Read Southern Rengma Naga LUK 13 Bible Online

LUK 13 - Southern Rengma Naga bible

LUK 13

¹Tsükatsü temi dan me le bin-o Pilat le Galil nyu dan me dushvu pe anyugun phoukerho senru kerhün kela rüla pe Jisu ka zoshü.

²Tsontsin a-le anyugun ka, “Hagun kerüchün le Galil nyu ketetsin kethyü hihontse teno kelo dan hile Galil nyu kechanyu aphu nyeki mu kvu letse kethyü rüchün bin nle?

³Ale hagun ka zoshü ti, tsonmvu! Ai hagun ko hagun nyunkelu lokemvu we tsüdan hontse nke kü lati.

⁴Lo Silom nyu tsokhwen le chwi keshü ka mi tseryüo tetse jonshvu kela dan, hagun le tsüdan tsüle Jerusalem nyu kebin temi aphu nyeki kemu thyü kvu letse rüchün hü le?

⁵Ale hagun ka zoshü ti, tson-e mvu! Ai hagun ko hagun nyunkelulo kemvu we tsüdan hontseo nke kü lati.”

⁶Tsüselo a-le jokejvü zo-o, “Temi nme le a-vain low nyu kherobin nme sen njüo, a-le a-sha fü gun laryü, nme-e hyulo mvula.

⁷Tsüselo a-le vainbin shwira kehü gü ka, ‘Hire, ale chenshen ryüo khero bin higü sha fü le! Ai a-sha nme-e hyulo mvula so; tsügenyu gwenla lo, tsü no nyuthyüo kazü khin bin tila?’

⁸Tsüselo temi tsügü tsü le a-ka, ‘Npugü, a-no nthunye ko bin nilo ta; tson-o ano a-pha ka nnyon tso nbwen shüo nnyon kegwa khipe gwün nishü ta.

⁹Tson-o nshalo nyülo nshalo; ai nmvu yatselo, nkendo hontse teken ki we gwen la ti,’ ” tson.

¹⁰Lo tsükatsü a-le Sabbath jon nyü sinagog ka nme nyu me senthyü bin.

¹¹Lo tenunyu nme le kapu gwakemvu nme genyu a-le chen tseryüo tetse ho tinkela genyu a-sen teren lao nyiso loho la.

¹²Tsüselo Jisu le a-hyushü ntsin a-ko-o a-ka, “Tenugi, ale nkeho tsü thyü pe ndila sele nye!”

¹³Tsonshüo a-le a-ben shwen pe tenugi ge shüshü ntsin a-thyü pe a-no nyiso whütse soryü la; tson-o a-le Sunggigü shwen sola.

¹⁴Tsüselo sinagog kanyu kedagü le Jisu le Sabbath jon nyü me thyü ngwa keshü genyu a-kenyü mvuo temi dan ka, “Temi no tha thyülo tsekethyü genyu jon tsero thyüshü; tsügenyu jon tsüdan ka ryüo hagun thyü ngwalo, ai Sabbath jon nyü we nnyalo.”

¹⁵Ai Npugü le a-ka zo, “Hagun kerokon kehünyu, hagun lihigüe Sabbath nyü hagun thu nmvue hagun gada nme kanyu shwülo njüo a-zen tsügü no zü tsü hü mvu ole?

¹⁶Tson yatselo tenu higi le Abraham nyenyu letseo satan no chen tseryüo tetse a-phin sen hü kethyü, nthu Sabbath jon nyü a-kephin tsü shwüshü zümvu ole?”

¹⁷Lo a-le jo tsü zoshü ntsin a-shwikerüchün nyu dan le kejo küla; ai temi aphu a-le tha gwari kethyü thyü keshü genyu anyugun sherhün sala.

¹⁸Tsügenyu a-le zo, “Sunggigü keda hile nyu hontse la? Nmvue tsü sen-o tha nyu tsekethyü zen kendyülo gwa tila?

¹⁹Tsüle hennyon tsi nme hontse le; temi nme le sen tsügü a-low nyu shüo yhun soryüo gon pe senbin thyülo, tson-o tegü no nsen hü.”

²⁰Lo a-le ketsoni, “Ale Sunggigü keda pe nyu kendyü shü lo gwa tila?

²¹Tsü le kebu hontse, tenunyu nme le tsü sengü tho kedun khin keshen nyu shülo-o tho le punchwiryülo kemvuthen kebu njü.”

²²Tsüselo a-le rünyi keda nyue lo rünyi keshe nyue gü senthyü tseo Jerusalem nyu ryü jü.

²³Lo temi nme le a-ka, “Npugü, kenilo nrün nyu le rho ti ole?” tson-o ketso.

²⁴Tsontsin a-le anyugun ka, “Hagun kakhin kenrün gü nyu yülo titse kethyü hagun yhen thyü lochi; kechamvule ale hagun ka zoshü ti, temi kechon le yü titse fü küti, ai yülo hole.

²⁵Tsükatsü kanyu npugü le sogü kakhin gü khinlo la yatselo, hagun le kamhunki bin-o kakhin kekho-o, ‘Npugü, kakhinshye pe agun tsüta,’ tsonti. Tsüselo a-le hagun ka, ‘Hagun le dikipon ryü yo ale hagun shamvu le,’ tsonla ti.

²⁶Tsüselo hagun ko, ‘Agun le nduka nyhühyu ka tha tyütsü, lo nko agun tson nyu me senthyü!’ tson soti.

²⁷Lo a-ko hagun ka, ‘Hagun le dikipon ryü yo ale hagun shamvu; hagun gwakemvu kethyü ju aphu anrhi tin lalo!’ tsonla ti.

²⁸Tsüselo hagun le Abraham, Isak, Jakob lo sidyükeshanyu aphu Sunggigü keda nyu kebin hyulo ti, lo hagun hü pe kamhun ki shü kela ka hagun le tsünyu chüo hagun hü keta bin ti.

²⁹Lo mele mpho kipon lo nkhün kipon lo teso kipon lo tesin kipon ryüo Sunggigü kedanyu binlo lati.

³⁰Lo hire, kekhinyu le rila ti, lo kerinyu le khinla ti.”

³¹Tsügwünkho ka Farisinyu dan me le ryüo a-ka, “Nle hinyu bin nyao tinla lo; kechamvule Herod le ndushvula nyü kebin genyu,” tson.

³²Tsüselo a-le anyugun ka, “Hagun gü Mesükerun tsügü ka zola chi. Hire, ale nthu lo senduki tero gwakemvu hü lo kehokenyü nyu thyükesherhün bin ti, lo jonshen nyü we ale atho thyü penla ti.

³³Tson-e ale nthu lo sendu lo hadu ki tse atson nyu tsonchü bin mvuloshvu. Kechamvule Jerusalem kemvu we kechaki sidyükeshanyu dushvu hümvu.

³⁴“Che,Jerusalem, Jerusalem! Sidyükeshanyu dushvu kehü, lo nipe nki keshünyu tso pe tsünyu jon kehü, tero tsü le a-nyenyu khokequen pe a-hensin kishülo kehü hontse ale gwün dikho nnyenyu ju kho kequen lo nyü sola! Ai hagun npvü nmvu laso!

³⁵Hire, hagun ka no nrunlao khipe hagun ben nyu shüla ti. Tsüntimvule ale hagun ka zoshü ti, hagun le, ‘Npugü zan sen ryü kejü gü le a-phou kengvü tsin,’ tsonkethyü zo kemvuthen we hagun le a-hyu loho so.”