Read Southern Rengma Naga LUK 19 Bible Online

LUK 19 - Southern Rengma Naga bible

LUK 19

¹Tsüselo a-le Jeriko rünyi nyu yüo rünyi tsügü pvüthü gunzhü.

²Lo rünyi tsünyu Zakia tsekethyü nmele bin; lo a-le khajana keshvunyu dan nyu kedanyu nme, tsüntimvule a-le nnya sa.

³Lo a-le Jisu tsüle segü yo tse kethyü nrishü titse kethyü rüchün hü; ai a-le a-gü tsenyomha gwünzin laryü, temi kechonki le kehü genyu a-le hyulo mvula.

⁴Tsügenyu a-le me mhundyü rio n ton gü shwishü titseo tinkübin nme ge kü; kechamvule Jisu le tsü kipon ryü zhü kethyü genyu.

⁵Lo Jisu le gü tsü tilo ntsin nyi sogü a-ka, “Zakia, whütse tsenryülo; kechamvule ale nthu gü nka nyu bin mvulo shvu kebin genyu.”

⁶Tsüselo a-le whütse tsenryülo njüo a-shekerhün thyü Jisu nsinlo.

⁷Lo temi dan le tsü hyushüo kenya kenyüo, “Likili, a-le kemunyu kanyu gü tsünyu zen kengü bin laso!”

⁸Tsükatsü Zakia le solo njüo Npugü ka, “Hire, Npugü, ale ahon peha shü pe tha kendinyu tsüla tile; lo ale nkuo mehon tha peha selo la yatse-e ale tsü jünzi kho khinipe me tsüla tile,” tson sola.

⁹Tsüselo Jisu le a-ka, “Nthu kenikelo le ka hinyu ryü laso; a-ko Abraham nyu genyu.

¹⁰Kechamvule Temi Nyugü le nmhen kelanyu füo tsünyu kenilo titse ryü kethyü genyu.”

¹¹Lo mele a-jo tsü nyü kebinka a-le Jerusalem rünyi kho nni gunzhü kela genyu lo Sunggigü keda thyü whütse ryüla nrün, mele rüchün kehü genyu a-le jokejvü nme zoni shü.

¹²Tson-o a-le, “Kedanyu nme le a-npvü a-keda loni sen gunryü titseo rünyi nithen ki gunla.

¹³Tsükatsü a-gonyu mi tseryü le kethen ryüo raka khin tseryü pe anyugun tsüshü njüo anyugun ka, ‘Hagun ale ryü kemvuthen hi khisen-o hathyü hü tse nye,’ tsonshü la.

¹⁴Ai a-nyu rünyi nyu le a-shwi rüchün-o, lilonyu nme nipe a-ki shüo, ‘Agun le temi higühi no agun so keda thyü nyü mvu le.’

¹⁵“Tsüselo a-le a-keda hyulo njüo ryü ntsin a-le raka pe a-gonyu dan me tsükeshü dan tsüle anyugun raka pe hathyüo chwikelo tsü shashü nyüo, tsüdan ko zen ryülo tseo ahza hoshü.

¹⁶Tsüselo a-kerigü le a-mhundyü ka ryüo, ‘Npugü, n raka pe hathyüo tsü jüntseryü kho chwilo laso.’

¹⁷Tsontsin kedagü le a-ka, ‘Gwasa le, nle keseri go ketsin so; nle tha keshanyu ge-e joketsin zokelo genyu ale nno rünyi tseryü so keda thyü ti le.’

¹⁸Tsüsika kenyhun gü ko ryüo, ‘Npugü n raka tsü lope hathyüo tsü jünpvün kho chwilo la sele,’ tson.

¹⁹Tsüselo kedagü le tsügü ka ko, ‘Nko no rünyi pvün so keda thyüti,’ tsonla.

²⁰“Tsüselo kechanyu nme ko ryüo, ‘Npugü, n raka le re, the! Ale hikho hi khipe phiren nyu jwen njü lenye.

²¹Nle temi ketsenkerün nme genyu ale n nshvula so; nle nhon kemvue khilo lotse hünyo,nle ntsi sen tsügü gwünshü kemvu ki-e gvülo la hünyo,’ tsonso.

²²Kedagü le a-ka, ‘Nle serikemvu gogü, nmün nyu chwikeryü njo tsü ale tsü sen-o n nmuti. Ale ketsenkerünnyu nme, ale ahon kemvue khilo hü; ale ntsi sen tsügü gwünshü kemvu bin ki-e gvülo kehü nle shabin letse la?

