Read Southern Rengma Naga MARK 9 Bible Online

MARK 9 - Southern Rengma Naga bible

MARK 9

¹Tsüntimvule a-le a-nyun, “Ale hagun ka zo tsentsü shüti, hika kebin nyu peha le Sunggigü Keda le kvuo keryü hyu kemvuthen sila loho,” tsonla.

²Tsüsika jon tsero sinyü Jisu le Pitor lo Jakob lo Johan nyugun zen-o kazüthun ketetso nme ge küla. Tson-o anyugun mhundyü nyu a-keyhun thyü kecha thyüla.

³Lo a-phi a-nya le nshwen lo chonpe kazü nyu phi kethunyue thu pe tsühontse chonlo kehoi thyüla.

⁴Tsükatsü Elijah lo Mosa au le ryüo anyugun mhundyü ka Jisu zen kenthon.

⁵Tsontsin Pitor le Jisu ka, “Rabi, ngun hinyu kengü bin hülo gwa ti. Lo agun no hikahi then kenshen thyü lota, nme le n genyu lo nme le Mosa genyu lo nme le Elijah genyu tseo,” tsonshü.

⁶Kechamvule anyugun le nshvuri lao nyutsethyü zo tiyo tsekethyü rüchünlo mvu kela genyu.

⁷Lo tsükatsü nmhu khülvu sü ryüo anyugun renlo la; lo nmhu nyu, “Higü hile A nyu A kesogü, Hagun A-khwenyülo chi!” tsonkethyü zochwiryü.

⁸Tsontsin anyugun le lukipon hikipon nri so, ai Jisu nti le anyugun zen kebin nyeki temi kecha nme-e hyuni mvula.

⁹Tson-o anyugun le kazüthun ge n shyeryü kezhü ka Jisu le anyugun khin tenge tseo anyugun no Temi Nyugü le kesi nyu rhünni solo kemvuthen anyugun kehyu tsü lope me ka zo nyalo tse kethyü pe anyugun ka zo ton shü.

¹⁰Tsontsin anyugun le a-jo zenla, ai anyugun npvü a-nyu dan nyu tsü khinyu nyu ketso-o, “Kesi nyu rhünni keso hi a-kon le nyu sela?”

¹¹Tson-o anyugun le, “Tson yatselo nyuthyüo Elijah no ryüri mvuloshvu tse kethyü lesükeshatsin nyu dan le zohü nla?” tson-o ketso so.

¹²Tsontsin Jisu le anyugun ka, “Elijah le ryüo tha aphu thyü ngwashü titse kethyü tsüle a-ketsin. Ai Temi Nyugü no hontse lati tse kethyü ketsin lesü nyu a-rüla zo njü mvu ole?

¹³Ai ale hagun ka zo tsentsü shüti, Elijah le ryü laso, lo a-rüla thu kenjü hontse mele a-ge me kendo thyüla so.”

¹⁴Tson hüo anyugun le senthyükelonyu dan ki ryü ntsin temi danda nmele anyugun hunpvü bin-o hyulo, lo lesükeshatsin nyu dan le anyugun zen kenyi kebin hyulo.

¹⁵Lo temi tsüdan aphu a-hyushü ntsin anyugun dunthyüo nton gungü a-kelu so.

¹⁶Tsüselo Jisu le a-le senthyükelonyu dan ka, “Hagun le nyu zo-o temi hidan zen kenyi bin nla?” tson-o anyugun ketso sola.

¹⁷Tsükatsü temi dan nyu nme le a-ka, “Senkethyü gü, anyu le jozolo kemvu kapu no a-semen kehü genyu ale a-zen-o nki ryü zhü nle.

¹⁸Lo a-le lihikae a-seme lo yatselo a-sü pe jonlao a-tsi nphen tata tselo a-hü keta chwüchwü tselo lahü tson-o a-kekvu ndishü la hü nyo. Tsünyu ale nle senthyükelo nyu dan no tsü hüla lotse shü ntsin anyugun le hü loho laso,” tso.

¹⁹Tsontsin Jisu le anyugun ka, “Hire, tenyen hü kemvu temi dan, ale jon dikho hagun zen bin tila? Lo ale jon dikho hagun ge ajvügwa, lo a kekheni binlo tila? A-zen-o aki ryüta.”

²⁰Tsüselo anyugun le a-zen-o a-ki ryü, lo kapu tsügü le a-hyushü ntsin ntsenyu gü nthyü nnyü sa lola. Tson-o a-no chetsü gü kazü nyu a-tsi nphen pe a-nyen ketakera pvü lola.

²¹Tsükatsü Jisu le zo, “A-le hihontse kela le chen dikho sela?” tson-o a-pvü ketso shü. Tsontsin a-pvü le, “A-nchekanyu hihontse hü la sele,” tsonshü.

²²Tson-o a-boshvula nyüo ntsoka tse a-sü pe mah nyu-e lo zü nyue shüla la tse hü nle; tsügenyu nle tha nme thyülo gwa yatselo agun njünlo agun cheshüta.

²³Tsontsin Jisu le a-ka, “Thyülo gwa yatselo tsela? Tenyen kehünyu genyu we tha lihie thyülo gwa!”

