Read Southern Rengma Naga LUK 10 Bible Online

LUK 10 - Southern Rengma Naga bible

LUK 10

¹Lo Jisu le jo tsü zoshü kela sika temi kechanyu hentsenyü kejülo-o tsüdan nyu mihvu hvu nipe anyugun no a-le gü titse kebin rünyi aphu ka lo bin aphu nyu shü.

²Tson-o a-le anyugun ka, “Low we chonsa, ai thakethyü nyu le rho; tsügenyu hagun low Npugü no lothonyu nipe a-low nyu shülo nrün genyu a-ka hilo chi.

³Hagun le tsonchüshü chi; hire, tanyü le teken dan ka kegü hontse ale hagun nishü güzhü nyo.

⁴Hagun le pisa khin, nmvue thakhvü, nmvue phaje nme-e sen nya; lo tsonne nyu temi nme-e kelu bin nya.

⁵Tson-o hagun le ka lika hika yülo jochü pe ka tsünyu shülo terilo.

⁶Lo jochü hyulo kekü le ka tsü nyu bin yatselo hagun jochü tsüle a-ge bin lo ti; ai tsonmvu yatselo hagun ge nigun ryü lati.

⁷Lo ka tsünyu tsü bin-o mele tha khikeshü tsü tyülo. Kechamvule tha thyü kehünyu le a-chün hyutyü zü kethyü genyu. Lo nme ka nyu bin tseo kelani sen-o kechanyu kanyu nigun la nya.

⁸Lo hagun le rünyi lika hika güo mele hagun zenlo yatselo, mele tha khipe hagun ketsü dan tsü tyütsülo.

⁹Lo rünyi tsünyu kehokenyü le bin yatselo thyü kesherhün shülo, tson-o anyugun ka, ‘Sunggigü keda le ryüo hagun khonni bin laso,’ tsonkethyü zoshü.

¹⁰Ai hagun rünyi lika hikae yüo mele hagun zenlo mvulo, tsonda nyu gü temi tsüdan ka, hagun rünyi nyu nnyon le apha nsü kelo hi-e hagun kemu genyu agun le tsüe kenishü lati tse binla sele nye.

¹¹‘Ai Sunggigü keda we ryüo a-khonni bin laso, jo tsü shalo chi, tsonkethyü zoshü nye!’.

¹²Ale hagun ka zoshü ti, tsünyü rünyi tsügü rüla nyeki Sodom kazü nyu kenjün kethyü khvü gü we pvü nshe kvu ti.

¹³“Che, Korasin, nwe thyülo tiso! Che, Betsaida, nko thyülo tiso! Hai rünyi nyu tha keda thyükeshü tsü nduka Tur lo Sidon rünyi nyu thyüshü yatselo, au ai ronphi lo jonbü sen-o nduka nyu au nyunkelulo lati atale.

¹⁴Tsügenyu ketso nrün nyü we hai nyeki Tur lo Sidon au khvü we nshen kvu ti.

¹⁵Lo, Kapernaum, nthyü nso pe tsang tun ti tse bin le? Nthyü ketsenyo pe Hades ki shü lati!”

¹⁶Jisu le a-le senthyükelonyu ju ka zo, “Temi lihigüe hagun khwenyü kehünyu le a-khwen-e nyü hünyo; lo temi lihigüe hagun keni kehünyu le akeni hünyo; lo temi lihigüe akeni kehünyu le a nikeshügüe kenila hünyo.”

¹⁷Tsüselo temi hentsenyü dan tsüle ryüo anyugun shekerhün thyüo zo, “Npugü, tero gwakemvu dan-e nzan nyu agun jo zenlo le!” tson.

¹⁸Tsüselo Jisu le anyugun ka zo, “Ale tsangge satan le tsangkekechwe hontse tsükeryü hyuso!

¹⁹Hire, ale hagun no peri lo zukeshon nyu kedülo nrün, lo shwikerüchün nyu so kekvu aphu khipe hagun tsüla sele nye! Tsügenyu tsüdan nme-e hagun nthyü ndon keloi ndi!

²⁰Ai kapu dan le hagun jo zenkelo genyu we hagun sherhün nya, ai hagun zan thu pe tsangge bin kela genyu hagun sherhünlo chi,” tsonshü.

²¹Tsükatsü a-le Kenshün Kapu nyu a-sherhün-o zo, “Hie, Apvü, tsang lo kazü Npugü, Nle thakesha kerüchün kegwa nyu ka we jo hidan hi kebu njüo pe nyupin nyuhonyu dan teshakeshü genyu ale nshwen hünyo; ketsin, Apvü, Nyhühyu ka le hihontse kethyü hile nkendo genyu.

