Read Southern Rengma Naga LUK 1 Bible Online

LUK 1 - Southern Rengma Naga bible

LUK 1

¹Nduka zope bin kenjü ndan nyu thyü penkela temi dan mele thu so.

²Lo temi tsüdan tsüle nduka anyugun npvü anyugun yhütyü pe hyuo Jolokegwa tsonlo kethyü ju le tsin tsentsü pe ahi keshü hontse thu so tsentsü.

³Tsügenyu mele shwen kehü, Theofilo, ako gungü a-bin tsinnyu jotsü nri ntsen gun-o tsü rüla thu nipe himhundyü ki thu keshü sikethen nme thyü nipe nki shü nyü bin nyo.

⁴Kechamvule himhundyü ki nle shakelo ju tsüle a-ketsin tsekethyü nno sha tsentsülo kenyü genyu.

⁵Herod le Judia kazü so Raja thyü kebin ka Abia dan nyu peche nme, a-zan le Zakariah, tsüle bin laryü; a-nu le Aron tsipwen nme, lo a-zan le Elisabet.

⁶Lo au mihvu nren Sunggigü mhundyü ka kentsen nyu thyüo Npugü le tejvü khikeshü lo a-jo aphu zen-o nkhinlo kehonyu thyü bin.

⁷Lo Elisabet le a-ge nyu n yhun kemvui nme genyu au nyenyu nme-e ndi; lo tsügwünkho ki tsü le au le then-e bin laso.

⁸Zakariah le khenyüme a-genyu thokeshü gwünkho ka Sunggigü mhundyü nyu peshükeda tho thyü bin.

⁹Peshükedanyu ju le then kehü jvü hontse a-no yügü kershvubin ge nshünchün ro nrün genyu henshwi kegun ka a-kejü lola.

¹⁰Lo nshünchün ro kebin katsü temi dan le aphu kamhun gü tsen ki hibin.

¹¹Tson laryü nshünchün ro kebin nzhüzin kipon Npugü lokethyünyu nme le bin-o a-no hyulo.

¹²Tsontsin Zakariah le hyushü njüo nshvu lola.

¹³Ai tsangge lokethyü gü le a-ka zo, “Zakariah, nle nshvunya chi; kechamvule nkehi nyülo laso. Lo nnu Elisabet le pechenyu nme nnyu pe ntsüti; lo nle a-zan tha pe Johan thyülo chi.

¹⁴Lo n ai nkenyü ritsin lati, lo a-nnyu kelo genyu temi kechon le a-sherhün ti.

¹⁵Kechamvule a-le Npugü mhundyü ka keda thyü nrün genyu. Tson-o a-le vain zu lo tsüo nzeü lokegwa zu kechae tsü loho; lo Kenshün Kapu no a-kesü thyü ti; a-jvü ginnyu kebin kanyu tsühontse ryü ti.

¹⁶Tson-o a-le Israel nyu kechon nyun thyü kelu nipe anyugun Npugü Sunggigü kipon shü lati.

¹⁷A-le Elia kekvu lo Kapu gü sen-o Npugü kehyu mhundyü ri gunryü ti kechamvule me pepvünyu nyun thyü kelu pe me nyenyu kipon shü, lo me jozen kemvunyu zen gü keserinyu thakesha kipon shüla nrün genyu; tson-o temi dan me ketsen njüo anyugun no Npugü zenlo nrün genyu.”

¹⁸Tsontsin Zakariah le tsangge lokethyü gü ka zo, “Nyu tsethyüo tsü hontselo tila? Ale then laso, lo anu ai then laso.”

¹⁹Tsontsin tsangge lokethyü gü le a-ka zoni, “Ale Sunggigü mhundyü ka so kehügü Gabriel le; lo A-le a nipe ano n nthon lotse lo jokegwa hidan sen-o nki ryü lotse shüle.

²⁰Lo hire, nle ajo hisiki a-gwünkho penlolo thyü penlo tsentsü nrün ju tenyen kemvu genyu, tha hidan hithyü kelohyu kemvuthen nno jozo tho-o me nthon loho tse bin ti.”

²¹Lo temi tsüdan le Zakariah khwenkhwen bin, ai a-le Kershvuka nyu bin thonri kela genyu anyugun le anyugun dun thyüla.

²²Tsüselo a-le chwiryü laryü jozo-o anyugun nthon lo mvula; tsontsin anyugun le a-le Kershvuka nyu tha nme hyu alo tse sola. Lo a-le jozolo mvulao a-ben pe tharo thyüo me nthon so.

²³Tson-o a-le a-peshü kam thyüla ntsin a-kaki gunla.

