Read Southern Rengma Naga LUK 18 Bible Online

LUK 18 - Southern Rengma Naga bible

LUK 18

¹Tsüselo a-le anyugun no anyugun tson rüzi nyao hizin binlo lotse kethyü jokejvü nme pe anyugun nthon-o,

²“Rünyi nme nyu jokera kehü Sunggigü ko nshvu hü kemvu, lo temi joe no tha letse hü kemvu temi nme le bin hü.

³Lo rünyi tsünyu tsü tenunyu maginyu nme ko bin hü, lo tsügi le a-ka ryü zin-o, ‘Nle ajün zoshüo a shwikerüchün nyu ge akhün zoshü ta,’ tson-o a-ka hizin hü.

⁴Ai a-le gwüngwa nme ka we nmvu letse la; tson-o kenkhin ki a-npvü a-nthon tseo, ‘Awe le Sunggigü ko nshvu mvu, nmvue temi joe no tha letse hü mvu,

⁵tson-e tenunyu magi higi hile ryüo a kevürilo kela genyu ale a-khün zoshü lati; tson mvulo a-le ryü zin-o a kevüri tsin lola se laryü,’ ” tson sola.

⁶Tsüselo Npugü le, “Jokera kehü njü kemvu güe tsühontse kehü tsü shalo chi.

⁷Lo Sunggigü le a-nyun thon letse-e khenyütsen keben kezün a-ka hizin kehünyu a-le a-npvü kejü kelonyu khün zomvula ti ole?

⁸Ale hagun ka zoshü ti, a-le a-nyun kerhün thyü sogü tsüdan khün zoti. Ai Temi Nyugü le keryü ka, tsüka kazü ketenyen le bin-o a-no hyulo tile?” tson.

⁹Tsüselo a-le temi dan me a-npvü a-le kentsen nyu letseo a-tenyen lo kechanyu nkhin kehü dan me genyu a-le jokejvü higü hi zo.

¹⁰“Mihvu le kershvuka nyu hi titse nsin: Tsühvu nme le Farisinyu, lo nme le khajana keshvunyu.

¹¹“Farisigü le solo njüo hi kethyü le hihontse, ‘Sunggigü, ale temi kechanyu, me kesüo mehon setyü kehünyu, njü kemvunyu, keyülanyu, khajana keshvu higü hi hontse-e kemvu genyu ale nshwen hü nle.

¹²Ale Sabbath jon nme ka gwünhvu ge tyütsü mvutse nyen-o hi hünyo; ale tha hyukelo aphu jüntseryü jünme lope hoshü hünyo,’ tson bin.

¹³“Ai khajana keshvu gü we kecha nme kipon bin-o nyi sogü tsangge nri loshvu tseo, a-nyun jen-o, ‘Sunggigü, nle kemunyu ahigü hi-e shwinjün shüta!’ tson.

¹⁴Ale hagun ka zoshü ti,” Jisu le zo, “Temi kechagü mvule temi higü we Sunggigü mhundyü ka ntsenlo sele tseo a-ka ki nshye laso. Kechamvule temi lihigüe a-le gon letse kehü gü thyü pe shenla ti; ai temi lihigüe a-le a-npvü shen letse kehünyu thyü ngon shü nrün genyu,” tsonla.

¹⁵Tsüselo mele Jisu no a-nyenyu kesüshülo tseo anyugun zen-o a-ki ryü; lo senthyükelonyu danle tsü hyushüo anyugun rho sola.

¹⁶Ai Jisu le anyu ko-o, “Ntsenyu dan no aki ryülo, lo anyugun khin nyalo. Kechamvule tsangge keda le hihontse kethyünyu ho genyu.

¹⁷Hire, ale hagun ka zo tsentsü shüti, temi lihigüe ntsenyu hontseo Sunggigü keda zenlo mvulo, a-le tsünyu yü keloi mvu,” tsonla.

¹⁸Tsüselo kedanyu nmele Jisu ka ryüo, “Hire, senkethyü kegwa gü, ale kethonthen kerhün hyulo nrün genyu nyu thyülo mvuloshvu la?” tson-o ketsoshü.

¹⁹Tsüselo Jisu le a-ka, “Nle nyuthyüo ano kegwa gü letse hü nla? Kegwa gü tsü le nme nti, tsüle Sunggigü le.

