Read Southern Rengma Naga MARK 6 Bible Online

MARK 6 - Southern Rengma Naga bible

MARK 6

¹Tsüsika a-le tsünyu chwio a-npvü a-rünyi ki tsü gunla; lo a-le senthyükelo nyu dan ko a-sithen gun.

²Lo tsükatsü a-le Sabbath jon tilo ntsin sinagog ka nyu yüo me senthyü so; lo tsüka temi kechon le a-senkethyü jo nyü pe anyugun dun thyüo, “Temi higü hile dikipon tha hihontse kethyü hyulo la? Lo khipe a-ketsü thakesha hiko tha dihontse kethyü nme la? Lo A-ben nyu thakeda hihontse kethyü nyu tsethyü thyülo hü nla?

³Higü hile tesen mistri gü, a-jvü le Maria lo a-sikezen nyu dan le Jakob, Joses, Juda lo Simon nyugun mvu ole? Lo a-lüginyue ngun zen-o hinyu bin mvu ole?” Tson-o anyugun le a-ge anyugun nyun ntala.

⁴Tsüselo Jisu le anyugun ka, “Sidyükeshanyu le a-npvü a-rünyi lo a-npvü a-kaminyu lo a-kakhwün nyeki we teshwen pvü kemvu thyü hü mvu.”

⁵Tson-o a-le kehonyu dan me kesüshüo thyü kesherhün keshü nyeki tsünyu tha keda thyüsin shü mvula.

⁶Lo tsüntimvule anyugun le tenyen kemvu genyu a-no a-dunthyü sala.

⁷Lo tsükatsü a-le rünyi nyu ntsü gungü me senthyü. Lo a-le tseryü kenyhunche dan kope a-khoki shülo njüo anyugun mihvu hvu nishü; lo a-le anyugun no nshünkemvu kapu so bin kelo kekvu khishü.

⁸lo a-le anyugun ka ahza shüo, “Hagun kenjwen ka thün nme nyeki tensü-e, thakhvü-e, senkephin nyu seki rakae thame sen nyalo tsela.”

⁹Lo anyugun no phaje we pvülo, ai mirün we kenyhun ben nyalo tsela.

¹⁰Tsüntimvule a-le anyugun ka, “Hagun ka lika hika yülo yatse-e hagun le rünyi tsünyu tinla kemvuthen ka tsügü nyu binlo.

¹¹Lo lihikae mele hagun zenlo mvu, nmvue hagun khwen-e nyü mvu yatselo, hagun le rünyi tsünyu tin kezhü ka anyugun no shalo nrün genyu hagun pha ge kemphü le kebin dan-e kekhü shü lachi!”

¹²Tsüselo anyugun le gungü meno me nyunkelulo lotse zope me senthyüshü.

¹³Lo anyugun le tero gwakemvu kechon hüla. Lo kehokenyü nyu ge terzü pe anyugun yünshüo temi kechon thyü kesherhün shü.

¹⁴Tsükatsü me le Jisu zan kechwi shagun kela raja gü Herod ko tsü shalo, lo peha le kezo le, Johan Baptist gü le kesinyu dan nyu rhünni soryüla so; tsügenyu a-ge tha kekvu hidan hithyülo hü nle tse zo.

¹⁵Ai kechanyu peha le hile Elia le, lo peha le nmvu, ai a-ko sidyükeshanyu nme le.

¹⁶Ai Herod le tsü shalo ntsin nduka a-le a-pe gwenkelagü Johan le rhünni soryüla sele tse so.

¹⁷Nduka Herod le a-npvü a-sikezen gü Filip nu Herodia genyu me nipe Johan tenlo-o phin pe doka nyu shüla; Herod le tenu tsügi lolo kela genyu.

¹⁸Kechamvule Johan le Herod ka, “Nle n npvü nsikezen gü nu lolo kela tsü le tejvü kemvu; tsonzo keshü genyu!”

¹⁹Tsügenyu Herodia ko Johan ge a-kenyü mvuo a-dushvula nyü so; ai tsü thyülo nrün ndila.

²⁰Kechamvule Herod le Johan hile kentsen nyu lo kenshün nyu nme tsekethyü shao nshvuo a-ntsen lola. Tson-o a-jo shakelo ka a-nyun keyhunkerunlo lala tse hü, ai a-khwen kenyü we nyü lolo tse ryü.

²¹Tson hüo a gwünkho kegwa nme hyulo; lo tsüle Herod kenyu jon nyü a-hensin kedanyu lo shüpahü nyu so keda nyu lo Galil nyu pelü dan zen-o keho nme thyü.

²²Lo tsükatsü Herodia nyugi le a-npvü yügü Herod lo a-ka nyu ho kebin ju mhundyü nyu nashü pe gwasa shü. Tsontsin kedagü le lünyu tsügi ka, “Nle aka tha lihi-e nkenyü hilo chi, lo ale pe ntsü shü ti.”

²³Tson-o a-le tsügi mhundyü nyu swe-o, “Nle aka tha lihi-e hi-o akeda pehae hilo pe ntsü ti,” tson.

²⁴Tsontsin tsügi le chwigü a-jvü ka, “Ano nyu hi mon?” tson-o ketsoshü ntsin, a-jvü le, “ Johan baptist gü pe ti,” tsonshü.

²⁵Tsonshü ntsin a-le kedagü ka yügü, “Nle John baptist gü pe lope khun nme ka shü pe atsü whütse shülo akenyü tile,” tson-o hi sola.

²⁶Tsonshü ntsin kedagü le a-nyun kenjünthyü lola; ai a-npvü a-keswe genyu, lo ryüo ho kebin nyu dan genyu tenunyu tsügi jo kenilo shvula.

