Read Southern Rengma Naga LUK 11 Bible Online

LUK 11 - Southern Rengma Naga bible

LUK 11

¹Tsüselo a-le bin nme ki gü kehi thyü hüo hi kheshü ntsin senthyükelonyu nme le a-ka, “Npugü, nle Johan le tsin pe a-le senthyükelo nyu hikeshü hontse kehi jvü tsin pe agun ko agun hishü ta,” tsonshü.

²Tsügenyu Jisu le, “Hagun le hi kethyü ka: ‘Hire, agun Pvü, nzan no keshün gü thyülo, Nkeda thyü ryü lochi.

³Khenyütsen agun chvü pe agun tsüta.

⁴Lo agun kemu jü pe agun tsüta, kechamvule agun ko mele agun pupvü kebin nyu jü pe tsü kelasi genyu. Lo agun pe kesemen nyu shüla nya,’ ” tson hilo nye.

⁵Tsüselo a-le anyugun ka, “Hagun dan nyu temi nme le a-pvünyu ketsin le bin-o a-le tsanglu tsangzü ki ryüo tsügü ka;

⁶‘Apvü gü, nle tensü kenshen pe atsüshü tse ti mon? kechamvule apvünyu nme le njwen hüo ntsoka aki ryü bin, lo ale tha lope a-ketsüi ndi la sele.’

⁷Tson yatselo temi tsügü tsü le a-ka, ‘Ntsoka kae khinlo laso, lo anyenyu jue agun kengüo no ge zhükü tin laso. Ale sogü tsü khipe ntsülo mvu so, tson ti ole?’

⁸Ale hagun ka zoshü ti, temi tsügü le a-pvünyu ketsin nme konka mvule a-le kejo mvuo hi tenge tse bin kela genyu tsügü le soryüo a-le kehi aphu khi pe a-tsü ti.

⁹“Tsügenyu ale hagun ka zoshü ti, hi chi, lo lo pe hagun tsü ti; kakhin ketun shüta, lo khinshye pe hagun tsüti.

¹⁰Lo temi lihigüe hi kehünyu khipe tsü hünyo; lo fü kehünyue hyulo hü, lo kakhin kekho keshünyu le mele khinshye pe tsünyu tsüshü hünyo.

¹¹Lo hagun dan nyu segü le a-pvü ka tsehü hilo, peri pe a-tsü hü nla?

¹²Nmvue a-le terozü nme hilo, zukeshonnyu khipe tsü hü nla?

¹³Lo hagun gwakemvunyu hie tha kegwa lope hagun nyenyu ketsü do sha yatselo hagun Pvü tsangge kebin gü le Kenshün Kapu pe mele a-ka hi kehünyu tsüshü mvu ti ole!”

¹⁴Tsüselo a-le jozolo kemvu terogü hüshü ntsin; tero gwakemvu tsügü le chwiryüla ntsin jozolo kemvu gü tsüle jozolo la; tsüselo temi dan le anyugun dunthyüla.

¹⁵Ai tsüdan dan nyu peha le, “A-le terogwakemvu dan kedagü Belzebul zen-o tero gwakemvu dan hü kehü hile,” tsonso.

¹⁶Lo kechanyu dan me le a-semen-o a-no tsangge zansü thyü pe anyugun hilo tse sola.

¹⁷Ai a-le anyugun ka, “Keda lihigüe a-npvü a-pvükhola yatselo a-keda le nkela hünyo, lo kakhwün nmele kepvükho yatselo chela hünyo.

¹⁸Tsühontse satan ko a-dan kechacha thyüo kerüchün tselo a-keda le nyu tsethyüo binlo tila? Tsügenyu hagun le kezo we ale Belzebul zen-o tero gwakemvu dan hüla hü nle tse hünyo.

¹⁹Lo ale Belzebul kekvu sen-o tero gwakemvu ju hüla yatselo hagun nyenyu ju we segü kekvu sen-o tsüdan hüla hü nla?

