Read Southern Rengma Naga LUK 20 Bible Online

LUK 20 - Southern Rengma Naga bible

LUK 20

¹Khenyüme a-le Kershvuka nyu me senthyü lo jolokegwa zope me hi kebin ka peshükeda ju lo lesükeshatsin ju le anyugun pelü ju zen-o ryü, lo anyugun le a-ka,

²“Nyu kekvu sen-o nle tha hidan hi thyü hü nla? Nmvue segü le nno hithyülo tse kethyü kekvu pe ntsü la?” pe agun ka zoshülo.

³Tsüselo Jisu ko anyugun ka, “Ako hagun ka tha nme ketso ti. Lo aka zoshü ta,

⁴Johan Baptist gü tsüle tsangge le temi kanyu la?” tson-o ketsoshü.

⁵Tsüselo anyugun le anyugun npvü kenthon-o, “Ngun le tsangge letse kethyü zolo; a-le ngun ka, ‘Tsonlo hagun le nyuthyüo tenyenlo mvula?’ tson so ti.

⁶Lo temi kanyu letse shülo, ‘temi hi aphu tso pe njon soti,’ kechamvule anyugun le Johan le sidyükeshanyu nme letse kehü genyu.”

⁷Tson-o anyugun le, “Agun le a-le dikipon ryü yo shamvu,” tse kethyü zola.

⁸Tsontsin Jisu ko anyugun ka, “Ako nyu kekvu sen-o tha hidan thyülo hüyo tsü pe hagun ka zo loho,” tsonla.

⁹Tson-o a-le jokejvü hilo pe temi dan ka zoti tseo, “Temi nme le vain low thyüme tsüshüo khipe low ketsünyu ju ben nyu shülao, rünyi kecha nme ki hü thonsa tinla.

¹⁰Lo a-le nsha kelo gwünkho ka anyugun le vain low nyu a-sha khipe a-tsü ti ado tseo a-gonyu nme nipe low ketsünyu tsüdan ka shü. Ai low ketsünyu dan tsüle a-vüo thame lope a-tsü mvuo a-no tinla.

¹¹Lo tsüsikae a-le a-gonyu kechanyu nme nishü; ai anyugun le tsügü ko vüo a-nshwen sala, tson-o thame pe a-tsümvuo a-no tinla.

¹²Tsüselo a-le gwünshen ge gü ka ko nme nishü, ai anyugun le tsügüe vü pe no a-ge tejünshvu hyula njüo akhipe shwenla.

¹³Tsüselo vain low npugü le, ‘Ale nyu thyülo gwa tila? tson tseo, ale anyu a sogü nishüti; a nyugun ko anyugü we rühvulo ti ado.’

¹⁴Ai low ketsünyu dan tsüle a-hyushü ntsin anyugun npvü kenthon-o, ‘Higü hile a-nyu ketsingü so, ngun a-dushvula nu! tsonla yatselo ngun le a-hon aphu khinlo gwa so!’ tson sola.

¹⁵Tson-o anyugun le a-nrhisü zen chwigü vain low ngwen ki a-dushvula. “Kha, tsonlo vain low npugü le temi tsüdan ge nyu thyü tila?” Jisu le ketso.

¹⁶“A-le gü low ketsü tsüdan boshvula njüo vain lo tsügü tsü khipe low ketsü kechanyu ben nyu shüla ti.” Lo anyugun le jo tsü shashü ntsin, “Aya, tson loshvu tsin lo!” tsonso.

¹⁷Jisu le anyugun nrilo njüo ketso-o, “Tson yatselo nduka ‘Ka kethyünyu le khekela tso gü mele tsü lope a-quen nyu tso kedagü thyülo laso,’ tson thu kenjü jo higü hi pe nyuthyü la mon?

¹⁸Temi higühigüe tso tsügü ge cheketsü gü a-jon ketakera lati; lo tso gü tsüle temi lihigü ge-e cheketsü gü, temi tsügüe kemphü hontse lati.”

¹⁹Tsügwünkho ka tsü lesükeshatsin ju lo peshükeda ju le a-ten kelo rhiso; ai temi dan nshvula. Anyugun le tsonkethyü tsüle kechamvule a-le anyugun genyu jokejvü tsügü tsü zo tsekethyü rüchün kela genyu.

²⁰Tson-o anyugun le a-nden-o a-jo tenlo njüo a-ten pe tejvü gü lo anyugun ahng ben nyu shüla titse kethyü rüchün-o me nishü.