²⁴Lo tsüsikinyu a-nu Elisabet le nyuphou pvülo; tson-o a-le shyepvün tsü chwi gü meno a-hyu mvula.

²⁵Tson-o a-le a-npvü a-zo-o, “Npugü le a-npvü higü hi age thyü keshü le, meno akemeni sinmvu nrün genyu a-npvü ashwi njün keshü le,” tson sola.

²⁶Tsüsika shyetsero shye ge Sunggigü le a-npvü lokethyü gü Gabriel nipe Nazaret tsekethyü Galil kazünyu rünyi nyida gü nyu shü.

²⁷A-nipe lünyu phusen gi nme, David nyu kaminyu Josef tsekethyü nme zen kengü yhun titse kebin gi ka shü; lo lünyu tsügi zan le Maria.

²⁸Lo tsangge lokethyü tsügü le ryüo tsügi ka zo, “Hire, Sunggigü keso kepvü gi, n sherhünlo; Npugü le nzen hü laso.”

²⁹Ai a-le jotsü sha pe anyun thunthun tseo jo tsüle a-kon le nyu letse sotiyo tseo rüchün bin la.

³⁰Tsangge lokethyü gü le zo, “Nshvunya chi, Maria, nle Sunggigü keso pvü bin laso.

³¹Lo hire, nle nyuphou pvülo ti, tson-o pechenyu nme nnyulo ti, lo a-zan pe JISU thalo chi.

³²A-le keda nyu nme thyüti, lo a-no Ketetsotsin gü Nyugü thyü ti. Lo Npugü Sunggigü le a-pvü David Raja bin khipe a-tsü ti.

³³Lo a-le Jakob tsipwen tsekethyü aphu so kethonthen raja thyü ti; lo a-raja le ndila loho.”

³⁴Tsontsin Maria le tsangge lokethyü gü ka, “Nyu tsethyü ale tsonlo tila? Ale pechenyu shamvu zun le?”

³⁵Tsüselo Tsangge lokethyü gü le a-ka zoni, “Kenshün Kapu le a-npvü nso ryü ti, tson-o Ketetsotsin gü le a-npvü a-kekvu no nsü pvü loti. Tsügenyu kenshün tsünyu yhun chwiryü nrün tsügü pe Sunggigü Nyugü thyü ti.

³⁶Lo hire, ha kaminyu Elisabet, mele a-no nyu kendi gile tse kehü gi a-ko a-then gwün ki pechenyu nme phou pvü bin laso; lo a-le tson kelo le hi shyetsero thyü laso.

³⁷Kechamvule Sunggigü le thame thyülo keho ndi.”

³⁸Tsontsin Maria le a-ka zo, “Ahile Npugü gogi le; ano nle kezo hontse lota.” Tsüselo tsangge lokethyü gü le a-khela njüo tinla.

³⁹Tsüsika Maria ai tin fümvu tse sen-o rincho dan nyu kebin Judia rünyi nme nyu gunla.

⁴⁰Tson-o a-le Zakariah kanyu yügü Elisabet kelu shü.

⁴¹Lo Elisabet le Maria le a-kelu keshü shalo ntsin a-nyugü le a-gin nyu nyhun sola; tsontsin Elisabet le Kenshün Kapu no a-süpvüo,

⁴²Jozo a-yhen thyüo Maria ka, “Nle tenunyu dan nyu kengvütsin gi le, lo nnyu nginnyu kebin gü ai kengvütsin le.

⁴³Lo a Npugü a-jvü le aka gunkeryü hi ale ditsüki asherhün la?

⁴⁴Hire, nle akelu keshü jo ale shalo ntsin aginnyu kebin nyugü ai a-sherhün-o nyhun bin laso.

⁴⁵Tsüntimvule Npugü le nka zokeshü tsü thyü penlo tsentsü tsekethyü tenyen kenbin gi ai kengvütsin lenye.”

⁴⁶Tsüselo Maria le, “Anyun le Npugü rüchün ngon bin laso;

⁴⁷lo a kapue a kenikelogü Sunggigü genyu a-sherhün bin laso,

⁴⁸kechamvule a-le a-go thalihi kemvu gi ai nri keshü genyu! Lo tsügenyu nthu gerho nyu gü yhun kekhin kinyu aphu no ale kengvü ketsin gi le tse zoti,

⁴⁹kechamvule Kekvutsin gü le a-npvü a shwi njün rishü laso. Lo a-zan ai nshün le,

⁵⁰tson-o yhunkerinyu jue lo a-tsi a-pwen nyue a-nshvu nrün kehü ju, a-le tsüdan shwinjün hünyo.

⁵¹A-le a-npvü a-ben pe tha keda ai thyü külo; a-le a-npvü a-nyun ki tha rüchün-o ketekho kehü ju no anyugun kehü bin shamvu laso.

