Read Southern Rengma Naga MARK 5 Bible Online

MARK 5 - Southern Rengma Naga bible

MARK 5

¹Tsüsika anyugun le tin sen-o züda se lukipon Gerasin lojvü nyu gunlo.

²Tson-o a-le run nyu chwiryülo ntsin nshünkemvu kapu no semen zen kehünyu nme le sika nyu tinchwiryüo a-zen ketenolo.

³Lo tsügü le sika nyu bin hü gwünzin; temi nme tegiron-e pe a-phin sen binlo mvula.

⁴Mele gwün kechon tegi ben kekhin lo tegiron pe a-pha a-ben phin, ai tsü aphu ka a-le tegiron dan bosebore lala lo tegi dan apha pe kedüren lahü. A-le nkonrio temi nme a-khin senbin kelo kekvu ndila.

⁵Lo a-le tsangkenben ki-e lo tsangkezün ki-e rincho ge lo sika nyu binzin tinla, tson-o a-le nra sen-o tso-e pe a-npvü a-jon zin hü tinla.

⁶Lo a-le nithen ki Jisu hyushüo ryüo a-pha ka a-rüshvu so.

⁷Lo a-le nra sen-o, “Ketetsotsin gü Sunggigü Nyugü, ale Sunggigü zan sen-o zoti, Nle a nthyü nnyü nyata,”

⁸kechamvule Jisu le a-ka, “Hire, nshünkemvu kapu, nle temi higü ge tinchwila lo!” tsonso kela genyu.

⁹Tsontsin a-le tsügü ka, “Nzan le segü la?” tson-o ketso. Lo tsügü ko a-ka, “Azan le Legion le! Agun le kechonki kehü genyu.”

¹⁰Tson-o tsügü le Jisu no kazü tsügü nyu gwakemvu kapu dan hüshwi nyalo tse kethyü a-ka hi tenge tseso.

¹¹Lo tsügwünkho ka tsü tebo dan me le rincho phaki hotyü bin.

¹²Tsüselo nshünkemvu kapu dan le Jisu ka hi tenge-o, “Nle agun nipe tebo dan nyu shüla lo, lo agun le tsüdan ge gü lati,” tson sola.

¹³Tsontsin a-le anyugun no gunla lotse zoshü la, lo nshünkemvu kapu tsüdan le a-ge chwio tin sen-o tebo dan nyu yüla. Tsontsin tebo yie kenyhun dan le tin-o tsokhin nyu teso tsügü züda nyu yüo anyugun nrheshvu küla.

¹⁴Lo tsüdan kekhwenyu le gungü rünyi nyu-e lo low nyu-e me tephu küshü; tsontsin nyu thyüla seyo tsekethyü shwi titseo mele aphu tin ryü.

¹⁵Lo anyugun le Jisu ki gungü tero gwakemvu no semen zen kehü gü, a-kon le nduka Legion no zen kehü gü le a-nyun ntsenla lo a-phi ben-o dun kebin hyulo-o anyugun le nshvu sala.

¹⁶Lo tsüsika tha tsü kehyu danle tero gwakemvu gü no semen zen kehü gü ge thyükela lo tebo dan rüla pe me ka zoshü.

¹⁷Tsontsin rünyi tsünyu kebin nyu danle a-no anyugun nken tinla lotseo anyugun le a-ka hi tenge tselo la.

¹⁸Lo tsüsika a-le run nyu yüzhü ntsin nduka tero gwakemvu no semen zen kehü gü le Jisu zen tinla titse hi tenge tse sola.

¹⁹Ai Jisu le nmvu letseo a-ka, “Nle ka ki ranio nkaminyu ki gunlo, lo anyugun ka, Npugü le n ge thakeda hitsüki thyüshü letse kethyü, lo a-le n njün pe hitsüki thyü keshü pe zoshü chi!”

²⁰Tsüselo a-le gungü Dikapoli rünyi dan ka Jisu le a-ge thakeda ditsüki thyüshü yo tsekethyü pe meka zoshü; tson-o temi aphu no a-dun thyü sala.