²¹Lo tsüdan tsü le a-ki gü, “Senkethyü gü, nle joketsin ka tha zokehü lo me ge nkenyünyu thyü mvuo Sunggigü jvü gerho sen-o zope mehi kehü, agun le sha tsentsü laso.

²²Agun no Kaisar khajana shü zü le shüzü mvula?” tson-o a-ketso.

²³Ai a-le anyugun do shalo njüo anyugun ka,

²⁴“Khülo, pisa tsü pe a hishü shwi. Hile segü men lo segü zan thu njü nla?” Tsüselo anyugun le, “Kaisar le,” tsonshü.

²⁵Tsügenyu a-le anyugun ka, “Tsonyatselo Kaisar hon lope Kaisar tsü lalo; lo Sunggigü hon lo pe Sunggigü tsüla lo.”

²⁶Tsükatsü anyugun le me mhundyü nyu a-jo tenlo hola; lo anyugun le a-jo genyu anyugun dun thyüo nma tse kü tinla.

²⁷Tsüselo Sadukinyu, temi le rhünni keso ndi letse kehünyu dan me le ryüo a-ka,

²⁸“Senkethyü gü, Mosa le agun ka, temi nme le a-nu le bin-o a-nyu ndio sila lo, a-sikezen gü no tenunyu tsügi zen bin-o a-tsagü tsipwen yhunshü lotse thu njü.

²⁹Lo agun dan nyu tsasikezen nyu mi tsenyü le bin hü laryü, a-kerigü le tenu loshüo a-nyu ndi ketseka sila.

³⁰Lo tsüsigü ko tsü hontse la; tson-o mishen güe tenunyu tsügi zen bin.

³¹Lo tsühontse anyugun mi tsenyü aphu anyugun nyenyu ndio si küla.

³²Tson-o kenkhin ki we tenugi ko sila.

³³Kha, tsonlo temi le rhünni keso ki tenunyu tsügi le temi tsüdan digü nu thyü tila? Anyugun mitsenyü aphu a-zen bin kethyü genyu,” tson-o ketsoshü.

³⁴Tsüselo Jisu le anyugun ka, “Kazü hinyu we temi le kalu tenulo kethyü jvü pe tsü hünyo,

³⁵ai kazü ligü nyu gunlo kekünyu lo rhünikeso siki we kalu nmvue tenukelo jvü thyü pe tsü loho.

³⁶Lo anyugun le si-e loho so; kechamvule tsangge lokethyü nyu zen-o keme thyü tinla nrün genyu. Tsüntimvule rhüni kesonyu thyüo Sunggigü nyenyu thyü tinla tiso.

³⁷Lo kesinyu le rhünikeso rüla Mosa ko senhvu ge zokeshü rüla nyu Npugü le, ‘Abraham Sunggigü, Isak Sunggigü, Jakob Sunggigü,’ tseo zokeshü ka tsin pe hagun hishü la sele.

³⁸Lo A-le kesinyu mvule kerhünnyu Sunggigü le. Kechamvule a-genyu tsü aphu rhün kebin genyu.”

³⁹Tsüselo lesükeshatsin nyu peha le a-ka, “Senkethyü gü, nle zo tsentsü shü laso!”

⁴⁰Kechamvule anyugunle a-ka thame ketso nshvu kela genyu.

⁴¹Lo a-le anyugun ka, “Me le nyuthyüo Khrista no David nyugü letse hü nla?

⁴²David le a-npvü nduka Lü lesü nyu, ‘Npugü le a Npugü ka:

⁴³Ale n shwikerüchün nyu khipe nphasin shüla kemvuthen, nle aben njüzin bin tse nye,’ tson zo njü.

⁴⁴Lo David le a-ka, ‘Npugü’ tsonlo, nyu tsethyüo a-no David nyu thyülo gwa tila?” tson-o ketso sola.

⁴⁵Tsüselo temi aphu kesha ka a-le senthyükelonyu dan ka,

⁴⁶“Mirün ketseyho sen kehü, lo hakethyü bin nyu meno a-kelu kehü, lo sinagog ka nyukedanyu bin le a-kenyü kehü lesükeshatsin nyu genyu hagun petsü lo nye.

⁴⁷Tsüdan le maginyu ka khintyü hünyo, lo kerokon-o kehithyü thon kehü gwünzin le; tsüdan le me nyeki a-shaja tsenkvu ti!”