⁵²Anyugun so keda jule anyugun bin ge anyugun hü laso, lo a-le mele nshwen kehü ju thyü ngon shü laso.

⁵³A-le nnyo kehü ju no thakegwa tyü pe a-gin nyü loso, lo a-le thame khipe kenyanyu ju tsü mvutse anyugun no tin laso.

⁵⁴A-le agun pvübon nyu ka zoshwi shü kenjü tsü ketsin thyüo, ryü a-gogü Israel shwi njün shü laso.

⁵⁵A-le kethonthen Abraham lo a-tsi a-pwen njün titse rüchün lo laso!”

⁵⁶Tsüselo Maria le shyeshen laki binlo njüo a-npvü a-ka ki nigun la.

⁵⁷Tsüselo Elisabet le a-nyu nnyu kelo gwünkho penlo njüo pechenyu nme nnyulo.

⁵⁸Tsontsin a-kazonkazin lo a-shvu a-nye nyu le Npugü le a-shwi njün sa keshü shalo njüo anyugun kengüo sherhün sa tselo.

⁵⁹Tsüselo mele jon tetsenyü anyugü girü titse gunryü laryü, anyugun le a-zan tha pe a-pvü Zachariah zansü thyü ti letse so.

⁶⁰Ai a-jvü le anyugun kazo, “Tson loho, a-zan tha pe Johan thyüti.”

⁶¹Tsontsin anyugun le a-ka, “Nshvu nnye nme-e zan higü pe a-zan thyü soryü mvu.”

⁶²Tsonlo a-pvü we a-zan no segü thyü tiyo tsekethyü anyugun le anyugun ben pe tharo thyüo a-pvü ketso.

⁶³Laryü a-le tha nme hio tsüge tsü, “A-zan le Johan,” tse thu shü. Tsügenyu anyugun aphu anyugun dun thyüla.

⁶⁴Tsontsin Zakariah le jozo chwiryülo, lo a-le Sunggigü shwen so.

⁶⁵Tsügenyu anyugun khokeni ka kebin nyu ju aphu no nshvu salo la; lo rünyi aphu nyue tsü zope sü gunla.

⁶⁶Lo jo tsü keshanyu aphu anyun ki, “Nyu tsügü tsüle hisiki nyu hontse thyü tiyo,” tse kethyü rüchün tinla. Kechamvule Npugü kekvu le a-zan kebin genyu.

⁶⁷Lo Johan a-pvü Zakariah le Kenshün Kapu no a-sü pvüo sidyü keshajo kezo le hihontse:

⁶⁸“Israel Sunggigü, Npugü Shwen lochi! kechamvule a-npvü a-temi rüchün-o anyugun kenilo nrün da nme thyülo kela genyu.

⁶⁹A-le anyugun genyu kenikelo kedagü khishü laso, a-gogü David shvunye dan nyu.

⁷⁰A-le nduka a-sidyükesha kenshün nyu dan mün nyu zoshwi shü kenjü hontse

⁷¹a-le ngun kenrhinyu ben nyu ngun keni loti, ngun shwirüchün kehü kekvu dan aphu ben nyu.

⁷²A-le ngun pvübon nyu shwi njün Shüti tse zoshü lo a-jo kenshün gü rüchün shü.

⁷³Keswe keda thyüo ngun bon Abraham ka a-le zo-o ngun shwikerüchün nyu ben nyu ngun kenilo ti tse lo ngun no kenshvu ndi tse a-lothyü ti,

⁷⁴

⁷⁵Tson-o ngun no ngun keyhun then a-mhundyü nyu nshün lo kemitsin-o bin nrün genyu.

⁷⁶“Lo nle, anyu, Ketetsotsin gü Sunggigü sidyükesha gü tse koti. Lo nle Npugü mhun kehyu mhundyü a-tson nda pe a-tsü ti,

⁷⁷A-le temi dan no kenikelo rüla sha loti kenikelo tsügü tsüle nkemu jü pe nketsü gü le,

⁷⁸Kechamvule ngun Sunggigü le shwikenjün gü le. Tson njüo tsangge keben kegwa sen tsüryüo ben shü ti letse

⁷⁹lo kezün nyu kebin kesi shye gü ai gwün nben shü titse, lo a-le ntson tsin pe nno nyun kebwen tson nyu gun loti.”

⁸⁰Tsüselo nyu tsügü le peshülo lo Kapu rüla kipon-e nkin ashvu thyülo; tson njüo Israel nyu mhundyü ka gingvü chwiryülo kethyü gwünkho ti kemvuthen tehen nyu mele rünyi thyü hükemvu bin ki hü pe ti.