²¹Tsüsika Jisu le run nyu tin ni sen-o züda se lukipon külo ntsin, temi danda nme le ryüo a-khoka kequenlo; lo a-le züda khoka binlo.

²²Lo a-zan le Jaira tsekethyü sinagog ka nyu kedanyu nme le tsüka ryüo a-hyushüo temi tsügü le Jisu pha nyu zhütsülo njüo aka, “Anyugi le sigüzhü laso;

²³a-no gwalo-o rhünlo nrün genyu nle ryüo nben pe a-kesü shüta!” tson-o a-ka hi tenge tse sola.

²⁴Tsontsin a-le temi tsügü zengun, lo temi danda le a-sithen-o a-khun minmin tse gunla.

²⁵Lo tsükatsü tenunyu chen tseryü kenyhun che a-ge tezi tsun-o,

²⁶dawa keshanyu kechon no a-shwio, a-hon kebin aphu nkebu lae gwakelo gü mvule shvu ketsintsin tsekela nme.

²⁷A-le Jisu rüla shashüo temi danda dan nyu tin sen-o Jisu siki ryüo a-phi kesü shü.

²⁸Kechamvule a-le a-npvü a-nyunki, “Ale a-phi kesülo-e gwa loti,” tsonkethyü rüchün hü kela genyu.

²⁹Lo tson-o a-le kesü shü ntsin a-ge tezi tsun kehü tsü le sin whü tsela. Lo a-keho le gwalo kela a-npvü a-ge shalo.

³⁰Tsontsin Jisu le kekvu le a-ge chwikela shalo njüo rani gü lukipon hikipon temi dan nrio zo, “Segü le aphi kesü shüla?”

³¹Tsontsin a-le senthyükelo ju le, “Temi le nta minmin tse kebin pvünyu, ‘Segü le akesü shüla,’ tson ti ole?”

³²Tson-e a-le rani gü a-kesü keshü gi nrishü titseo a-le lukipon hikipon nri so.

³³Ai tsüka tenugi le a-ge tha nme thyükela shashüo nshvu ndün-o ryü a-pha nyu zhülo, tson-o a-ka joketsin zoni küshü la.

³⁴Tsontsin a-le tenugi ka, “Anyugi, nketenyen le a-npvü nthyü ngwashüla sele nye. Nkeho no gwalo-o ndyü ben gunlo!”

³⁵Lo a-le jo tsü zokebin ka me le sinagog kanyu keda gü ka ryüo a-ka, “Nyugi le sila sele! Nyuthyüo senkethyü gü no gun kenjünthyü sin bin tila?”

³⁶Ai Jisu le jo tsü shakemvu rothyüo sinagog ka nyu kedagü ka, “Nle nshvu nya, tenyen binlo.”

³⁷Lo tsükatsü a-le Pitor lo Jakob lo a-sikezengü Johan tsü nyeki temi kechanyu no a-sithen mvula.

³⁸Lo anyugun le gü sinagog ka nyu kedagü ka tilo ntsin mele chekechü le ketetsin thyüo dada tse kebin hyulo.

³⁹Tsüselo a-le kanyuki yügü anyugun ka, “Hagun le nyu thyüo chü ndyü bin nla? Nyu higi le sila mvu, ai zhü bin nle.”

⁴⁰Tsontsin anyugun le a-shwinyü sola; ai a-le temi tsüdan no kamhun ki chwiküla-o tenugi a-pvü lo a-jvü, lo a-zen kehü senthyükelo nyu dan tsü zen-o tenugi le zhü kebin tsen ki yüla.

⁴¹Tson-o a-le yügü tenugi ben sülo njüo a-ka, “Talitha koum,” a-kon le “Ashenle, ale nka zoshü bin nle, solo chi!” tsonshü.

⁴²Tsonshü ntsin nyugi tsü le so-o tsonchü tinla; a-ko chen tseryü kenyhun che nyu nme thyü kelasi genyu; lo tsonshü ntsin me no me dun thyü sala.

⁴³Tson-e a-le me no tsü shamvu lo nrün genyu temi tsü keshanyu dan khin tenge tsela; tson-o a-le, “Tha pe tsügi tsü shüo no tyülo lo,” tse zoshü.