Read Southern Rengma Naga MARK 7 Bible Online

MARK 7 - Southern Rengma Naga bible

MARK 7

¹Lo tsüsika Jerusalem nyu keryü Farisinyu dan lo lesükeshatsin nyu dan-e tse ryüo a-khoka kequenlo.

²Lo temi tsüdan le a-le senthyükelo nyu peha le a-ben nshün mvuo, npvü nbonnyu nyünyü jvü zenmvuo a-ben tsemvu tse chvü tyü kebin hyushü.

³(Kechamvule Farisinyu lo Judanyu aphu npvü nbon nyu jvü zen-o a-ben tsela kemvu we tyütsü hü kemvu genyu.

⁴Lo anyugun le hakethyü bin ki hüo ryüe zülu la kemvu we tyütsü hümvu. Tsüntimvule anyugun le zen mvulokeshvu honpen, khun, la, lo lazogi pe kethyü dan kesü kethyü jvü kechon le bin kehü genyu.)

⁵Tsükatsü Farisinyu lo lesü keshatsin nyu dan le zo-o, “Nyuthyüo nle senthyükelo dan le npvü nbon nyu jvu zen mvuo anyugun ben no nshün mvu tse tyü hü nla?” tson-o a-ketso so.

⁶Tsontsin a-le anyugun ka, “Isaya le nduka hagun kerokon kehünyu rüla: ‘Temi hidan le a-mün pe arühvu kehü gwünzin, ai anyugun nyun we azen-o nithen bin hünyo.

⁷Lo anyugun le temi le kethyü jvü pe Sunggigü jvü hontseo anyugun le akerüshvu nyu thaja thyü kehü gwünzin!’

⁸“Hagun le Sunggigü le A-jo khikeshü khelao temi le a-npvü thyükeshü jvü gü zen hü laso.”

⁹Lo tsüntimvule a-le anyugun ka, “Hagun le hagun pvübon nyu jvü zen titseo Sunggigü le khikeshü jvü gü khekela jvü sha salo laso.

¹⁰Mosa le nduka, ‘Npvü njvünyu rühvulo,’ tsonshü. Lo temi lihigüe a-pepvünyu ge jo gwakemvu zolo, tsügü no sila chi! tson zo njü.

¹¹Ai hagun we zokehü le temi nme le a-pvü nmvue a-jvü ka, ‘Ano n cheshü nrün hile Korban laso’ (a-kon le pe Sunggigü tenyenla so).

¹²Tson-o hagun le tsügü no a-pvü nmvue a-jvü ka tha thyüshü kezügü thyüshü hü mvu.

¹³Lo tsühontse thyüo hagun le hagun npvü hagun pvübon nyu jvü pe me senthyüo Sunggigü jo we no a-kerun thyü la hü; lo tsühontse kethyü kechon ki-e hagun le thyü hü laso,” tson zoshü.

¹⁴Lo tsüsika a-le temi dan kope a-ki shülo njüo anyugun ka zo, “Hagun aphu ajo nyülo njüo shalo nye.

¹⁵Tha nme-e tegwen ki temi nyun nyu yüo temi gwün nrhula hü mvu, ai temi nyun ki chwiryü kehügü le a-npvü temi gwün nrhula kehü gwünzin.

¹⁶Temi lihigüe a-nyetin kebin nyu no nyü lo nye.”

¹⁷Lo tsüsika a-le tin sen-o temi dan nyu kanyu ki yülo ntsin, a-le senthyükelo nyu dan le a-ka jokejvü tsü a-kon ketsoshü.

¹⁸Tsontsin a-le anyugun ka, “Hagun-e thasha mvu pe hitsüla ki thyü hü zun ole? Tegwen ki temi nyunki keyü dan le temi thyü nrhula loho.

¹⁹Tsüle a-nyunki yüo khipe kevü bin ki shwenla kehü tsü hagun le rüchünlo hü mvu ole.” (Tson-o a-le ketyüketsü aphu le nshün letse la.)

²⁰Tsüntimvule a-le anyugun ka, “Temi nyunki chwiryü kehügü tsü le temi thyü nrhula hünyo.

²¹Kechamvule temi nyun ki temi nyun kendo gwakemvu,

²²keyüla, kerühu, medukeshvu, ketepen, kemu nyun kepvü, nku kethyü, keso keyhüdyü kethyü, me shwipe a-yhükethyü, me swetsü kethyü, ketekho kethyü, lo keshyelu kethyü le chwiryü hünyo.

²³Tha gwakemvu aphu nnyun ki chwiryüo temi thyü nrhula kehü gwünzin.”

²⁴Lo tsüsika a-le Tur lo Sidon hvu rünyi kho kipon gunla, tson-o a-le ka nme nyu yüo me no tsü shanyü mvula, ai a-le kebu loho la.

²⁵Tsükatsü tenunyu nme a-nyu le nshünkemvu kapu no semen zen kehü, nme le a-rüla shashüo ryü nkhüntsü gü a-pha nyu zhülo la.

²⁶Lo tenunyu tsügi tsüle Griknyu Sirofonikia nyu nme. Lo Tenunyu tsügi le a-no a-nyugi ge tero gwakemvu tsü hüla lo tseo a-ka hi tenge tse sola.

²⁷Tsontsin a-le tenunyu tsügi ka, “Ntsenyu no a-ginyülo terilo; kechamvule ntsenyu ketyüketsü sen gü tehi tsü kela le a-zü mvu kethyü genyu.”

²⁸Ai tenunyu tsügi le a-ka, “Npugü, ai tehi ko ntsenyu le ketyüketsü hensinki tyütsü kerhi keshü fütyü hünyo.”

²⁹Tsontsin a-le tenunyu tsügi ka zo, “Jo higenyu nle tin gunlo chi, tero gwakemvugü le nnyugi ge chwila sele!”

³⁰Tsonshü ntsin tenunyu tsügi le a-npvü a-ka ki gun-o a-nyugi le noge zhü kebin lo tero gwakemvu gü le a-ge chwikela hyulo.

³¹Lo a-le Tur rünyi khokipon chwio Sidon rünyi khokipon rhon sen tse Dikapoli rüyi kho Galil züda ki chwiryü.

³²Tsükatsü mele a-nyetin kerügü nyu lo jozo ntsenlo hü kemvunyu nme zen-o a-ki ryü; tson-o anyugun le a-no a-ben pe tsügü kesü shülo tse hi tenge tse sola.

³³Tsontsin a-le temi dan nyu a-zen kecha thyü gü a-zenkero pe tsügü nyetin hvu keshü shü, lo a-yi ko kesüshü.

³⁴Tson-o tsangge nrio a-nyun gwakemvu khwen thyüo a-ka, “Efata,” a-kon le “Pechwiryülo ta.”

³⁵Tsontsin a-nyetin kü tsüle pechwiryülo, lo a-yi kephin-e shwü chwiryülo-o jozo ntsenlo la.

³⁶Tson-o a-le temi dan no tsü pe me ka zo nyalo tse khin shü. ai anyugun le tsü pe me ka zo chon sa shüla.

³⁷Tson-o me no me dunthyü sario, “A-le tha lihi thyüshüe thyü pe gwasa shüla sele! A-le a-nyetin gwakemvunyue no thakhwen nyülo, lo jozolo hü kemvu nyue no jozolo la sele!” Tson sola.