Read Southern Rengma Naga LUK 14 Bible Online

LUK 14 - Southern Rengma Naga bible

LUK 14

¹Tsüselo Sabbath jon nme nyü Jisu le Farisinyu dan nyu kedanyu nme kanyu ho titseo yü ntsin mele a-nri ryü bin.

²Lo zü nyuphou kepvünyu nme le a-mhundyü ka kebin hyulo.

³Tsüselo Jisu le tejvü keshanyu lo Farisinyu dan nthon-o, “Sabbath jon nyü kehokenyünyu thyü ngwa keshü le tejvü le nmvu la?” tson-o ketso.

⁴Ai anyugun le nma tse gwünzin tinla. Tsontsin a-le temi tsügü kesüshüo a-no gwalo njüo tinla.

⁵Tsontsin a-le anyugun ka, “Hagun peha le hagun gada nmvue hagun thu le bin-o tsüle tekhwün kü nyu che tsüla yatselo, Sabbath jon nyüe tin fümvu gü süsen chwiryü mvu ti ole?” tson-o ketso.

⁶Tsüselo anyugun le jo tsü shashü njüo thame zokelo anyugun rhodyü la.

⁷Tsükatsü ho lotseo ko zen keryünyu dan le bin kegwanyu füo dun kebin hyushüo a-le anyugun ka jokejvü zoso:

⁸“Temi lihigüe hagun no senhü ho nyu ryü lotse hagun koshüe gü kedanyu bin nyu bin tinla nya; a-le hagun nyeki teshwen kepvünyu peha koshü bin-e shalo keho genyu.

⁹Lo hai mihvu ko keshü gü le ryüo nka, ‘Temi ligü bin phashülo tse solo,’ nle kejo-o gü bin ketsenyo tsingü ki dun tinla ti.

¹⁰Tsügenyu mele nkoshü yatselo, gü bin ketsenyo tsin ka dunlo chi; tson yatselo nko keshügü le ryülo a-le nka, ‘A pvügü, nle gü bin ketetso din ki dunlo chi,’ tson so-e sha loho. Tsonlo nko ryüo ho kebin nyu aphu mhundyü ka teshwen pvükvu nrün genyu.

¹¹Kechamvule temi lihigüe a-npvü a-thyü pe gon kehünyu thyü pe shenla ti, lo temi lihigüe a-npvü a-thyü nshen kehünyu thyü ngon shüti.”

¹²Tsükatsü Jisu le a-ko keshü gü ka, “Nle lonyü nmvue nhennyu me zen-o ho titselo, npvü nshen nmvue ntsagü sikezen nyu nmvue nshvunye nmvue nkazonkazin kenya nyu nti ko nya nye. Tsüdan we nkoni zen gü honi lae shamvu.

¹³Ai nle lika hikae me zen-o ho titselo, thakendinyu, phouhanyu, phayhonnyu, a-yhütyü keponyu, tsüdan kolo nye; tsonyatselo nle jochü pvülo ti.”

¹⁴Anyugun le thame sen-o njün ketunlo keho genyu; tsüntimvule kentsen nyu le rhünni keso nyü njün ketun shüti.”

¹⁵Tsükatsü anyugun ho kebin nyu nme le jo tsü shashü njüo Jisu ka, “Sunggigü kedanyu ho kelonyu le kengvü tsin,” tson.

¹⁶Ai a-le temi tsügü ka, “Temi nme le keho ndo sa pe bin njü, tson-o a-le temi kechon koshü.

¹⁷Lo a-le ho nrün mün ka a-gonyu nishüo nchwenyu kokeshünyu dan ka, ‘Ryülo, tha aphu ndolo kelasi genyu,’ tsonkethyü zoshülo tseshü.

¹⁸Ai anyugun aphu anyugun jo kememe tseo tha nmeme zo küla. A-kerigü le a-ka, ‘Ale low nme heishü laryü, tsügü shwishü mvuloshvu le, nle a njün lo a hoshülo,’ tsonla.

¹⁹Lo kecha nme le, ‘Ale zen-o thathyü kehü methu kepen pvün hei njü laryü, ale tsügü tsüdan shwishü tile, nle a njün lo a hoshü lo,’ tsonla.

²⁰Lo kecha nme le, ‘Ale tenu nme lope bin njü nyo, tsügenyu ale ryülo mvule,’ tsonla.

²¹“Tsüselo gogü le ryüo jo tsü lope a-npugü ka zoshü. Tsontsin ka tsünyu npugü le a-kenyü mvu salo njüo a-gogü ka, ‘Nle gü nyida gü tsonda ki-e lo tsonba ki-e tha kendinyu, lo phouhanyu lo a-yhütyü keponyu lo phayhonyu zen-o hinyu whütse ryülo chi,’ tsonshü.

²²Tsüselo gogü le, ‘A npugü, nle thyülo tse keshügü tsü thyülo laso, ai ntsokae bin peha le nrun bin zun.’

²³Tsüselo Npugü le a-gogü ka, ‘Nle gü tsoncho da nyu lo tsonba ki-e me ko zen ryüo aka kesü thyü shülo.

²⁴Kechamvule ale hagun ka zoshü ti, nchwenyu ko keshü dan tsüle nme-e a-le keho ndo kenjü nyu hi ryüo ntsinlo keho genyu!’ ”

²⁵Tsüselo temi danda le a-zen kehü ka, a-le rani gü tsüdan ka,

²⁶“Temi lihigüe aki ryüo a-npvü a-pvü a-jvü lo a-nunyu lo a-nyenyu lo a-tsasikezen nyu lo a-lüginyu lo tsüntimvule a-phue tepen mvulo kemvu we, tsünyu le ale senthyükelonyu letse zolo nrün ndi.

²⁷Temi lihigüe a-npvü a-krus pen mvu tseo a sithen kehünyu le ale senthyükelonyu letse lo nrün ndi.

²⁸“Khelo, tsonlo hagun peha le tsokhwen nme khwenti tselo, nchwenki a-le bin kegwa thyülo njüo tha dikho pe tsü khwen tiyo, nmvue a-le tha tsügü thyü gü tilo tile mvuyo, tsekethyü rüchün kemvu segü le bin nla?

²⁹Tsonmvuo keshanyu laka a-le a-binzenlo njüo thyü gü tilo hola yatselo, mele tsü kehyunyu aphu a-shwinyüo,

³⁰‘Ha! Temi higü le hithyü tse njüo thyü kügü ti loho la se hile!’ tson so-e sha loho le.

³¹“Nmvue rajanyu nme le raja kechanyu nme zen kega titse kegun ka, ‘A-le bin kegwa thyülo njüo, a-le temi yie tseryü zen gü kechanyu temi yie nki a-zen-o kega titse ryü kezhü gü zen keteno logwa tile mvuyo, tse kethyü rüchün kemvu raja segü le bin nla?

³²Lo tsüle thyü loho yatselo a-zen kega titse kebin gü le nithen ki kehü ka a-le a-lokethyünyu nishüo gü gwathola nrün rüla ketso hünyo.

³³Tsügenyu tsühontse hagun dan nyu temi lihigüe a-hon kebin khe tepen-o ale senthyükelonyu thyülo nrün ndi.

³⁴“Tsühontse tsi tsüle gwa, ai tsi-e a-keyhün ndila yatselo nyu lope gwün nyhünlo tila?

³⁵Tsüle nnyon-e lo thakechae gwün pe gwalo hümvu; meno khepe shwenla kehü gwünzin le. Temi lihigüe a-nyetin le kebin nyu no nyülo chi!”