Read Southern Rengma Naga LUK 17 Bible Online

LUK 17 - Southern Rengma Naga bible

LUK 17

¹Tsüselo a-le senthyükelonyu danka, “Methyü kenshvu le ryü mvu loho; ai che, lihigüe tsü sen keryü gü we thyülo tiso!

²Temi tsügü tsü le ntsenyu hidan hi nme-e thyü nshvu keshü gü we tha ketserütso khipe a-gunda nyu hüsülo njüo khipe züda nyu shwenshü kela we a-genyu gwakvu ti.

³Ligühigüe a-npvü a-genyu petsü lo chi! “N pvünyu nme le kemu thyü la yatselo a-kesüla chi, tson-o a-le a-nyunkelulo yatselo a-kemu jü pe a-tsüshü nye.

⁴Tsüntimvule a-le khenyüme nge gwüntsenyü ge kemu thyülao, gwün tsenyü ge nki niryüo nka, ‘Anyun kelulo sele,’ tsekethyü zo yatselo, a-kemu jü pe tsü mvuloshvu.”

⁵Tsüselo apostel nyu dan le Npugü ka, “Nle agun ketenyen thyü pe chon nishülo.”

⁶Tsüselo Npugü le zo, “Hagun ketenyen le hennyon tsi tsüki-e kebin we, hagun le chündanbin higü ka hi, ‘Nle n npvü ntho chwigü züda nyu sen lo lachi!’ tson shüe tsü le hagun jo zenlo ti.

⁷“Hagun peha le a-gonyu le bin-o tsügü le low nyu tha thyübin nmvue tanyü khwen tseo a-le low nyu ryü ntsin a-ka, ‘Nle whütse gü chvü tyülo chi, tson ti le?’

⁸Le tson mvuo a-ka, ‘Nle a ketyüketsü ndoshüo phi lope nsen phinpvütseo ale tyütsülo kemvuthen chvü shü pe atsü shülo, tson-o nle ntsonki tyütsü nye, tsonkethyü zo tila?’

⁹A-gogü tsüle tsonthyü keshü genyu tsügü rühvu ti le?

¹⁰Tsühontse hagun ko hagun no thyülo tse keshü tsüthyü külo yatselo, ‘Agun le n gonyu kegwanyu mvu, agun no thyü lotse keshü nti thyükelo nti,’ ” tsonzo nye.

¹¹Tsüselo anyugun le Jerusalem nyu gun kejü ka a-le Samaria lo Galil rünyi au rhi nyugun jü.

¹²Tson-o a-le rünyi nme nyu yülo ntsin nyun le ketyünyu mi tseryü teno lo, lo anyugun le nithen ki nra anyugun yhenthyüo,

¹³“Jisu, Kedagü, Nle agun njün shülo,!” tsonso.

¹⁴Lo a-le anyugun hyushü ntsin anyugun ka, “Hagun le gü hagun min pe peshü dan hishü chi.” Tson-o anyugun le gunjü laryü anyugun keho le bwen lola.

¹⁵Tsükatsü anyugun dan nyu nme le a-keho le gwalo kela shalo njüo nra a-yhenthyüo Sunggigü shwen shwen gunryüla.

¹⁶Lo tsüntimvule a-le Jisu shwen shwen-o a-pha nyu nkhün tsü la. Lo temi tsü gü tsü le Samaria nyu nme.

¹⁷Tsüselo Jisu le, “Mitseryü thyü nbwenshü mvu ole? Lo mi tekü dan we dihontse la?

¹⁸Sinrünyi kechanyu temi higü nyeki kechanyu nme-e niryüo Sunggigü keshwen ndila sele?”

¹⁹Tson-o a-le, “Nketenyen le a-npvü nthyü ngwa lola sele nye!” tsonshü.

²⁰Tsüselo Farisinyu dan le Sunggigü keda le nyu tsekethyü gwünkho ki ryü tiyo tsekethyü ketsoshü. Jisu le, “Sunggigü keda le meno me yhütyü pe hyulo kegwa thyü ryü loho.

²¹Temi nme-e, ‘Hire, hika bin nyo’! nmvue, ‘Lika bin nyo!’ tson kethyü zo loho; kechamvule Sunggigü keda le hagun nyun nyu bin kelasi genyu!” tsonshü.

²²Tsüselo a-le senthyükelonyu dan ka, “Hagun le Temi Nyugü jon nme hyunyü sa kethyü gwünkho le ryü ti; ai hagun le tsükatsü jon tsügü tsü hyu loho.

²³Tsükatsü mele hagun ka, ‘Liki li, a-le lika bin nyo!’ nmvue, ‘Hire, a-le hika bin nyo!’ tson kethyü zoti. Tson-e hagun le tsüki gun nya nye; nmvue tsüdan si-e then nya nye.

²⁴Kechamvule tsangkekechwe hontse tsang hensin nme kipon tsang kechwe shülo tsang hensin kecha kipon ben gun kehü tsühontse ryü nrün genyu.

²⁵Ai a-le kenjün thyüsa kethyü hyu njüo shenhe hidan no a-khela ti.

²⁶Lo Noah keyhun ka hontse Temi Nyugü jon kae tsühontse ti.

²⁷Noah le run nyuyüla kemvuthen temi dan le ketyüketsü thyü, tenulo, kalu, tson bin-o zü le da soryüo temi aphu nrheshvu küla.

²⁸Lo Lot keyhun kae tsühontse, mele ketyüketsü thyü, tha jwen, tha hei, thatsi shü lo kathyü bin.

²⁹Ai Lot le Sodom nyu tinkela nyü tsangge mah lo mahtso ri tsüryüo rünyi aphu ro küla.

³⁰Temi Nyugü ko meno mhuntsun a-hyu nrün nyü we tsühontse ti.

³¹“Lo tsünyü temi lihigüe kaso ki kebin nyu no a-hon khilo titse kazü ki tsen nya; tsühontse low nyu kehünyue no a-kanyu nigun nya.

³²Lot nunyu rüla rüchünlo nye. Temi lihigüe a-npvü a-phou khipe a-hon thyükelo rüchün yatselo, nkela ti.

³³Ai temi lihigüe a-phou nmhenla yatselo ntsen pe a-hon thyülo ti.

³⁴Ale hagun ka zoshü ti, tsüje tsü temi mihvu le no nme ge jü bin-e, nme zenlo lati, lo kecha gü khela ti.

³⁵Tenunyu mihvu le kengüo tha tserü bin-e nme zenlo lati, lo kechagü khe lati.

³⁶Mihvu le low nyu hüti, nme zenlo lati, lo kecha gü khe lati.”

³⁷Tsüselo anyugun le a-ka, “Dikipon letse, Npugü?” tson-o ketso. Tsontsin a-le anyugun ka, “Kesi min gü le kebin bin ka güda le gü tsünyu kequen ti,” tson zoshü.