Read Southern Rengma Naga MARK 8 Bible Online

MARK 8 - Southern Rengma Naga bible

MARK 8

¹Lo tsügwünkho ka temi danda nme le gungü kequenlo, lo anyugun le ketyüketsü nme-e sen hü mvu; lo a-le a-senthyükelonyu dan kolo njüo anyugun ka,

²“Ale temi hidan shwi njün laso, anyugun le jonshen a-zen hü laso, lo ketyüketsü nme-e sen hü kemvu genyu.

³Lo ale anyugun no tyütsü mvutse anyugun nishülo, anyugun le tsonsela nyu pesi lati; anyugun peha le tsonthon ki ryü kenbin genyu.”

⁴Tsontsin a-le senthyükelo nyu dan le a-ka, “Segü le tehen terho hihontse kethyü pvünyu nyu tsethyüo tensü hyu pe temi hitsü laki ginthyü logwa tila?”

⁵Tsontsin a-le anyugun ka, “Hagun le tensü dikho sen hü nla,” tson-o anyugun ketso. Lo anyugun le a-ka zo, “Tensü tsenyü le.”

⁶Tsontsin a-le temi dan no kazü nyu dun külo lotse so; lo a-le tensü tsenyü tsü khisenlo-o Sunggigü shwenshüo khipe temi dan tsüshülo tseo a-le senthyükelo nyu dan tsüshü. Lo anyugun ko pe temi dan kenjünshü.

⁷Lo anyugun le tsehü keshen pehae senhü, tsügenyu a-le tsü so-e jochü shüo jün pe temi dan tsüshü lotse khishü.

⁸Tson-o anyugun le tsü tyü pe anyugun ginyü külo, lo tsüle anyugun temi yiezi laki kho.

⁹Tson-o anyugun le tyü kensen khü pe khvütsü tsenyü sülo.

¹⁰Lo tsükatsü a-le anyugun nishüla; lo a-le senthyükelo nyu dan zen-o run nyu yüo Dalmanutha lojvü kipon ryüla.

¹¹Tsükatsü Farisinyu dan le ryü a-semen-o a-no tsangge tha zansü nme thyü pe anyugun hishü lotseo a-zen kenyi so.

¹²Tsontsin a-le a-npvü a-kapu nyu henshwi da thyüshüo, “Nyuthyüo ntso ntsenyü nyu hile tha zansü nti fühü nla? Ale hagun ka zo tsentsü shüti, tha zansü nme-e thyü pe ntso ntsenyü nyu hisin loho so!”

¹³Tson-o a-le anyugun khela njüo kecha kipon gunla.

¹⁴Tsükatsü senthyükelonyu dan le tensü khilo nmhinla; tson-o anyugun le run nyu tensü nme nyesin sen mvula.

¹⁵Tsükatsü Jisu le anyugun ka zo, “Farisinyu lo Herod kebu genyu hagun petsülo chi; ” tsonkethyü anyugun ka zoshü.

¹⁶Tsontsin anyugun le kenthon-o, “Ngun le tensü nme khilo mvukela genyu a-le hizo bin laso.”

¹⁷Tsüselo Jisu le anyugun ka, “Hagun le nyuthyüo tensü sen mvukela genyu zohü nla? Hagun le ntsokhin-e sha, lo rüchün lo mvuzun ole? Hagun nyun thyü pe rükvula se ole?

¹⁸Hagun yhütyü le bin-o pe hyu hü mvu ole? Lo hagun nyetin le bin-o pe thakhwen nyülo hü mvu ole? .

¹⁹Lo hagun nyunki tha rüchün hü mvu ole? Ale tensü pvüpvün pe temi yie pvün ginthyü keshü ka hagun le a-sen khvütsü dikho kesü khülo la?” tson-o ketso so. Tsontsin anyugu le a-ka zo, “Tseryü kenyhunche le.”

