Read Southern Rengma Naga LUK 16 Bible Online

LUK 16 - Southern Rengma Naga bible

LUK 16

¹Jisu le senthyükelonyu dan ka zo, “Kenyanyu nmele meno a-hon ntsen kehü le bin. Lo a-hon ntsen kehü gü le tsü khipe kenthyü bu binla sele tseo mele kenya gü ka zoshü,

²Tsüselo kenya gü le a-ko zen ryü-o a-ka, ‘N rüla nme zo-o anyetin ka keryü hile, nyuthyüo honla? Nle kanyü ntsen kehü ketsin petsü shülo, kechamvule nno ahon kentsen nyu thyüni loho kethyü genyu.’

³Tsüselo kenya gü hon ntsen kehü gü tsüle a-npvü a-nthon-o, ‘A npugü le ano a-hon kentsenyu thyü loho sele tselo, ale nyuthyülo gwa tiyo? Ale kazü du metse-e kvumvu; ale shvutyü metselo kejo.

⁴Me kanyü kentsen tho hinyu hi me le a hüshü selo, meno azen hülo kegwa thyülo nrün genyu ale tedo nme shalo so.’

⁵“Tson bin laryü, a-npugü pupvü kebin nyu nme me ko zen ryüo a-kerigü ka, ‘Nle a npugü pu dikho pvü bin nla?’ tson-o ketsoshü.

⁶Lo a-le, ‘terzü khin tsime,’ tson sola. Tsüselo a-le temi tsügü ka, ‘N lesü khilo njüo dun tsügü henpvün thu whütselo,’ tsonla.

⁷Tsüsika a-le kechanyu nme ka, ‘Dihontse la nko dikho pu pvü bin nla?’ tson-o ketsoni. Lo temi tsügü le, ‘Tho khin tsime,’ tsonshü. Lo a-le tsügü ka ko, ‘N lesü khilo njüo hentetse thulo,’ tsonni.

⁸“Tsüselo a-npugü le a-gogü tsüle kekhin keri rüchün-o tha thyükeshü genyu serikemvu gogü tsüle a-do gwasa letse la. Tsühontse kazü hinyu temi le a-npvü a-temi kipon we keben gü nyenyu nyeki a-do gwakvu.”

⁹Tsüntimvule ale hagun ka zoshü ti, “Ketsin kemvu kenya kanyü sen-o hagun pvünyu fülo chi; tsonlo yatselo kenya tsü le ndi kela ka mele kethonthen bin nrün ka nyu hagun zenlo ti.

¹⁰Temi lihigüe tha keshanyu kae meno tenyenlo kegwa thyülo yatselo, tha kechon kae mele a-tenyenlo gwa; lo temi lihigüe tha keshanyu kae mele a-tenyen lo keshvu thyüla yatselo, tha kechon kae mele a-tenyen loho.

¹¹Tsügenyu hagun le ketsin kemvu kenya hinyu meno hagun tenyenlo kegwa thyülo mvu yatselo, segü le ketsin gü kenya pe hagun ben nyu shüo hagun tenyenlo gwa tila?

¹²Lo hagun le mehon kesen kae meno hagun tenyenlo kehoi thyü yatselo, segü le tha khipe hagun tsüo hagun no sen-o hagun hon thyü tila?

¹³“Mego thyü kehünyu nme-e a-npu nyu mihvu go thyü kesin loshvu; tson yatselo a-le nme ntsü lo kecha gü shwi pe a-kenyü lati; nmvue nme kipon hü tinlao kecha gü nkhin lati. Hagun le Sunggigü lo Kenya au go thyü kejvü loshvu.”

¹⁴Tsüselo Farisinyu seki raka tepen kehünyu dan le jo tsü shashü njüo anyugun le a-shwinyü so.

¹⁵Tson-o a-le anyugun ka, “Hagun we temi kehyu ka, hagun le kentsen keserinyu letse hünyo; ai Sunggigü le hagun nyun sha kü. Kechamvule temi mhundyü ka tha keda letse kehü nme le Sunggigü mhundyü ka tha kentsükenchen nme genyu.

¹⁶“Johan le ryü kemvuthen tejvü gü lo sidyükeshanyu le hü; tsükatsü nyu Sunggigü jolokegwa zope me senthyü ryü. lo temi aphutsünyu yüryü nyü so.

¹⁷Ai tejvü nyu we kethu keshen ketsin gü le ndi kela nyeki tsang lo kazü le ndi kela le nnekvu.

¹⁸“Temi lihigü a-nunyu khelao tenu kecha lo yatselo a-le keyüla laso; lo temi lihigüe tenunyu a-nyepvünyu le hü kelagi lo yatselo a-ko keyüla laso.

¹⁹“Kenyanyu nme le phi a-min ketsen lo linen phi kegwa khiben-o khenyütsen yhun ketegvü hü.

²⁰Lo Lazar tsekethyü shvuketyü nyu nme ko kethyü no a-ge süpvüo meno a-zen gü a-chonrha ka shü njü hü.

²¹Lo a-le kenya gü miz ge chvü le nrhi ketsüe tyünyü ho tse bin; lo tehi le ryüo a-ge kethyü shvu tsü lulu tse bin hü.

²²“Tsüselo khenyüme shvuketyü gü le sila, tson-o tsangge lokethyünyu le a-khipen gü Abraham nyun ge shüla; lo kenya gü ko silao meno a-pen gü sunla.

²³Tson-o a-le gü Hades nyu kenjünthyüri tsin tseo, nyi soshü laryü, a-kepen ki Abraham lo a-nyun ge Lazar le kebin hyulo.

²⁴Tsügenyu a-le nra a-yhen thyüo, ‘Apvü Abraham, nle a njünlo Lazar nishüo no gü a-zenkero rae pe zü nyu ntsen senryüo ayi thu nkun shü lo; kechamvule ale mah kenyün hinyu kenjünthyüri bin kela genyu.’

²⁵“Ai Abraham le, ‘Anyugü, nle n npvü rüchün shwilo, nle nkerhün ka, tha kegwa aphu hyulo so, lo Lazar ko tha gwakemvu aphu hyula so; ai a-we ntsoka hinyu ketegvü bin laso, ai n we le kenjünthyü bin laso.

²⁶Lo tsüntimvule hagun lo agun ja nyu tekhwünkü ketetsin kethyü nme thyü pe bin laso; tsügenyu mele hiki pon bin-o hagun kipon kü titse-e kü loho, lo tsü kipon temi nme-e hikipon küryü keloi ndi.’

²⁷Tson-e, ‘Apvü Abraham, nle a njünlo a-nipe apvü ka ki shülo.

²⁸Kechamvule asikezen nyu mipvün le bin, lo anyugun ko kenjün kethyü bin hinyu ryü lae shamvu, tsügenyu a-no gü hi rüla hi zoshülo.’

²⁹“Ai Abraham le, ‘Anyugun ko Mosa lo sidyükeshanyue bin nle, anyugun no tsüdan khwenyü lo chi,’ tsonla.

³⁰Tsüselo a-le, ‘Tson loshvu le, apvü Abraham, temi nme le kesi nyu rhünni gunlo, anyugun ko anyugun nyunkelu loti.’

³¹Tson-e Abraham le a-ka, ‘Anyugun le Mosa lo sidyükeshanyu jo tenyen mvu yatselo, temi nme le kesinyu rhünni gun-e tenyenlo ho,’ ” tsonla.