²⁰Tsügenyu anyugun le hagun ketso kethyü nyu thyüti. Ai ale Sunggigü ben pe tero gwakemvu dan hüla hü yatselo, Sunggigü keda le ryüo hagunn tilo bin laso.

²¹“Temi kekvu nyu nme le a-kanyü thyüsa pvü tseo a-ka khwen bin yatselo, a-hon le gwa bin loti.

²²Ai a-nyeki kekvunyu nme le ryüo a-khin-o a-tenlo njüo a-le tenyen-o yhun kehü a-kanyü aphu a-ge yhünlo njüo a-hon sekelo tsü aphu kenjünlo hü.

²³“Temi lihigüe akipon kemvunyu le a shwikerüchün nyu le; lo temi lihigüe azen-o tha kequen hü kemvunyu le khipe kedukeru thyüla hü.

²⁴“Lo nshünkemvu kapu gü le temi ge chwikela ka a-le a-kesun bin füo zü kendi bin ki gun hü, lo hyulo kemvu genyu a-npvü a-ka zo-o, ‘Ale nduka chwikela kanyu nigun ti,” tson hünyo.

²⁵Tsüselo tsünyu gü ka tsügü le sho pe ketsü kezegwa kenjü hyulo hünyo.

²⁶Tson-o a-le gü a-nyeki keshvu gwakemvu kapu kecha tsenyü kope a-sinlo njüo anyugun le gü tsünyu bin tinla hünyo; lo temi tsügü rüla le kekhin kiwe kerika nyeki-e gwamvu kvula hünyo,” tsonshü.

²⁷Tsüselo a-le jo tsü zoshü ntsin tenunyu nme le me dan nyu nra sen-o a-ka zo, “Tenunyu nduka nphou kepvü gi lo ntsü kehügi nyeki jochü kepvü ndi.”

²⁸Ai Jisu le, “A-ketsin le, ai tsünyeki-e Sunggigü jonyüo zen kehünyu le jochü pvü kvu le!” tsonshü.

²⁹Tsüselo temi dan le ryüo a-khoka kequenlo ntsin a-le anyugun ka zo, “Shenhe higü hile serikemvu shenhe nmele. Anyugun le tha zansü gü hi nti fü kehü hile; ai Jona ge thyü keshü nyeki zansü thyü pe anyugun hisin loho so.

³⁰Lo nduka Jona pe Ninevinyu dan nyu tha zansü thyükeshü hontse, tsühontse Temi Nyugüe pe shenhe higü mhundyü ka tha zansü thyüti.

³¹Temi rüla ketso nrün nyü we tesin kipon tenunyu kedagi le soryüo hidan zen solo njüo anyugun nkhin ti; kechamvule a-le kazü keni kipon bin-o Solomon thakesha jo nyü titse ryü kethyü genyu. Lo hire, Solomon nyeki kegon nme le hika bin.

³²Temi rüla ketson nrün nyü we Ninevinyu dan le soryü shennhe temi hidan hi zen-o solo njüo anyugun nkhin ti; kechamvule tsüdan le Jona le gü anyugun senthyü keshü ka anyugun nyun kelulo kela genyu. Lo Hire, Jona nyeki kegon nme le hika bin nyo!

³³“Temi nme-e mah nben pe mele hyu hü kemvu bin ki nmvue thabin hensin ki shü la hümvu; ai kanyu ki keyü ju no tha hyulo nrün genyu makenben bin ge shü hünyo.

³⁴Nmin ge makenben tsüle a-yhütyü; n yhütyü le gwa kebin ka nmin aphu benchvü bin hünyo; ai gwakemvu ka we nmin aphu züntin la hünyo.

³⁵Tsügenyu nnyunki keben gü tsüno zünla mvu nrün genyu petsülo.

³⁶Lo nmin aphu no benchvü tseo keshanyue no zün mvu shü bin yatselo, makenben le a-kenben kenshwen pe n gwün n benshü kehü hontse, tsühontse nmin aphu benchvü binlo ti.”

