pwen nyu a-tsin le a-sü chwiryülo hü.

²⁹Tson-o a-low nyu a-shye tsüle nyenlo ntsin logvü gwünkho tikela genyu temi tsügü le a-zonkhi sen tsüryü hü.”

³⁰Lo Jisu le anyugun ka, “Ngun Sunggigü keda lope nyu ndyüshü mon? Nmvue nyu lope jokejvü zo-o me senthyüshü mon?

³¹Tsüle hennyon tsi keshen nme hontse; mele tsü sen tsügü kazü nyu yi keshü ka tsü le hentsin dan nyu a-tsi keshen tsin nme thyü.

³²Ai sen tsügü yishüo tsüchwiryülo hen aphu nyeki gonla hü; tson-o a-ro kedada sen chwiryüo tegüe no a-hensin sunlo kegwa thyülo hünyo.”

³³Lo tsüntimvule a-le anyugun no shalo kegwa thyüo jokejvü kecha ki-e pe anyugun ka zo.

³⁴Lo jokejvü sen mvutse a-le anyugun ka thame zoshü mvu. Ai senthyükelo nyu npvü ka a-le tha aphu kon zope anyugun hishü hü.

³⁵Lo tsünyü tsü n gwünki a-le anyugun ka, “N gun züda pere lukipon küla ti je.”

³⁶Lo tsükatsü anyugun le temi dan khelao Jisu run nyu anyugun pvü kesin gunzhü; lo run kecha dan me-e anyugun zen hü.

³⁷Lo tsükatsü tsangkenbu terhi nme le soryüo zü whünkenu keshü no ketyü pe züno run sülo güzhü la.

³⁸Lo tsügwünkho ka Jisu le run siki bin nme ge zhü bin; lo anyugun le gü a-kesun-o aka, “Senkethyü gü, ngun le sigü zhü lae n we nnyun nkhi mvu ole?”

³⁹Tsontsin a-le soryülo njüo tsangkenbu kesüshü, lo züda ka, “Nle ma tse binlo,” tsonshü, tsonshü ntsin tsang le nbu mvuo ntsema tsela.

⁴⁰Lo tsüsika a-le anyugun ka, “Hagun le nyuthyüo nshvu hü nla? Hagun le ntsokhin-e hagun ketenyen le binlo mvu zun ale?”

⁴¹Ai anyugun le nshvu pe ketetsin thyüo khinyunyu ka, “Temi higü hile temi nyutse kethyü nme la? Tsangkenbu lo zü kedae a-jo zen kehü hile!” tson.