Read Southern Rengma Naga LUK 2 Bible Online

LUK 2 - Southern Rengma Naga bible

LUK 2

¹Lo tsükatsü Agustu Kaisar le kazünyu kebin aphu no a-zan thu pe sorkari lesü nyu shülo lotse ahza nme hoshü.

²Kurini le Siria kazü so ahng thyü kebin ka tsügü katsü no zan thu keritsin thyü.

³Lo temi aphu a-zan thu titseo a-npvü a-rünyi ki gun küla.

⁴Lo Josef ko Galil kazünyu Nazaret rünyi nyu bin-o Judia kazü David rünyi Bethlehem nyu gun; kechamvule a-le David kaminyu lo a-shvu a-nyenyu genyu.

⁵A-le a-zan thu titseo au no kengü bin titse zokenjü gi Maria zen gun; lo tenunyu tsügi le nyuphou pvü hü.

⁶Tson-o au le gungü tsünyu bin kelo ka tenunyu tsügi le nnyu kethyü gwünkho le ryüla.

⁷Tson njüo a-le a-nyurigü pechenyu gütsü nnyulo njüo phithon pe a-je pe methu khun nyu bin njü; kechamvule tesinka nyu au bin ndi kela genyu.

⁸Lo rünyi tsünyu tsüle tanyü kekhwenyu le low njüo a-npvü a-tanyü khwen kehü le bin hü.

⁹Lo Npugü lokethyü nyu nme le ryüo anyugun khoka solo, lo Npugü keben le anyugun gwün pe benchvü la. Tsügenyu anyugun le nshvu sala.

¹⁰Tsontsin tsangge lokethyü gü le anyugun ka, “Nshvu nya chi. Hire, temi aphu le a-sherhün nrün jolokegwa ale sen-o hagun ka ryü bin nle.

¹¹Nthu David rünyi nyu hagun kenikelo gü Npugü Khrista gütsü nnyulo la sele!

¹²Lo hagun le phithon pe nyu tsügü je pe methu khun ka bin kenjü hyu loti, hagun le tsügü tsü hyulo lo sha loti.”

¹³Tsonshü ntsin tsangge swülobu keho le jo tsügü genyu Sunggigü keshwen le hihontse:

¹⁴“Tsang tesotsin ge kebin Sunggigü zan no gingvü kelo gü thyülo chi, lo kazünyu kebin temi, a-le a-kenyü kehü jue no kegwa gü thyülo chi!”

¹⁵Tsüselo tsangge lokethyü ju le anyugun khelao tsangge küla ntsin tanyü kekhwen nyu jule khinyu nyu ka, “Je, ntsoka we tsüselo Bethlehem nyu gü Npugü le pe ngun ka zokeshü thyü kela ju nri tile je.”

¹⁶Tson njüo anyugun le nmhe gun laryü, gü Josef lo Maria au lo ntsenyu güpe methu khun nyu njü kenjü hyulo.

¹⁷Lo anyugun le tsü hyushü ntsin nyu tsügü rüla n ngüka pe anyugun ka zo keshü rüla pe me ka zoshü.

¹⁸Tsügenyu tanyü kekhwen ju le pe anyugun ka zokeshü nyu ju aphu a-dun thyü küla.

¹⁹Ai Maria we jo tsü aphu pe a-nyun ka shüpvüo rüchün zin tinla.

²⁰Lo tanyü kekhwen ju le tsangge lokethyü ju le anyugun ka zokeshü aphu hyu tsentsü kelo genyu Sunggigü shwen lo rühvu tseo ni tinla.

²¹Tsüselo a-nnyukelo jon tetse penla njüo a-girü lo, lo a-zan pe JISU thalo; zan tsügü le aphou kepvü mhundyü nyu tsangge lokethyü gü le a-npvü ryüo tha shü.

²²Tsüselo au le Mosa jvüka zo kenjü hontse thyükenshün kethyü gwünkho tilo ntsin Josef lo Maria au le a-pen gü Npugü hi titseo Jerusalem nyu sin,

²³kechamvule Npugü le a-npvü tejvü khikeshü genyu, “A-nyu nyurigü le pechenyu yatselo khikho pe Npugü no a-hon thyü lati,” tson kethyü thu pe kenjü genyu.

²⁴Lo Npugü jvü ka zo kenjü hontse a-ro a-ra thyü nrün genyu paro kenyhun, nmvue nsu kenyhun sen nsin.

²⁵Tsükatsü temi nme a-zan le Simeon tse kethyü nme le Jerusalem nyu bin hü lo temi tsügü le ntsen lo Sunggigü kerüshvu le a-kenyü hü, tsühontseo Israel nyu nyun thukeyhun shü nrün gü khwen hü; lo Kenshün Kapu le a-ge bin.

²⁶Lo temi tsügü tsü le Npugü le zo kenjü le Khrista kehyu mhundyü a-no kesi hyu loho letse himhundyü kinyu Kenshün Kapu le tsin pe a-hishü la.

