Read Southern Rengma Naga LUK 15 Bible Online

LUK 15 - Southern Rengma Naga bible

LUK 15

¹Tsükatsü khajana keshvu nyu lo kemunyu aphu a-jo nyü titseo a-kho nni ryü.

²Tsüselo Farisinyu lo tha keshatsin nyu ju le tsü kenyon-o, “Temi higü hile kemu nyue zen-o tyütsü kehü hile la!”

³Tsontsin a-le jokejvü higü hi pe anyugun nthon-o:

⁴“Hagun dan nyu temi peha le tanyü tsi le bin-o tsü dan nyu nme nmhenla yatselo, henteküo tekü ju khepe tehenyu shülao gü nmhen kela gü hyulo kemvuthen fü hü kemvu segü le bin nla?

⁵Tson-o a-le tsügü tsü hyulo yatselo khipe a-buthun ge shülo njüo, a-sherhün sa bin hünyo.

⁶Tson-o a-le pen gunryüo ka tilo ntsin a-pvü a-shen lo a-kazonkazin ko kequen külo njüo anyugun ka, ‘Hagun ko ngun kengüo sherhünlo nu, kechamvule ale a tanyü nmhen kelagü hyunilo kela genyu,’ tson hü.

⁷Ale hagun ka zo tsentsü shüti, tsühontse nyunkelu kethyü senmvue gwa tsekethyü temi kentsen kegwa henteküo tekü nyeki-e kemunyu nmele a-nyunkelu kelo genyu tsanggenyu le a-sherhün ti.

⁸“Tsüntimvule tenunyu nme le doli tseryü le bin-o nme nmhenla yatselo, mah nbenlo njüo a-le tsügü hyulo kemvuthen fü hü kemvu tenunyu segü le bin nla?

⁹Tson-o a-le tsü hyulo yatselo, a-pvü a-shen lo a-kazonkazin kokequen lo njüo, ‘Hagun ko ngun kengüo ngun sherhünlo nu; kechamvule ale adoli nmhen kela gü hyunilo kela genyu!’

¹⁰Tsühontse ale hagun ka zoshü ti, kemunyu nme le a-nyunkelu kelo genyu Sunggigü lokethyünyu yhühyu kae sherhün hünyo.”

¹¹Tsükatsü a-le zonishü, “Temi nme le a-nyu le mihvu le bin.

¹²Nchegü le a-pvü kazo, ‘Apvü nkenya ajün thyü nrün kho khipe atsüla lo.’

¹³Tsüselo a-pvü le a-hon kenjün pe au tsüla. Lo jon thon sari kemvu ka nyu nchegü le a-hon aphu sen-o rünyi nithen nme ki gü ntsen serimvuo tsünyu a-hon nke bula.

¹⁴Lo a-hon tsü aphu jwen tyü lobu ntsin rünyi tsünyu chenda ketetsin nme le soryüla; lo a-le tha ndila.

¹⁵Tsügenyu a-le gü rünyi tsünyu sun nyünyu nme kachün thyü tinla; tsüselo temi tsügü le a-nipe a-low nyu shüo a-no tebo khwenlo tseshü.

¹⁶Tsükatsü a-le tebo chvü thyü kehü rhütsi yhun-e tyüo a-ginyü kelo nnyü sola; ai temi nme-e tsüe pe a-tsü mvu.

¹⁷Tsontsin a-le a-nyun ntsenlo njüo a-npvü a-nthon-o, ‘Apvü nyu le temi kechon jonshye zen kehü aphu a-ketyü ketsü le kesükela thyü bin nyo, lo tsünye ki-e chonsa bin nyo; ai awe hinyu khünsi güzhü laso!

¹⁸Ale solo-o apvü ki nigun gü a-ka, Apvü, ale Sunggigü mhundyü kae lo nmhundyü kae mu laso.

¹⁹Ale nno ale nnyu letse kethyüe kolo kümvu la sele, nle ano njonshye nyu nme-e thyülo ta,’ tson sola.

²⁰Tson-o a-le solo-o apvü ki gun laryü. “A-le nithen ki kehü ka a-pvü le a-hyushüo n ton gü a-gwen penlo-o a-mbo sola.

²¹Tsüselo a-nyugü tsüle a-pvü ka, ‘Apvü, ale Sunggigü mhundyü kae mhundyü kae mu laso; ale nno alope nnyu letse kethyüe zolo kümvu laso,’ tsonso.

²²Ai a-pvü le a-gonyu ju ka zo-o, ‘Hagun whütse gü phi kegwa tsin sen ryüo a-no ben lochi; lo benkhin nme pe a-ben nyu shü, lo phaje-e pe a-no pvülo.

²³Lo gü methunyu aphou kegwa gü tsü hü sen ryüo dushvulo, tson-o n gun aphu tyütsü-o sherhün tile nu!

²⁴Kechamvule anyugü hile sila laryü, rhünnilo laso; nmhenla laryü hyunilo kela genyu.’ Tson-o anyugun kengüo anyugun shekerhün thyü bin.

²⁵“Tsükatsü a-tsagü le tsügü low ki hü; tson-o a-le ka kho nni ryü kezhü ka mele lüthyü lo kechwen keyü thyü kebin nyülo.

²⁶Tsüselo a-le a-gonyu nme koshüo, ‘Nyu genyu tsühontse bin yo?’ tsekethyü ketsoshü laryü,

²⁷gogü le a-ka, ‘Nsikezen gü le niryü laso; lo npvü le n sikezengü le gwa sherhün bin-o hyuni kelo genyu methunyu a-phou kegwa gü dushvu tyü bin nle!’ tsonshü.

²⁸“Ai a-le a-nyunntao kanyu gü mvula. Tsügenyu a-pvü le chwiry"yo tenge tse a-jvü so.

²⁹Ai a-le a-pvü ka zo-o, ‘Hire, ale chen hitsüla ki nlothyü ryü, lo khenyüme-e njo zen kemvu thyü hümvu; tson hüe nle tenyünyu nme-e khipe atsüo ano pe apvü ashen zen-o shekerhün thyü shwi mvu.

³⁰Ai nnyu higü we tenunyu serikemvunyu zen-o nhon nke tyü bulo njüo ryü laryü, nle nthunyu aphou kegwagü dushvu pe a-tsü bin laso!’

³¹Tsüselo a-pvü le a-ka zo-o, ‘Anyugü, nle azen zin hü teso, ahon aphu le nhon le la.

³²Ai n sikezengü le sila laryü rhünnilo, nmhenla laryü hyunilo; tsügenyu n gun le n sherhün lo nnyunnyü bin hüzü le.’ ” tson.