²⁴Tsüselo ntsenyu tsügü a-pvü le nra sen-o, “A ko tenyen bin nle! A ketenyen kerho hi che shüta!”

²⁵Tsontsin Jisu le temi dan le nton kehü ryü kezhü hyushü ntsin a-le nshün kemvu kapu kesüo, “Hire, jo zolo kemvu lo nyetin gwakemvu kapu, ale nka zoshü sele, nle a-ge tinchwi lalo, tson-o a-ge nigun ryü nya chi,” tsonshü.

²⁶Tsükatsü kapu tsügü le nra nhu shüo a-ge chwila, tson-o nyu tsügü no kesinyu hontse tinla. Tsontsin temi kechon gü le, “A-le sila so”, tson zo sola.

²⁷Ai Jisu le a-ben nrhisülo njüo a-penso shü; tson-o a-le soryülo.

²⁸Tsüsika Jisu le ka nyu yülo ntsin a-le senthyükelo nyu dan le kebuo a-ka, “Agun we nyu thyüo a-hü loho lao yo?”

²⁹Tsükatsü a-le anyugun ka, “Hihontse kethyü hile kehi kemvu we tha kecha nme-e hü loho le,” tsonshü.

³⁰Lo tsükatsü anyugun le chwiryüo Galil lojvü pvüthü gunzhü. Ai a-le temi nme-e no tsü shanyü mvu hü,

³¹kechamvule a-le senthyükelo nyu dan ka, “Meno Temi Nyugü ten pe me ben nyu shü lati; tson-o tsüdan no a-ushvu lati. Lo a-dushvu kela jonshen nyü a-le rhünniso lati,” tsonkethyü thu kenjü genyu.

³²Ai anyugun le a-le kezo jo tsü rüchünlo mvula; lo a-kae ketsoni nshvula.

³³Tson-o anyugun ke Kapernaum nyu gun-o ka nyu yülo ntsin a-le anyugun ka,“Hagun le tson nyu nyu zo kenthon hüla?” tson-o anyugun ketso shü.

³⁴Ai anyugun le matse la; kechamvule anyugun le tson nyu kehü ka anyugun dan nyu segü le keda tsingü thyü tiyo tse zo kenyi kehü genyu.

³⁵Tsüsika a-le dunlo njüo tseryü kenyhun che dan ko-o anyugun ka, “Temi lihigüe rilo nyülo a-no aphu nyeki khinlo, lo aphu keleyi gü thyülo ta.”

³⁶Lo tsükatsü a-le ntsenyu nme zengü anyugun dan nyu shülo.

³⁷Tson-o a-le tsügü penlo njüo anyugun ka, “Temi lihigüe Azan nyu hihontse kethyü ntsenyu nme-e zenlo kehünyu le ako azenlo hü, lo temi lihigüe azen kelonyu le amvule a nikeshü gü zenlo hünyo.”

³⁸Johan le a-ka zo, “Senkethyü gü, agun le temi nme le nzan sen-o terogwakemvu hü kebin hyulo le, ai a-le agun sithen mvu kela genyu a-no tson nyalo tse zola so.”

³⁹Ai Jisu le zoshü, “A-khin nya nye; kechamvule temi nme azan sen-o tha keda thyü hüo a nkhin whütsela lo keho genyu.

⁴⁰Lo a ntsüla hü kemvu nyu le nkipon bin hünyo.

⁴¹Kechamvule temi lihigüe hagun le Khrista hon letseo zü honpen nme-e pe hagun lashü lo, ale hagun ka zoshüti, thame kae a-chün ndila loho.

⁴²“Tsüntimvule temi lihigüe atenyen kehü keshen tsin hihontse kethyü nme-e thyü nshvu kehünyu we menno tha ketserütso keda pe a-gunda nyu khenshüo a-khipe züda nyu shwenshü kela we a-jün gwakvu ti.

⁴³Lo nben le nthyü nshvuhü yatselo nge tsü duthü pe shwenla chi; nben kepen pvüo Gehena nmhülo keho mah nyu keyü nyeki benha pvüo kerhün nyu keyü we njün gwakvu ti.

⁴⁴Tsünyu anyugun nyun le sila hümvu, lo mah-e nmhüla hümvu.

⁴⁵Tsüntimvule npha le nthyü nshvulo tsüko duthüla; npha kepen pvüo Gehena nyu keyü we mvu phaha pvüo kerhün nyu keyü we njün gwakvu ti.

⁴⁶Tsünyu anyugun nyun le sila hümvu, lo mah-e nmhüla hü mvu.

⁴⁷Tson-o nyhütyü-e nthyü nshvu yatselo tseritho lachi, nyhütyü kenyhun pvüo Gehena nyu keyü we mvu yhütyü nme pvüo Sunggigü keda nyu keyü we njün gwakvuti.

⁴⁸Gehena nyu anyugun nyun le sila hümvu, lo mah-e nmhüla hümvu.

⁴⁹“Lo temi lihigüe tsi pe ketyü ketsü ka shü kehü hontse mah pe nthyü nnyü küti.

⁵⁰“Tsip tsüle gwa, ai tsi-e a-keyhün ndila yatselo nyu lope thyü nyhünlo tila? “Hagun tsi pe hagun nyunki shüpvü zinlo; tson-o khinyunyu zen kengü gwalo chi.”