²⁰“Lo ale tensü tsenyü pe temi yie zi tsü keshü ka hagun no a-sen khvütsü dikho kesü khü lola?” Tsontsin anyugun le a-ka, “Tsenyü le,” tsonshü.

²¹Lo a-le anyugun ka, “Hagun le ntsokhin-e tsü rüchün lo mvu bin zun ole?” tson.

²²Lo tsükatsü anyugun le Betsaida nyu ryülo. Lo mele a-yhütyü keponyu nme zen ryüo a-no tsügü kesü shü lotse zo tenge lola.

²³Tsügenyu a-le a-yhütyü kepo gü nrhisülo njüo a-zen-o chwida ngwenki chwila. Tson-o a-le nsü pe tsügü yhütyü nyushüo a-ben pe kesüshüo a-ka, “Tha hyu bin semon?” tson-o a-ketso.

²⁴Lo a-le nyi sogü a-ka, “Ale temi dan me hyu bin, lo tsüdan le tsonchü pe senbin hontse bin nyo.”

²⁵Tsontsin Jisu le a-ben pe tsügü yhütyü kesüni, tson-o tsügü le tha nrinishü ntsin, a-yhütyü le gwalo lao tha aphu hyu tsentsülo la.

²⁶Tsüselo Jisu le a-nipe ka kishüo a-ka zo, “Nle rünyi nyu chwi nya nye.”

²⁷Tsüsika Jisu le senthyükelo nyu dan zen-o Kasaria Filipi rünyi nyu gunzhü; Tsükatsü a-le tsonne nyu a-le senthyükelo nyu dan ketso-o anyugun ka zo, “Mele alope segü letse hü nla?”

²⁸Tsontsin anyugun le a-ka, “Johan baptist gü letse zo hü, lo kechanyu dan me le nno pe Elia letseo zo hünyo. Lo peha le nno pe sidyükeshanyu nme letse zo hünyo.”

²⁹Lo Jisu le, “Ai hagun we alope segü letse hü nla?” tson-o anyugun ketso shü. Tsontsin Pitor le a-ka, “Nle Khrista gü le,” tsonshü.

³⁰Lo tsükatsü a-le anyugun no a-rüla tsülope meka zo nyalo tseo anyugun khin tenge tsela.

³¹Tsüntimvule a-le Temi Nyugü le kenjünthyü sati, tson-o pelünyu ju lo peshükeda ju lo lesükeshatsin dan no a-nkhin lao me no a-dushvu lati; lo jonshen siki a-le rhünniso lati; tsonkethyü zo pe anyugun senthyü tinla.

³²Lo a-le jo tsügü zope gingvü tse shüla. Tsontsin Pitor le a-zen-o kecha nme ki bagü a-gwün khinla titse so.

³³Ai a-le ranigü senthyükelonyu dan hyulo njüo Pitor kesüo, “Hire, Satan, nle asiki güla chi; nle Sunggigü rüla rüchün mvule temi phin rüchün kehü hile.”

³⁴Tson-o a-le temi dan kope senthyükelonyu sin-o anyugun ka zo-o, “Temi lihigüe asithen kenyünyu tsünyu no a-npvü a-kekhenilo njüo a-krus pen-o a sithenlo.

³⁵Kechamvule temi lihigüe a-npvü a-phou ntsen pe a-honthyülo kenyünyu a-le tsü nmhenla ti; lo temi lihigüe agenyu lo jolokegwa genyu a-phu nkela kehünyu, a-le tsü ntsen pe a-hon thyülo nrün genyu.

³⁶Lo temi nme le kazü aphu pe a-hon thyülo lae a-le a-npvü a-phou nmhen kela we a-kechwi nyu le bin nla?

³⁷Tsüntimvule temi le nyu lope a-phou sun thyülo gwa tila?

³⁸Lo temi lihigüe keyüla lo kemu temi hidan dan nyu arüla pe zo keja kela gü, Temi Nyugüe tsangge lokethyü kenshün nyu dan zen-o a-zan le gingvü tse keryü nyü temi tsügü rüla zo keja lati.”