³⁷Lo a-le jo tsü zoshü ntsin Farisinyu nme le a-no ryüo holo tse a-ko; lo a-ko gü tyütsü titse dun tsülo.

³⁸Tsükatsü Farisigü le a-le tyütsü kethyü mhundyü zü pe a-sü kemvu shwi pe a-dun thyüla.

³⁹Tsontsin Npugü le a-ka, “Hagun Farisinyu ju we khun hon-e lo tegwenki we thyü nshünla hünyo; ai hagun nyunki we me kesü kethyü lo serikemvu le süpvü hünyo.

⁴⁰Hire, tha rüchün hü kemvu dan, tegwenki thyü kenshün keshü gü le a-nyunki-e thyüshü mvu letse ole?

⁴¹Ai honpen lo khun nyuki kebin dan tsüpe rhokedyü nyu tsüla chi; tson yatselo hagun le tha aphu kae nshün kü lati.

⁴²“Ai hire, Farisinyu ju, hagun we chi thyülo tiso! Kechamvule hagun le güsen sonyü lo hen lihi-e jüntseryü thyüo jünme hoshü hünyo; ai hagun le kenjü gü lo Sunggigü so lo kerühvu tsühvu tsü nrhila hünyo. Ai hagun le hidan hi-e thyü lo zenlo zü, lo lidan ko khela zümvu.

⁴³“Hagun Farisinyu dan chi, thyülo tiso! Kechamvule sinagog ka nyu bin kegwa dan ka bin nyü kethyü lo hakethyü bin nyue meno hagun kelu kethyü le hagun kenyü kehü genyu.

⁴⁴Hagun we chi, thyülo tiso! Kechamvule hagun le mele hyu hü kemvu sika mele a-ge güe shahü kemvu hontse.”

⁴⁵Tsüselo tejvü keshanyu nme le a-ka, “Senkethyü gü, nle jo hidan kezo le agun aphu kesü kesin kebin hile!” tson.

⁴⁶Tsüselo Jisu le zo, “Chi, hagun tejvü keshanyu ju ko thyülo tise chi! Kechamvule hagun le pvülo keho khvü pe me npvü kehü genyu, ai hagun npvü we hagun zenkero nme-e sengü khvü tsüdan kesü shwi hümvu.

⁴⁷Hagun we chi, thyülo tiso! Kechamvule hagun le hagun pepvünyu ju le dushvu kela sidyükeshanyu dan sika khwen kehü genyu.

⁴⁸Tson-o hagun le hagun pepvünyu dan jünzo ngwalo lo anyugun tho-e no gwa letse kehü genyu. Kechamvule hagun pepvünyu ju le anyugun npvü tsüdan dushvu, lo hagun le tsüdan sika khwen kehü genyu.

⁴⁹Tsügenyu Sunggigü thakesha gü tsüle zo, ‘Ale sidyükeshanyu lo apostel nyu dan nipe anyugun ka shüti; ai anyugun le tsüdan peha dushvu lo peha nshwen ti.’

⁵⁰Tson-o kazü thyülo nyeka nyu sidyükeshanyu aphu zi,

⁵¹lo Abel zi no tsun keshü gerhonyu ryü kershvubin lo Kershvuka au jaka dukeshvu Zakaria zi keti, hagun phou ka tsüdan khün zoti!

⁵²“Chi, hagun tejvü keshanyu dan hagun we thyülo tise chi! Kechamvule hagun le me ben nyu thakesha chabi gü selo kela genyu. Hagun le hagun npvüe yü mvu, lo mele yü titse kehünyue khinla bin so!”

⁵³Lo Jisu le tsünyu chwiryü ntsin lesükeshanyu lo Farisinyu dan le a-kheshü nyümvu sao a-no tha aphu zokeshü rüchün-o a-zen kenyi so.

⁵⁴Kechamvule a-jo ka a-tenkelo rüchün ton kehü genyu.