²⁷Tson-o a-le rikhun kebin shüpahü nyu nme nishüo no Johan pe gwen senryü lotse zoshü la, lo tsügü le gungü doka nyu Johan pe gwenlo.

²⁸Tson-o pe khun nme ka shü sengü lünyu tsügi tsüla; tson-o tsügi le pe a-jvü tsüla.

²⁹Lo John le senthyükelo nyu dan le tsü nyülo njüo a-min pen gungü sika nme nyu sunla.

³⁰Tsüsika senthyükelo nyu dan le Jisu ka ryüo tha lihi-e thyükela lo zope me senthyü kela aphu pe a-ka zo küshü.

³¹Tsontsin a-le anyugun ka zo, “N gun npvü tin-o gü mele hü kemvu binki n gun npvü ryüyü dinlo tije; ” kechamvule temi kensin kenshye chonrio Jisu lo a-le senthyükelonyu dan le ketyüketsü gwünkhoe ndi kela genyu.

³²Lo tsükatsü anyugun le run nme nyu yüo me kendi bin nme ki gunla.

³³Lo mele anyugun le kegun hyushüo temi kechon le tin kehü gü anyugun mhundyü rilo la.

³⁴Lo tsükatsü a-le chwiryüo temi danda nme hyulo; lo temi tsüdan le tanyü a-kekhwen kendi hontse kethyü genyu anyugun shwi njünla. Tson-o a-le tha kechon zope anyugun senthyü so.

³⁵Tson bin-o tsangkeben jon gübu zhüla ntsin, a-le senthyükelonyu dan le ryüo a-ka, “Hile tehen ki so, lo tsangkeben jon-e güzhü bula so.

³⁶Tsügenyu anyugun no lukipon hikipon lo low nyu-e lo rünyi nyu-e gunlo-o anyugun no anyugun pvügin-e heilo nrün genyu anyugu nishüla gwünlo.”

³⁷Ai Jisu le anyugun ka, “Hagun npvü anyugun ginthyü shü chi.” Tsontsin anyugun le a-ka, “Nle agun no gü rakagi tsihvu pe tensü hei sen ryüo anyugun ginthyü shülo tse ole?”

³⁸Tsontsin a-le anyugun ka, “Hagun le tensü dikho sen hü nla? Gü shwishü chi.” Lo tsükatsü anyugun le shalo njüo a-ka, “Tensü pvü pvün, lo tsehü kenyhun le.”

³⁹Tsontsin a-le temi dan no a-dan kechacha thyüo tehen kenjvü soge dun külo lo tse zoshü.

⁴⁰Tsontsin anyugun le tsitsi lo henpvün pvün tseo a-tson kechacha thyüo dun külo.

⁴¹Tsüselo a-le tensü pvü pvün lo tsehü hvu tse khipenlo njüo tsangge nrio jochü shü. Njüo tensü dan boshwenlo-o pe senthyükelo nyu dan tsüshüo no khipe temi dan tsüshülo tse shü. A-le tsehü hvu ko kenjün pe temi dan tsüshü.

⁴²Lo anyugun aphu tyüo anyugun ginnyü külo.

⁴³Lo tsükatsü anyugun le tsehü lo tensü tyü kensen tsü khü pe khvütsü tseryü kenyhun che sünilo.

⁴⁴Lo tsüka anyugun kengüo tensü ketyü temi le pechenyu yiepvün.

⁴⁵Tsüsika a-le temi dan nishüla titseo a-le senthyükelo nyu dan no run nyu yüo a-mhundyü richwi gü lukipon Betsaida nyu gunlo lotse zoshü.

⁴⁶Tson-o a-le anyugun zen kekho sen-o rincho ge gungü hi tinla.

⁴⁷Tsüselo khejeki thyülo ntsin run tsüle züda chvü ki gunla, lo awe a-npvü kesinki hü.

⁴⁸Lo tsangkenbu le anyugun mhundyü kipon anyugun whünlo kela anyugun le anyugun run thu kenjünthyü sa kehü hyushüo rikhun kelu pezi gü gwünkho ka a-le züda soge tsonchü sen-o gungü anyugun zen-o hü tinla nyüo gunzhü.

⁴⁹Ai nyugun le a-le zü soge tsonchü kehü hyushüo a-lope rümen nme sele tseo nra sen sola.

⁵⁰Kechamvule anyugun aphu a-hyushüo anyugun nyun keyhunkerunlo kela genyu. Tson-e a-le anyun kerhün thyüo anyugun ka, “Hagun dyübenlo chi! Ale mare, nshvu nya chi!”

⁵¹Tson-o a-le anyugun run nyu yülo; tsontsin tsang le nbu mvula. Tsügenyu anyugun le anyugun dunthyüla.

⁵²Kechamvule anyugun le tensü ketyü rülae rüchünlo mvula, tsonkethyü gü mvule anyugun nyun-e tha rüchünlo mvula.

⁵³Tsüsika anyugun le tsü nken gü Genesaret lojvü nyu ryüo run no züda seka binlo.

⁵⁴Tson-o anyugun le run nyu chwiryülo ntsin mele anyugun shalo la.

⁵⁵Tson-o tsüte tsümhun rünyi aphu nyu kehokenyü nyu pen-o a-le bin tsekethyü kesha bin nyu ryü sola.

⁵⁶Tson-o a-le nyishwen kae lo nyida kae, lo low nyu-e tse a-le kegun aphu ka anyugun le kehokenyünyu pen gungü hakethyü bin nyu-e shüshüo tsüdan no a-phishwe-e kesükelo rüchün-o a-ka hi tenge tse sola. Lo a-kesü kelonyu aphu sherhün külo la.