²³Kha, tsonlo nle nyu thyüo a raka tsü khisen gü raka kanyu shü njü mvula? Tson yatselo ale niryüo hi kethyü ka a raka kechwi-e hyusinlo nrün.’

²⁴“Tsüselo a-le a-khoka kebin nyu dan ka, ‘Hagun we temi higü ben nyu raka khin khisen gü khin tseryü le kebin gü ben nyu shü lalo.

²⁵Tson-o anyugun le a-ka, ‘Npugü, a-le khintseryü le bin nyo,’ tson.

²⁶Ale hagun ka zoshü ti, ‘Temi lihigüe tha le kebin nyu khipe a-tsü sinshü ti; ai kendi gü we, a-hon kebin tsüe khisen ni tinla ti.

²⁷Ai a shwikerüchün hidan ano anyugun so keda thyü kemvu dan zen ryüo hika a mhundyü ka anyugun dushvu lalo!’ ”

²⁸Tsüselo a-le jo tsü zoshü njüo ri sen tse Jerusalem ki nsin zhü.

²⁹Tson-o a-le Oliv tsekethyü kazüthun Betfage lo Bethani au rünyi kho nni gun kezhü ka a-le senthyükelonyu mihvu nishüo au ka, “Hai rünyi hai ntsun kebin gü nyu tsü gunlo nye.

³⁰Lo hai le rünyi tsünyu yülo, nduka temi nme-e a-ge kü kemvu gada nme dyü pe bin kenjü hyulo ti lenye; tsügenyu tsü shwülo njüo zen ryü chi.

³¹Lo mele hai ka, ‘Hai le nyuthyüo tsü shwü bin nla?’ tson-o hai ketso yatselo hai le meka, ‘Npugü le hi bin nle,’ tson zola nye.”

³²Lo a-le au nikeshü hvu le gü a-le au ka zokeshü hontse hyulo.

³³Tson-o au le gada nyugü tsü shwü bin ntsin, gada npunyu le au ka, “Hai le nyuthyüo gada nyugü shwü bin nla?”

³⁴Ai au le, “Npugü le hi sen mvulo shvu bin nle,” tson-o au le a-zen-o Jisu ki ryü.

³⁵Tsüselo mele me phi lope gada ge lashüo Jisu le tsü ge kügü binlo.

³⁶Tson-o a-le tsonchü shü ntsin mele mephi khipe tson nyu lashü.

³⁷Lo a-le Oliv kazüthun kho nni ryü kezhü ka senthyükelonyu dan aphu a-tho keda kehyu genyu nra sen-o anyugun shekerhün thyüo Sunggigü zan shwen sola.

³⁸Tson-o, “Npugü zan sen ryü kezhü Raja gü no kengvü gü thyülo; lo tsangge-e kegwagü thyülo chi, lo tsang teso tsin ge-e a-zan no zankechwi gü thyülo chi!”

³⁹Lo tsükatsü temi dan nyu Farisinyu dan me le a-ka, “Senkethyü gü,nle senthyükelonyu ju khinla chi,” tson.

⁴⁰Tsüselo a-le anyugun ka, “Ale hagun ka zoshü ti, temi hidan hi no ma tselae, tso dan-e nra soryü lati,” tsonla.

⁴¹Lo tsükatsü a-le rünyi nyida gü kho nni npharyülo ntsin chüo,

⁴²“Nle nthu hi-e bwenlo nrün tson shalo gwa nrün laryü me! Ai ntsoka we tsüle nkebu tin laso.

⁴³Lo gwünkho nme le ryü ti, tsükatsü n shwikerüchün nyu le chwi thyü pe nhun keteno loti, tson-o anyugun le n hunpvü loti.

⁴⁴Tson-o nte lizin hizin ntalo lati; lo n kedüla ti; lo n nyenyu ju sin-o nka no pen tsügü nmin keto pe kazü nyu shü lati; lo tso nme-e no kerenpvü bin loho lati; kechamvule nle ale nfü keryü gwünkho shamvu kela genyu!”

⁴⁵Tsüselo a-le Kershvuka nyu yügü tha jwen kebin tsü khipe shwen so,

⁴⁶tson-o temi dan ka, “ ‘A ka no kehika thyü ti,’ tson kethyü thu njü; ai hagun le higü hi pe kerühu ka nme thyü laso!”

⁴⁷Lo a-le khenyütsen Kershvuka nyu me senthyü zin tinla. Ai peshükeda ju lo thakeshatsin ju lo temi dan nyu pelü kethyü ju le a-boshvula titse kethyü gü nti rhi sola.

⁴⁸Ai temi aphu a-hoshü mvuo a-jo nyü gwünzinlo kela genyu anyugun le thame thyü loshvu la.