²⁰‘Nle keyüla nya; nle me dushvu loshvu; rühu nya; kenku jünzo nya, npvü njvü nyu rühvulo chi,’ tsonkethyü jo hi nko sha bin ti,” tsonshü.

²¹Tsontsin a-le Jisu ka, “Senkethyü gü, ale a ncheka nyu tha hi aphu zen soryüla sele.”

²²Tsükatsü Jisu le jo tsü shashü njüo a-ka, “Nle tha nme timvu zun; gü nhon kebin tsü aphu jwen pe kendinyu tsü lachi, tsonlo yatselo tsangge nkenya le bin loti, tson-o ryü a sithenlo chi,” tsonla.

²³Ai a-le jo tsüdan shalo ntsin a-mhu gwakemvu thyülo la; kechamvule a-le kenya kegwanyu nme genyu.

²⁴Lo Jisu le a-hyushü njüo, “Kenyanyu hile Sunggigü keda nyu yü nrün le tsensa ti hile la!

²⁵Kenyanyu no Sunggigü keda nyu yü nrün le ut nme no chwünkü nyu nna chwi kela we nne kvu ti.”

²⁶Tsüselo jo tsü keshanyu dan me le, “Tsonlo senyu le Kenikelo hyulo gwa tila?”

²⁷Ai Jisu le, “Temi le thyülo keho tsü Sunggigü le thyülo gwa.”

²⁸Tsontsin Pitor le, “Hire, agun we agun hon aphu khela njüo n sithen hü laso.”

²⁹Tsüselo a-le anyugun ka, “Ale hagun ka zo tsentsü shüti, temi lihigüe Sunggigü keda genyu a-ka, nmvue a-nu, nmvue a-tsasikezen gü, nmvue a-pepvünyu, nmvue a-nyenyu khekelanyu ntson ntsenyü keyhun ka tsünye kechon hyulo ti,

³⁰lo sigü keyhun ki-e kethonthen kerhün hyulo ti.”

³¹Tsüselo a-le tseryü kenyhunche dan zen-o a-ki ryü njüo anyugun ka, “Hire, ngun le Jerusalem nyu nsin titse bin laso; lo sidyükeshanyu le thu kenjü aphu Temi Nyugü ge thyü pen küti.

³²Ngun nsinlo mele a-ten pe juda kemvunyu ben nyu shü lati.

³³Tson-o meno a-shwinyü lo a-nshwen-o nsü pe a-nye ti, lo meno a-vüo a-dushvu ti; tson-o jonshen nyü a-le rhünni so lati,” tson zoshü.

³⁴Ai anyugun le jo tsügü rüla keshanyue shabin mvu; tson-o jo tsü pe anyugun kebu shükela genyu nyuzohü yo anyugun le tsü rüchünlo mvula.

³⁵Tsüselo a-le Jeriko rünyi khonni gunzhü, tsüka a-yhütyü keponyu nme le tsonkhoka shvutyü bin-o hyulo.

³⁶Lo a-le temi kechon ki le a-khoka gun kejü shashüo,“Nyuthyü titseo tson hüyo?” tsekethyü meka ketso.

³⁷Tsüselo mele a-ka, “Nazaret Jisu le ryü jü nle,” tsekethyü a-ka zoshü.

³⁸Tsüselo a-le nra sen-o, “David Nyugü Jisu,nle a njün shüta!”

³⁹Tsükatsü ri kegun nyu dan le a-kesüo, A-no matse bin lo tse sola. Ai a-le nra a-yhenthyünio, “David Nyugü, nle ashwi njünshü ta,” tsonlo la.

⁴⁰Tsügenyu Jisu le sunlo njüo meno a-zen ryülo tse so. Tson-o a-khonni npharyü zhü ntsin, a-ka, “Nle ano nge nyuthyü keshü le nkenyü tila?” tson-o a-ketso shü.

⁴¹Tsüselo a-le, “Npugü, ano tha hyulo ta!”

⁴²Tsontsin Jisu le a-ka, “Nyhütyü no tha hyulo chi! N ketenyen le nthyü ngwa shü sele!” tsonshü.

⁴³A-le tsonshü ntsin, a-yhütyü le thahyu chwiryülo la; tson-o a-le Jisu sithen-o Sunggigü shwen zintin la; lo temi aphu tsü hyuo Sunggigü shwen sola.