²²“Apvü le tha aphu pe aben nyu shü laso; lo Pvügü kemvu we temi nme-e Nyugü sha hümvu; tsühontse Nyugü, lo Nyu tsügü le tsinpe hikeshünyu kemvu we temi nme-e Pvügü le segü yo sha hümvu,” tsonshü.

²³Tsüselo a-le ranigü senthyükelo nyu dan nrio anyugun ka, “Hagun le kehyu hi a-yhütyü no kehyu nyu dan le jochü kepvü tsin.

²⁴Kechamvule ale hagun ka zo shüti, sidyükeshanyu lo rajanyu kechon le ntsoka hagun le hyu kehü hi hyushü nyü ho ryü, ai hyu mvu laso; lo anyugun le ntsoka hagun le nyü kehü dan hi nyüshü nyü ho ryü, ai nyülo mvu laso,” tsonshü.

²⁵Tsüselo tejvü keshanyu nme le soryüo Jisu semen-o zo, “Senkethyü gü, ale kethonthen kerhün hyulo nrün genyu nyu thyülo mvulo shvula?” tson-o ketsoshü.

²⁶Jisu le a-ka, “Ketsin lesü ka nyu thu njü nla? Nle nyu rüchün-o swü hü nla?” tson-o a-ketso nishü.

²⁷Lo temi tsügü ko zo, “Nle nnyun aphu, nkeyhun aphu, lo nkekvu aphu, lo nkerüchün aphu sen-o Npugü so lo rühvu lochi; lo nkazonkazin so pe n npvü nkeso hontselo chi,” tson.

²⁸Tsüselo Jisu le, “Nle zoto shü laso; tsühontse le, tsonlo yatselo nle rhünlo ti.”

²⁹Ai temi tsügü le a-le njü letse lonyüo, Jisu ka zoni, “Tsonlo segü le akazonkazin la?” tson-o ketsoni.

³⁰Jisu le zo, “Nduka temi nme le Jerusalem nyu bin tseo Jeriko ki nshye zhü, tsüka mehon seketyü nyu dan me le a-nrhisülo njüo tsüdan le a-phi a-nya rholo la-o a-vü, tson-o a-boshvu kesala njüo a-khelao tinla.

³¹Tsükatsü peshükedanyu nme le tsü tson kipon n shyeryü laryü; temi tsügü le a-hyushü njüo a-terhon-o kecha kipon tinla.

³²Lo tsühontse Levinyu nme ko n shyeryüo a-hyushü njüo a-nrhi sen-o kecha kipon tinla.

³³Ai Samarianyu nme le njwen ryüo a-kebin bin tilo ntsin a-hyushüo a-shwipe a-nyun kenjünthyü la.

³⁴Tson-o a-khoka ryüo a-ge tejünshvu tsü terzü lo vain zu jape yün shüo phin küshü; tson-o a-khipe a-gada ge shülo-o a-khipvüo tesinka nme nyu gü a-nucha bin.

³⁵Lo tsüsinyü ko a-le jonhvu chün khi nipe tesinka kekhwen gü tsüshüo, ‘Nle nucha binlo nye; lo nle hinyeki tha le nichwila yatselo ale hisiki niryü kethyü ka khinipe ntsüla ti.’ ”

³⁶Jisu le jo kenkhin zo-o, “Kha, anyugun mishen dan nyu segü le mehon seketyünyu dan le nrhisülo-o a-vü kelagü kazon gü letse kethyü nle rüchün bin nla?” tson-o ketso.

³⁷Tsontsin tejvü kesha gü le zo, “A-shwinjün keshü gü le teso.” Tsügenyu Jisu le a-ka zo, “Nko gungü tsühontse thyülo chi,” tsonshü.

³⁸Tsüselo anyugun le gun titse kebin nme ki gunzhü kethyü ka a-le rünyi nme nyu yü; lo tsünyu a-zan le Martha tse kethyü tenunyu nme le a-nsinlo.

³⁹Lo tenunyu tsügi le a-sikezen gi a-zan le Maria tsekethyü nme le bin, a-le Npugü pha nyu bin-o a-jonyü bin.

⁴⁰Ai Martha we tha aphu thyüo ra bin; tsügenyu a-le ryüo, “Npugü, a-sikezen gi le tinlao ano anpvü ra kebin hi nle rüchün bin mvu ole? Tsügenyu nle a-nishüo a-no ryüo acheo tha rashülo.”

⁴¹Ai Npugü le a-ka zoshü, “Martha, Martha, nle tha kechon thyülo nyüo nnyun kenjün thyü bin nyo.

⁴²Ai thyükezü gü le nme nti le; Maria we tha kegwa tsin thame kae a-ben nyu se sentin lalo keho gü kejülo laso.”