²⁷Tsügenyu a-le Kenshün Kapu güno Mosa jvü ka zo kenjü hontse thyü titseo a-zan ryü ntsin

²⁸Simeon le a-nyu gü tsü pen-o Sunggigü keshwen le hihontse:

²⁹“Npugü, nle ntsoka we njo zo kenjü hontse, n gogü ahi no anyun bwen-o tin jü laso.

³⁰Kechamvule ale a npvü ayhütyü pe Nle kenikelo do zo keshü gü hyulo kela genyu.

³¹Kenikelo do tsügü tsüle nle n npvü ndo pe temi aphu mhundyü ka shü laso:

³²Keben tsügü khipe Juda kemvunyu tesha keshü thyü, tson-o tsügü no ntemi Israel nyu dan genyu zan kechwi thyü laso.”

³³Lo a-rüla tsüdan zo keshü genyu a-pvü lo a-jvü au no au dunthyüla.

³⁴Tsüselo Simeon le jochü pe anyugun tsüo Maria ka, “Hire, nyu higü genyu Israel nyu kechon le nto lati lo niso-e lo kegwa nme thyüshü sele nye; lo a-we me no a-shwi nyümvu kehüi nme le nye.

³⁵Tsüle a-ketsin, lo zhethon pe n npvü nnyun kejen hontse ti. Tson-o tsügenyu temi kechon kerüchün meno sha loti.”

³⁶Lo a-zan le Anna tsekethyü nme kobin; lo tsügi tsüle Asher shvunyenyu Fannuel nyugi. A-le then terenla; a-le a-lüka peche nme ka kalukelo chen tsenyü a-nyepvü tsügü zen yhun.

³⁷Tson-o tsüsiki magi zin tinla, lo tsü gwünkho katsü a-le chen hentetseo pezi la. Tenunyu tsügi le tyütsü mvutse nyen-o Sunggigü rüshvu lo hitseo Sunggigü kerüshvu genyu nhenyue kheje ki-e Kershvuka nken shwi hü mvu.

³⁸Tsügenyu a-le tegi kevüja tsü gwünkho ka chwiryüo Sunggigü shwen-o Jerusalem kenilo nrün khwen kebin aphu ka tsü rüla zo pe ti.

³⁹Tsüselo Npugü jvüka zo kenjü aphu thyü külao anyugun kethen nisen-o Galil kazünyu anyugun rünyi Nazaret ki nigun la.

⁴⁰Tsükatsü nyu tsügü tsüle peshülo njüo nkin a-shvushvu thyülo lo a-tha kesha no a-sülo; lo Sunggigü kanyu chwikeryü shwikenjün gü ai a-ge bin sinlo.

⁴¹Lo a-pvü a-jvü au le chenkechwi kenikelo nga ka Jerusalem nyu nsin zin hü.

⁴²Lo a-nnyukelo chen tseryü kenyhunche kela ka au le tejvü hontse nga tsünyu nsin.

⁴³Tson-o au le tsünyu bin nrün kho bin la njüo niryü kezhü ka, a-nyugü Jisu tsüle au siki Jerusalem nyu bin tinla; ai a-pvü no a-jvü au le tsü shamvu.

⁴⁴Tsonkethyü gümvule au le a-le anyugun dan nyu hü ado tseo au le khenyüme tson kechü ki gunla; tsükinyu au le au shvunye nyu lo au keshanyu dan nyu a-füso.

⁴⁵Ai a-hyulo mvula ntsin a-füni sen-o Jerusalem nyu nsin la.

⁴⁶Tson-o jonshen sikinyu au le Kershvuka nyu a-hyulo. A-le tsükatsü tejvü keshanyu dan nyu bin-o anyugun khwen nyü lo anyugun ka thae ketso tse bin.

⁴⁷Lo a-le anyugun ka tha kezo genyu lo a-thakesha shakelo ju aphu a-dun thyüla.

⁴⁸Lo au le gungü a-shwi pe au dunthyüla; tsügenyu a-jvü le a-ka zo, “Anyugü, nle nyu thyüo ayi ge hon hü nla? Hire, npvü ayi no ayi nyun kenjün thyüo n fü ryüo hiti laso.”

⁴⁹Tsontsin a-le au ka, “Hai le nyuthyüo afü hü nla? Ale apvü kanyu bin mvulokeshvu tsü hai le shamvu zunle?”

⁵⁰Ai au le a-le kezo jo tsügü shalo mvula.

⁵¹Tsüselo a-le au zen-o Nazaret ki nshyela; tson-o a-le au jo zen-o yhun tinla. Lo a-jvü le jo tsü pe a-nyun ka shüzin pvü hü.

⁵²Lo Jisu le thae shasin ashvushvu thyülo lo tsüntimvule a-le Sunggigü lo temi keso-e pvü sinlo.